Կամակոր կնոջ սանձահարումը. ընտանեկան բռնությու՞ն, թե՞ «դաստիարակող» մեթոդներ
(Թարմացված է 00:44 26.11.2016)
Կանանց նկատմամբ բռնությունը վերացնելու միջազգային օրն օրացույցում ուղղակի հերթական ամսաթիվ չէ։ Ընտանեկան բռնությունն արդի և ցավոտ թեմաներից է։ Դժբախտաբար, այս խնդիրը առկա է աշխարհ բոլոր երկրներում։Հայաստանը բացառություն չէ։ Պաշտոնական տվյալով` մեր երկրում 2016թ-ի սկզբից ընտանեկան բռնության պատճառով մահացել է 14 կին։ Թեպետ գոյություն ունեն կանանց իրավունքների պաշտպանությամբ զբաղվող կառույցներ, բայց ոչ բոլոր տուժածներն են համարձակվում պատմել, թե իրականում ինչ է տեղի ունենում տան պատերի ներսում։
Մեր հերոսուհի Աննան հոգեբանական բռնության զոհ է դարձել։ Ինչպես ցանկացած աղջիկ, նա երազել է սիրելով ամուսնանալ։ Ծանոթացել են, կարճ ժամանակ անց զգացմունքներ են ծնվել, մեկ տարի չանցած, տղան Աննային ամուսնության առաջարկ է արել։
Աննան ավանդական դաստիարակություն է ստացել. նա չի ծխում, չի խմում և մինչև հարսանիքը ընկերոջ հետ ֆիզիկական մերձեցման չի գնացել։ Մի խոսքով` բարեկիրթ ընտանիքի զավակ։ Առանց երկար մտածելու`աղջիկն ընդունել է ամուսնության առաջարկը։ Հետո ամեն ինչ` ինչպես հոլիվուդյան ֆիլմում. հարսնացուն հարսանեկան զգեստ է ընտրում, պատրաստվում արարողությանը, հուզվում, գիտակցելով, որ շուտով կդառնա սիրված և սիրելի կին, իսկ հետո` մայր։
Ժլատություն և անտարբերություն
Հուզիչ օրը սկսված է, ամեն ինչ պատրաստ է, շուտով սկսվելու է կախարդանքը։ Բայց արի ու տես, որ ապագա ամուսնու ծնողները փչացրել են կարևոր այդ օրը` հրաժարվելով հարսանեկան խնջույքի ժամանակ վճարել իրենց հյուրերի համար։ Արդյունքում հարսնացուի հայրն ամբողջ ծախսը վերցրել է իր վրա։
Սակայն դրանով ամեն ինչ չի ավարտվել։ Հարսնացուի նվերները, մեղմ ասած, համեստ են եղել։ Սակայն Աննան որոշել է ուշադրություն չդարձնել նման մանրուքների վրա։ Ի վերջո, կողքին սիրելի ամուսինն է։
Ամուսինը սկզբում շատ լավ է վերաբերվել նրան, նվերներ արել, նրբանկատ և ուշադիր եղել։ Երբ տանը հերթական անգամ սկանդալ է ծագել, ամուսինը հայտարարել է, որ «իրեն ստիպել են ամուսնանալ Աննայի հետ», իսկ նա պարզապես ուզում էր «ժամանակ անցկացնել»։
Մեքսիկական սերիալ` հայկական ձևով
Աննան, կարծես, հայտնվել է տնային կալանքի մեջ։ Երեք տարի առաջ նա կենսուրախ, ժպտերես մարդ էր։ Այսօր նրան դժվար է ճանաչել. մշտական սթրեսների հետևանքով աչքերի տակ կապույտ պարկեր են առաջացել։
Աննային արգելում են շպարվել, ներկել մազերը։ Նա շփվում է միայն ամուսնու հարազատների հետ, որոնք մշտապես ծաղրում են նրան, անհարգալից վերաբերվում։ Աննան հույս է փայփայել, որ գոնե սկեսուրը կհասկանա իրեն, բայց այստեղ էլ է բախվել անտարբերության պատին։ Հանուն երեխայի` իր կյանքի միակ իմաստի, նա հանդուրժել է այս ամենը։
Հայաստանում գործում են կանանց իրավունքների պաշտպանությամբ զբաղվող հատուկ կառույցներ, բայց Աննան և նրա նման շատերը վախենում են դիմել այդ կազմակերպություններին։ Նրանք վախենում են հասարակության պախարակումից, վախենում են, որ հարազատները չեն հասկանա իրենց, չեն ընդունի։ Եվ ամենաշատը վախենում են ամուսնու արձագանքից. նա կարող է վնաս պատճառել կնոջը, երեխային և նույնիսկ` կնոջ հայրական ընտանիքին։
360 նոր դեպք, 2 մահ` մեկ օրում. կորոնավիրուսային հիվանդության ընթացքը Հայաստանում
(Թարմացված է 10:58 03.03.2021)
Հիվանդությունների վերահսկման և կանխարգելման ազգային կենտրոնը հրապարակել է Հայաստանում կորոնավիրուսային վարակի վերաբերյալ վերջին մեկ օրվա տվյալները:ԵՐԵՎԱՆ, 3 մարտի - Sputnik. Հայաստանում կորոնավիրուսով վարակվածների թիվը վերջին մեկ օրում ավելացել է 360–ով և դարձել 172816։ Տեղեկությունը հայտնում է Հիվանդությունների վերահսկման և կանխարգելման ազգային կենտրոնը։
Այս պահին փաստացի բուժում է ստանում 4889 մարդ (+189), կատարվել է 739116 (+2526) թեստավորում, առողջացել են վարակվածներից 163906-ը (+168)։ Գրանցվել է մահվան 3202 դեպք (+2)։ Կորոնավիրուսով վարակված, բայց այլ պատճառով մահացածների թիվը վերջին մեկ օրում ավելացել է 1-ով և հասել 819-ի։
©
Sputnik / Валерий Мельников
Հիշեցնենք` 2020թ.–ի մարտի 16–ից Հայաստանում արտակարգ դրություն էր սահմանված, որը մի քանի անգամ երկարաձգվեց և տևեց մինչև սեպտեմբերի 11–ը։ Երկարաձգված արտակարգ դրության պայմանները որոշակի փոփոխությունների ենթարկվեցին։
Տնտեսական շատ գործունեություններ թույլատրվեցին, բայց սահմանվեցին պարտադիր պահանջներ։
Հանրային բաց տարածքներում դիմակ դնելը պարտադիր էր։ Դիմակ կարող էին չդնել միայն մինչև 6 տարեկան երեխաները, հեծանիվ վարողները, ֆիզիկական վարժություններ անողները և խրոնիկ շնչառական հիվանդություններ ու սրտային անբավարարություն ունեցողները։
2020թ.–ի սեպտեմբերի 11–ին ՀՀ կառավարությունը որոշեց, որ երկրում սեպտեմբերի 12–ից մինչև 2021թ.–ի հունվարի 11–ը կգործի կարանտինի ռեժիմ։ Որոշ սահմանափակումներ մեղմացվեցին, բայց հասարակական վայրերում դիմակ դնելու պահանջը շարունակեց գործել։
Գիտնականներն ասել են, թե մարդկությունը քանի տարի է կորցրել կորոնավիրուսի պատճառով
Հաշվի առնելով կորոնավիրուսի 3–րդ ալիքի գոյությունն աշխարհում և այն փաստը, որ Հայաստանում վարակակիրների թիվը շարունակում է բարձր մնալ` 2021թ.–ի հունվարի 11–ին ՀՀ կառավարությունը որոշեց երկրում կարանտինային ռեժիմը երկարաձգել ևս 6 ամսով։ Այն կտևի մինչև 2021թ.–ի հուլիսի 11–ը։
Ջերմուկում ձյուն է գալիս, Սյունիքի ճանապարհները տեղ–տեղ պատվել են մերկասառույցով
(Թարմացված է 09:34 03.03.2021)
Ի՞նչ է կատարվում Հայաստանի ճանապարհներին, ո՞ր հատվածներն են փակ։ ՀՀ արտակարգ իրավիճակների նախարարությունը թարմ տեղեկություն է հայտնում և վարորդներին հիշեցնում, որ պետք է երթևեկել ձմեռային անվադողերով։ԵՐԵՎԱՆ, 3 մարտի – Sputnik. ՀՀ արտակարգ իրավիճակների նախարարությունը տեղեկացնում է, որ ՀՀ տարածքում կան փակ ավտոճանապարհներ։
Փակ են Արագածոտնի մարզում «Ամբերդ» բարձր լեռնային օդերևութաբանական կայանից դեպի Ամբերդ ամրոց և դեպի Քարի լիճ տանող ավտոճանապարհները:
Վարդենյաց լեռնանցքը փակ է կցորդիչով բեռնատարների համար:
Վանաձոր-Դիլիջան ավտոճանապարհին և Սյունիքի մարզի ավտոճանապարհներին տեղ-տեղ առկա է մերկասառույց։
Վայոց Ձորի մարզի Ջերմուկ քաղաքում ձյուն է գալիս։
Ստեփանակերտի օդանավակայանն ու Ալիևի ավիացիոն պլանները. իրավիճա՞կ է փոխվել
Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսեթիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար․ ռուսական կողմում կա մոտ 500 կուտակված բեռնատար ավտոմեքենա:
Վարորդներին խորհուրդ է տրվում երթևեկել բացառապես ձմեռային անվադողերով։
Արմավիրի մարզում ճակատ–ճակատի բախվել են Opel Astra–ներ. վիրավորների մեջ երեխաներ կան
Ինչու է աղմկում գետը. ԱԺ-ում թեժ քննարկում ծավալվեց ԲԴԽ նախագահի հետ հարցուպատասխանի ձևով
ԵՐԵՎԱՆ, 3 մարտի - Sputnik. Բարձրագույն դատական խորհրդի նախագահ Ռուբեն Վարդազարյանն այսօր խորհրդարանում ներկայացնելու է Վճռաբեկ դատարանի դատավորների թեկնածուներին:
Բայց մինչ պատգամավորները կսկսեին թեկնածուներին հարցեր տալ նրանց ապագա գործունեության մասին, օգտվելով առիթից` սկսեցին իրենց հետաքրքրող հարցերի պատասխանները պահանջել Վարդազարյանից:
©
Sputnik / Asatur Yesayants
«Իմ քայլը» խմբակցության պատգամավորներից Արթուր Հովհաննիսյանը հիշեց ԲԴԽ նախագահի՝ 2020 թ-ի նոյեմբերի 15-ի հայտարարությունը և փորձեց ճշտել՝ արդյո՞ք այն քաղաքական չէր՝ հիշեցնելով, որ այդ օրը պետք է տեղի ունենար ԱԱԾ նախկին տնօրեն ու Վարդազարյանի վաղեմի ընկեր Արթուր Վանեցյանի կալանքի հարցով դատական նիստը:
ԲԴԽ նախագահը հիշեցրեց, որ իր ղեկավարած կառույցը հաշվետու չէ ԱԺ-ին ու հավելեց. «Հետևաբար ես պարտավոր չեմ պատասխանել քաղաքական բնույթի հարցերի: Պատրաստ եմ պատասխանել բոլոր այն հարցերին, որոնք վերաբերում են այն թեկնածուներին, որոնց ներկայացնելու համար ես այսօր ներկայացել եմ»:
ԱԺ նիստը վարող փոխնախագահ Ալեն Սիմոնյանը ԲԴԽ նախագահին կոչ արեց պատասխանել հարցերին:
«Կարող եք ընդհանրապես չպատասխանել, և մենք ու քաղաքացիները մեր հետևություններ կանենք, բայց ես կոչ եմ անում այնուամենայնիվ պատասխանել»,- ասաց նա:
ԲԴԽ նախագահին ուղղված հարցերի տարափից զայրացած անկախ պատգամավոր Գևորգ Պետրոսյանն էլ տեղից հարց ուղղեց Վարդազարյանին. «Ինչո՞ւ է աղմկում գետը»:
Ալեն Սիմոնյանը խնդրեց տեղից չմիջամտել. «Պարոն Պետրոսյան, ես ձեր հարցերի խորությունը մշտապես նկատել եմ, բայց ձեր գետի հետ կապված խնդրում եմ տեղից չխոսել»:
«Իմ քայլի» պատգամավոր Արեն Մկրտչյանն էլ հարց ուղղեց ԲԴԽ նախագահին. «Դուք գիտե՞ք` որտեղ եք գտնվում»:
Վարդազարյանն էլ հայտնեց, որ որևէ կանոն չի խախտել ու նշեց դատավորների գործունեության ու վարքագծի կանոնները սահմանող մի շարք օրենքների հոդվածներ:
«Այդ վարքագծի կանոններից ելնելով՝ ես ունեմ զսպվածության սահման, և այդ զսպվածության սահմանը որևէ կերպ չեմ անցնելու, որքան էլ ինձ փորձեք դրդել դեպի քաղաքական քննարկում»,- ասաց ԲԴԽ նախագահը:
Նշենք, որ Բարձրագույն դատական խորհուրդը Վճռաբեկ դատարանի քաղաքացիական և վարչական պալատի դատավորի թափուր տեղի համար առաջադրել է Սամվել Գրիգորյանի, Արմեն Հայկյանցի և Արսեն Մկրտչյանի թեկնածությունները, որոնք նախատեսվում է քննարկել ընթացող քառօրյա նիստերի օրակարգում: