ԵՐԵՎԱՆ, 4 հունիսի — Sputnik. Մանկական գեղեցկության առաջին մրցույթները Հայաստանում անցկացվել են 90-ականների սկզբին` ամբողջ աշխարհին ցույց տալու, որ հայ երեխաներն ամենագեղեցիկն են, պատմեց Համաշխարհային գեղեցկության և նորաձևության լիգայի նախագահ Աշոտ Խաչատրյանը։
Նրա խոսքով` այն գեղեցկուհիները, ովքեր մասնակցել են առաջին մանկական մրցույթներին, այսօր արդեն միջազգային մրցույթերի են մասնակցում։
Մեծահասակների առաջին մրցույթը կազմակերպվել է 2005թ-ին։ Միջազգային «Միսս աշխարհ» և «Միսս տիեզերք» մրցույթներին Հայաստանը երբեք չի մասնակցել, բայց 2008 և 2009թթ-ին Հայաստանում կազմակերպվել է սեփական գեղեցկության և նորաձևության միջազգային մրցույթները` «Աշխարհի ֆոտոմոդել», «Միսս յոթ մայրցամաք», «Աշխարհի արքայադուստր»։
«Այսօր հայկական ծագում ունեցող այս մրցույթները աշխարհի ամենահեղինակավոր ու սիրված մրցույթ-փառատոներից են։ Միջազգային են հենց դրանով, որ մենք իրավունք ունենք տարբեր երկրներում անցկացնել»,- ասաց Խաչատրյանը` հավելելով, որ 2008 և 2009թթ-ին Հայաստանում անցկացված մրցույթներին հաջորդեցին արդեն աշխարհի տարբեր երկրներում կազմակերպվածները։
Նա չի թաքցնում, որ շատ դեպքերում գեղեցկության մրցույթների կազմակերպիչները «աղջիկներին դիտում են որպես ապրանք, որպես գումար հայթայթելու միջոց` մասնակցության վճար, լիցենզիայի գումարներ, հովանավորների համար ցուցադրություններ և այլն»։
«Պատկերացրեք` «Միսս Մոդել» համաշխարհային մրցույթում աղջիկներն արթնանում են առավոտյան 05։30-ին կամ քնում են միայն 1 ժամ` ավտոբուսի մեջ, կամ ամբողջ օրն անցկացնում են դահլիճում»,- ասում է նա ու ավելացնում, որ այդ ամենը տեսնելով` փորձել է բացառել այն ամենը, ինչ տհաճություն է պատճառում մրցույթի մասնակիցներին, դրա փոխարենը կազմակերպելով այցելություններ Հայաստանի գեղատեսիլ վայրեր։
Աշոտ Խաչատրյանը չթաքցրեց, որ գեղեցիկ աղջիկներով հաճախ հետաքրքրվում են նաև մարդկանց առևտրով զբաղվողները։
«Համացանցը, կայքերն այսօր մեծ հնարավորություն են տալիս թրաֆիքինգով զբաղվելու։ Դրա համար ես կոչ եմ անում բոլոր աղջիկներին` չգայթակղվել տարբեր առաջարկներով ու չվստահել ինտերնետային կայքերով հրավերներ ուղարկող մարդկանց»,- ասաց Խաչատրյանը։
Նա խորհուրդ տվեց որևէ մրցույթի հրավեր ստանալու դեպքում նախ հետաքրքրվել դրա պատմությամբ ու կազմակերպիչներով։
