ԵՐԵՎԱՆ, 2 դեկտեմբերի — Sputnik, Լաուրա Սարգսյան. ՀՀ աշխատանքի և սոցիալական հարցերի նախարարությունը հոգացել է Հայաստանի քաղաքացիների մասին. այսուհետև առաջին և երկրորդ երեխայի համար տրամադրվող ծննդյան միանվագ նպաստի հարցերով կարելի է զբաղվել առցանց ռեժիմում։
Epension.am կայքում գրանցվելուց հետո երիտասարդ մայրերը կարող են իրենց հատկացվող գումարը ստանալ առանց տնից դուրս գալու։
«Այս նորամուծությունը զգալիորեն կթեթևացնի քաղաքացիների կյանքը։ Տարբեր ատյաններով անցնելու, անթիվ տեղեկանքներ լրացնելու անհրաժեշտություն այլևս չի լինի։ Տարածքային կենտրոններ գնալու կարիք չկա, բավական է միայն ձեռքի տակ ունենալ համակարգիչ ու միանալ առցանց ծառայությանը»,- Sputnik Արմենիայի թղթակցի հետ զրույցում ասաց ՀՀ աշխատանքի և սոցիալական հարցերի նախարարության սոցիալական ապահովության պետական ծառայության պետի առաջին տեղակալ Սմբատ Սաիյանը։
Նպաստ ստանալու համար ՀՀ քաղաքացին պետք է գրանցվի epension.am կայքում, այնուհետև որոշ տվյալներ լրացնի իր և երեխայի մասին։ Գրանցման գործընթացը տևելու է մի քանի րոպե, գրանցվում է կայքէջում և համապատասխան ծրագրային գործիքի միջոցով տեղեկատվական համակարգ է մուտքագրում.
- ծնողի անունը, ազգանունը, հայրանունը, ծննդյան օրը, ամիսը, տարեթիվը,
- նոր ծնված երեխայի անունը, ազգանունը, հայրանունը, ծննդյան օրը, ամիսը, տարեթիվը, ծննդյան վկայականի սերիան ու համարը, ծննդյան վկայականը հատկացնելու օրը, ամիսը, տարեթիվը,
- նպաստի` ուղղակի վճարվող գումարը վճարելու համար ծնողի բանկային հաշվի համարը կամ այն բանկի անվանումը, որտեղից ծնողը ցանկանում է ստանալ գումարը:
«Շուրջ 35 հազար մարդ հնարավորություն ունի առանց տնից դուրս գալու՝ դիմում ներկայացնել և ստանալ իր երեխաների ծննդյան միանվագ նպաստը, իսկ սա նշանակում է, որ համակարգում վերանում է պետական պաշտոնյայի և քաղաքացու միջև շփումը»,- ասաց Սաիյանը։
Պաշտոնյայի խոսքով` առաջիկայում այս ծառայությունից կկարողանան օգտվել նաև այլ նպաստներ ստացող քաղաքացիները։
ՀՀ աշխատանքի և սոցիալական հարցերի նախարար Արտեմ Ասատրյանը քաղաքացիներին հորդորեց ստուգել բոլոր փաստաթղթերը, քանի որ թեկուզ մեկ փաստաթղթի բացակայությունը կարող է արգելափակել գրանցման գործընթացը։
«Այս ծառայությունը հասանելի է միայն այն դեպքում, եթե ունեք պետական մարմինների կողմից գրանցված բոլոր տվյալները»,- ասաց Ասատրյանը։
Նրա խոսքով` առաջիկայում կթեթևացնեն նաև կենսաթոշակառուների կյանքը։ Նրանք իրենց հուզող հարցերի պատասխանները գտնելու համար կկարողանան այցելել ցանկացած տարածքային բաժին` անկախ հաշվառման վայրից։
«Մարդը կարող է գրանցված լինել մի հասցեում, սակայն բնակվել ուրիշ հասցեում։ Նրանց կյանքը հեշտացնելու համար մենք մատչելի կդարձնենք գործող համակարգը»,- ասաց Ասատրյանը։
Նշենք, որ երեխայի ծննդյան միանվագ նպաստի չափը սահմանված է հետևյալ կարգով` 1-ին և 2- րդ երեխայի ծնվելու դեպքում՝ 50 հազար դրամ, 3-րդ և 4-րդ երեխայի ծնվելու դեպքում՝ 1 միլիոն դրամ, (500 հազար դրամ կանխիկ և 500 հազար դրամ անկանխիկ եղանակով), 5-րդ և յուրաքանչյուր հաջորդ երեխայի ծնվելու դեպքում՝ տրվում է 1 միլիոն 500 հազար դրամ (500 հազար դրամ կանխիկ և 1 միլիոն դրամ անկանխիկ եղանակով)։
