Ծովափ

Արևայրուքն ու սոլյարին կարող են մաշկի չարորակ ուռուցքի պատճառ դառնալ

25
(Թարմացված է 14:19 09.06.2016)
Արևայրուքն ու սոլյարին կարող են մահաբեր հիվանդությունների պատճառ դառնալ։ Ծովափնյա հանգստի սեզոնին ընդառաջ հայ բժիշկները հիշեցնում են մելանոմայի առաջացման հիմնական պատճառի` ուլտրամանուշակագույն ճառագայթների մասին

ԵՐԵՎԱՆ, 9 հունիսի — Sputnik. Հայաստանի քաղաքացիները ծրագրում են իրենց ամառային արձակուրդը, բժիշկները պատրաստվում ու զգուշացնում են դրանց հնարավոր բացասական հետևանքների, մասնավորապես` մաշկի չարորակ ուռուցքի` մելանոմայի մասին։

Ուռուցքաբան Գրիգոր Բադալյանը խոստովանում է, որ ինքն էլ ծովափնյա հանգստի և արևի սիրահար է, բայց փորձում է չափը չանցնել։ Արևի ճառագայթներն ամենավտանգավորն են ցերեկվա ժամը 11։00-16։00-ն ընկած ժամանակահատվածում։

«Պետք է պաշտպանվել բոլորիս հայտնի մեթոդներով`գլխարկ, հագուստ, ակնոց և, իհարկե, հակաճառագայթային քսուքներ, որոնք մաշկը պաշտպանում են արևից»,- ասում է ուռուցքաբանը։

Григорий Бадалян
© Sputnik/ Asatur Yesayants
Գրիգոր Բադալյան

Աշխարհում վերջին տարիներին մելանոմայի կտրուկ աճ է արձանագրվել, հատկապես` սպիտակամաշկ բնակչություն ունեցող երկրներում։ Որոշ մասնագետներ դա կապում են նորաձևության մեջ արմատներ գցած սոլյարիի կամ արհեստական արևայրուքի հետ։

«Դա մոդայիկ երևույթ է արդեն նաև մեր երկրի համար։ Բայց կան ուսումնասիրություններ, որ արտասահմանում, որտեղ սոլյարին ավելի տարածված է, անհամեմատ ավելի շատացել են մելանոմայի դեպքերը։ Դա ուլտրամանուշակագույն ճառագայթ է, որը նպաստում է անգամ հասարակ խալի չարորակ դառնալուն»,- ասաց Մաշկավեներաբանների ասոցիացիայի նախագահ Կարեն Բաբայանը։

Карен Бабаян
© Sputnik/ Asatur Yesayants
Կարեն Բաբայան

Հայաստանում մելանոմայի տարեկան 50 դեպք է գրանցվում։ Այս ցուցանիշը կայուն է վերջին 5 տարվա ընթացքում։

Այդուհանդերձ, բժիշկները կարևորում են դրա կանխարգելումը։ Այդ նպատակով հունիսի 9-11-ը հայտարարվել են Մելանոմայի վաղ ախտորոշման ու կանխարգելման օրեր, որոնց շրջանակում բոլոր նրանց, ովքեր իրենց մաշկի վրա կասկածելի նորագոյացություններ են նկատել, ուռուցքաբանները հրավիրում են անվճար հետազոտության։

 

25