ԵՐԵՎԱՆ, 28 հուլիսի — Sputnik. Ռուսաստանի Դաշնության բժշկական գիտությունների ակադեմիայի Անհետաձգելի մանկական վիրաբուժության և վնասվածքաբանության գիտահետազոտական ինստիտուտի տնօրեն, Ազգային բժշկական պալատի նախագահ, անվանի մանկաբույժ, պրոֆեսոր Լեոնիդ Ռոշալը վրդովվել է այն փաստից, որ զինված խումբը բուժաշխատողների է պատանդ վերցրել։
«Շանթ» հեռուստաընկերությանը տված հարցազրույցում Ռոշալը հիշեցրել է 2002 թվականին Դուբրովկայում տեղի ունեցած ողբերգական դեպքերը, երբ «Նորդ Օստ» մյուզիքլի 916 հանդիսատես և դերասան էր պատանդ վերցվել: Նա նշեց, որ նույնիսկ այն ժամանակ բժիշկներին պատանդ չէին վերցնում, անձամբ իրեն մի քանի անգամ թույլատրել են ներս մտնել թատրոնի շենք, դեղորայք տանել, բուժօգնություն ցուցաբերել։
«Այն, որ հիմա գերի են վերցրել բժշկական բրիգադին՝ բժշկին, բուժակին և բուժքույրին, դուրս է պարկեշտության բոլոր սահմաններից: Չէ՞ որ բժիշկները մարտի դաշտում օգնում են ոչ միայն իրենց կողմնակիցներին, նրանք օգնում են նաև հակառակորդին, և այս դեպքում ես դիմում եմ նրանց, որոնք դիմել են այս քայլին՝ սա ձեզ ոչինչ չի տալու, ու շատ-շատերը երես կթեքեն ձեզանից: Ձեռք բարձրացնել սպիտակ խալաթի վրա և պատսպարվել սպիտակ խալաթի հետևում, դա ամենավերջին քայլն է»,- ասել է Ռոշալը:
Ռոշալը կոչ է արել անհապաղ բաց թողնել բժիշկներին, քանի որ դա անթույլատրելի է։
Հայտնի վիրաբույժը հիշեցրել է նաև, որ Հայաստանում վիրահատել է 1988 թվականի Սպիտակի երկրաշարժից տուժած երեխաներին, օգնել է հայ մանուկներին նաև ղարաբաղյան պատերազմի օրերին, մի շարք վիրահատություններ է իրականացրել։
«Հայաստանը տեսել եմ այն ժամանակ, երբ լավ ժամանակներ են եղել, Հայաստանի կողքին եմ եղել նաև դժվար օրերին»,- եզրափակել է նա:
Ոստիկանության պարեկապահակային գնդի տարածք ահազանգով մեկնած շտապօգնության բրիգադի անդամները «Սասնա ծռեր» խմբի անդամների կողմից պատանդ էին պահվել հուլիսի 26-ի լույս 27-ի գիշերը: Անձնակազմի 4 անդամներից մեկը՝ բուժակ Դավիթ Տոնոյանն այսօր լուսադեմին ազատ է արձակվել:
