ԵՐԵՎԱՆ, 18 նոյեմբերի — Sputnik. «Հայաստան» համահայկական հիմնադրամի Հունաստանի տեղական մարմինը նոյեմբերի 19-ին կսկսի իր 6-րդ դրամահավաք-հեռախոսամարաթոնը, այս մասին հայտնում են հիմնադրամից:
Երկօրյա դրամահավաքի ընթացքում կամավորները հեռախոսազանգերով կկապվեն համայնքի շուրջ 1600 ընտանիքների հետ՝ հորդորելով նվիրատվություններ կատարել, ինչն այս տարի ևս կուղղվի ԼՂՀ Քարին Տակ համայնքի մանկապարտեզի կառուցման համաֆինանսավորմանը:
«Հունահայ փոքր համայնքի համար դժվար է մեծ ծրագրեր իրականացնել, բայց արդեն կա այլ տեղական մարմինների հետ համատեղ ձեռնարկների իրականացման փորձ, ինչը նաև միաբանության գեղեցիկ խորհրդանիշ է: Այսկերպ կառուցվել է նաև Խաչմաչի համայնքային կենտրոնը»,- ասել է հիմնադրամի Հունաստանի տեղական մարմնի ատենապետ Վաչե Տեր-Կարապետյանը։
Նա հույս է հայտնել, որ եթե այս տարվա դրամահավաքը գերազանցի ակնկալվող թիվը, ապա ևս մեկ ծրագիր կստանձնեն:
Հեռախոսամարաթոնի, ինչպես նաև ընթացիկ տարվա մյուս բոլոր դրամահավաք միջոցառումների արդյունքները կհրապարակվեն տարվա գլխավոր դրամահավաքի օրը՝ նոյեմբերի 24-ին` Հեռուստամարաթոն 2016-ի ուղիղ եթերում:
Հունաստանի տեղական մարմինը հեռախոսամարաթոններ է իրականացնում սկսած 2010թ-ից: Կիրառելով Ֆրանսիայում կազմակերպվող համաեվրոպական հեռախոսամարաթոնի փորձն ու մշակույթը՝ հունահայ համայնքն արդեն ավելի քան 140 000 եվրոյի ներդրում է կատարել հայրենիքում:
