Озеро Севан

Լողաշրջանը փակվեց. 6 զոհ, 21 փրկված

27
(Թարմացված է 15:47 13.09.2016)
Ջրահեղձման դեպքերի շուրջ 50 տոկոսը տեղի է ունենում ալկոհոլի օգտագործման հետևանքով: Այս մասին այսօր Sputnik Արմենիա մամուլի կենտրոնում կայացած մամուլի ասուլիսի ընթացքում ասաց ԱԻՆ փրկարար ծառայության ներկայացուցիչը:

ԵՐԵՎԱՆ, 13 սեպտեմբերի — Sputnik. «2016թ-ին գրանցվել է ջրահեղձման 6 դեպք, ևս 21 անձի կյանք հաջողվել է փրկել»,-լրագրողներին հայտնեց ՀՀ ԱԻՆ փրկարար ծառայության Գեղարքունիքի մարզային փրկարարական վարչության հատուկ ջրափրկարարական ջոկատի հրամանատար, փրկարար ծառայության կապիտան Արմեն Ճզմաչյանը: Ի դեպ, ջրահեղձման 6 դեպքից 3-ը տեղի է ունեցել Սևանա լճում, 3-ը` հանրապետության ջրային այլ տարածքներում:

Սևանում ջրահեղձվածներից 2-ը ձկնորսներ են, 1-ը` 16 տարեկան պատանի: Վերջին դեպքը, փրկարար ծառայության աշխատակցի խոսքով, տեղի է ունեցել Վարդենիսի Կարճաղբյուր համայնքին հարակից տարածքում, Սևանի ափին, ընտանեկան խնջույքի ժամանակ:

«Երիտասարդն ընտանիքի անդամների հետ է եղել, հանգստանալիս: Ոչ ոք չի տեսել, թե ինչպես է նա խեղդվել: Ձկնորսական նավակով պատահաբար մի ձկնորս անցնելիս, նկատել է ջրի հատակին 2-2.5 մետր խորության վրա ընկած դին: Սուզվել, դուրս է բերել, նոր հետո ընտանիքի անդամներն իմացել են, որ այդ տղան ջրահեղձ է եղել»,- պատեց Արմեն Ճզմաչյանը՝ նշելով, որ տվյալ տարածքը փրկարար ծառայության կողմից չի սպասարկվում, իսկ դեպքի մասին 911 ծառայությունն ահազանգ չի ստացել:

Ի դեպ, այսօր հանրապետությունում պաշտոնապես հայտարարվել է լողասեզոնի ավարտը: Բայց սա չի նշանակում, որ փրկարարների աշխատանքն ավելի հանգիստ կլինի: Հակառակը՝ Արմեն Ճզմաչյանը վստահեցնում է, որ տարվա մնացած եղանակներին իրենց աշխատանքն ավելի լարված է, քան ամռանը:

Армен Чзмачян
© Sputnik/ Asatur Yesayants
Արմեն Ճզմաչյան

«Ջրահեղձման դեպքերի մեծ մասը տեղի են ունեցել ոչ լողասեզոնի ընթացքում՝ ձմռանը, աշնանը և գարնանը: Ձմռանը, բացի ստորջրյա որոնողական փրկարարական աշխատանքներից, պատահում են դեպքեր, երբ մառախուղի, սաստիկ քամու պատճառով ձկնորսները կորում են Սևանա լճի տարբեր հատվածներում: Հայտնաբերում ենք, դուրս ենք բերում ափ»,- ասաց նա:

Ձմռանը ջրափրկարարների աշխատանքին ավելանում են նաև եղանակային պայմաններով պայմանավորված ավտովթարները, որոնց հետևանքով ավտոմեքենաները դուրս գալով երթևեկելի գոտուց հայտնվում են այս կամ այն լճի, գետի մեջ:

ԱԻՆ փրկարար ծառայությունն այսօր ապահովված է հերթապահություն իրականացնող 6 մոտորանավակով, 21 մետր երկարությամբ 1 մեծ նավով, 911 ժամանակակից 1 փրկանավակով: Առաջիկայում ծառայությունը սպասում է նոր տեխնիկական ժամանակակից միջոցների, որից հետո Արմեն Ճզմաչյանի համոզմամբ` փրկարարների աշխատանքի արդյունավետությունն էլ ավելի կբարձրանա:

27