Մարզիկների հարազատները, բարեկամներն ու երկրպագուները «գրոհեցին» օդանավակայանը և սկսեցին րոպեներն ու վարկյանները հաշվել:
Մեկն իր հետը աղավնիներ էր բերել, որ բաց թողնի այն պահին, երբ մարզիկները ժամանեն, մեկ ուրիշն էլ անընդմեջ օլիմպիականների անուններն էր վանկարկում: Ոստիկաններն էլ փորձում էին հասարակական կարգը պահել ու հանգիստ բացատրում էին, որ պետք է տարածքն ազատ թողնել մեդալակիրների համար:
Հավաքվածները գոչում էին, ծափ տալիս, ժողովդրական երգեր երգում, երբ վերջապես վրա հասավ բաղձալի պահը: Օլիմպիական չեմպիոն, հունահռոմեական ոճի ըմբիշ Արթուր Ալեքսանյանը, արծաթե մեդալակիր Միհրան Հարությունյանը, ծանրամարտիկ Սիմոն Մարտիրոսյանն ու Գոռ Մինասյանը հասան Երևան: Հավաքվածները մի պահ անկառավարելի դարձան:
Բոլորը ճչում էին, հրմշտում և անտեսում ոստիկանների՝ տարածքն ազատ թողնելու հորդորները: Հենց այդ պահին էլ մարզիկների կողքին հայտնվեց ՀՀ վարչապետ Հովիկ Աբրահամյանը:
Օլիմպիական մրցանակակիրներին «զարդարեցին» դափնեպսակներով ու Հայաստանի ազգային օլիմպիական կոմիտեի մեդալներով: ՀԱՕԿ-ի նախագահ Գագիկ Ծառուկյանը ոսկե մեդալ հանձնեց Միհրան Հարությունյանին, որն Օլիմպիական խաղերում արծաթե մեդալ էր ստացել մրցավարական սխալ գնահատման պատճառով:
Դիմավորման բուռն ու հանդիսավոր արարողությունից հետո մարզիկները դուրս եկան օդանավակայանից, ու երկինքը բոցավառվեց գույնզգույն հրավառությունից: Քաղաքապետարանի տրամադրած երկհարկանի ավտոբուսը օրվա հերոսներին տարավ դեպի Հանրապետության հրապարակ: Երկրպագուների բանակն ու ԶԼՄ-ների ներկայացուցիչներն էլ՝ նրանց հետևից: Ամբողջ ճանապարհին մարզիկները ձեռքով էին անում մարդկանց, իսկ Միհրան Հարությունյանը օդային համբույրն էր ուղարկում բոլորին:
Վերջապես հասան հրապարակ: Փոքր-ինչ կանգնեցին ավտոբուսի երկրորդ հարկում, կրկին ողջունեցին մարդկանց ու ժպիտով շնորհակալություն հայտնեցին ջերմ ընդունելությյան համար: Արթուր Ալեքսանյանը մոտեցավ Միհրան Հարությունյանին, վերցրեց եռագույնն ու սկսեց թափահարել ոգևորված մարդկանց աղաղակների ներքո:
Սիմոն Մարտիրոսյանը մոտեցավ հարազատներին, մարդկանց մի մասը շարժվեց Սիմոնի կողմ՝ ողջագուրվելու, գրկելու ու շնորհավորելու համար, ու այդ թեժ պահին Sputnik Արմենիայի թղթակցին հաջողվեց մի քանի բառ «պոկել» մարզիկից: Մարտիրոսյանն ասաց, որ հրաշալի տրամադրություն ունի ու գոհ է ամեն ինչից:
Հետո Արթուր Ալեքսանյանը հեռացավ «անգլիական ձևով», իսկ Միհրան Հարությունյանը շարունակեց լողալ ժողովրդական սիրո ալիքներում: Նրան քաջալերում էին, վստահեցնում, որ իսկական չեմպիոնը հենց նա է, ու ընդհանուր տրամադրությունից երևում էր, որ մարդիկ պատրաստվում են մինչև լույս տոնել իրենց հերոսների վերադարձը:
