ԵՐԵՎԱՆ, 1 ապրիլի - Sputnik. Ռուսաստանի կառավարության փոխնախագահ Ալեքսեյ Օվերչուկը Ադրբեջանի նախագահ Իլհամ Ալիևի հետ հանդիպման ժամանակ հայտնել է Լեռնային Ղարաբաղում իրավիճակի կարգավորման համար ստեղծված եռակողմ խմբի աշխատանքում առաջընթացի մասին: Տեղեկությունը հայտնում է ՌԻԱ Նովոստին՝ հղում անելով Ադրբեջանի նախագահի մամուլի ծառայությանը։
«Մենք հանդիպել ենք հինգ անգամ ինչպես անձնական շփման, այնպես էլ տեսակոնֆերանսների ռեժիմով։ Մենք իսկապես որոշակի առաջընթաց ունենք աշխատանքում ու սերտորեն համագործակցում ենք», - ասել է Ռուսաստանի փոխվարչապետը։
Օվերչուկն ասել է, որ ռուսական կողմի ներկայացուցիչները մշտական կապի մեջ են ինչպես հայ, այնպես էլ ադրբեջանցի գործընկերների հետ։ Նրա խոսքով՝ «իսկապես լավ կապ է ստեղծվել»։
Հիշեցնենք, որ հունվարի 11-ին Հայաստանի, Ռուսաստանի ու Ադրբեջանի առաջնորդներ Նիկոլ Փաշինյանի, Վլադիմիր Պուտինի ու Իլհամ Ալիևի բանակցություններից հետո հայտարարվել էր երեք երկրների փոխվարչապետների ղեկավարությամբ աշխատանքային խմբի ստեղծման մասին:
Ստեղծվել են նաև փորձագիտական ենթախմբեր՝ երկաթուղային, ավտոմոբիլային ու համակցված փոխադրումների գծով, փոխադրումների ապահովման հարցերով՝ ներառյալ անվտանգությունը, սահմանային, մաքսային, սանիտարական, անասնաբուժական, բուսասանիտարական ու հսկողության այլ տեսակները:
Եռակողմ հայտարարության իրականացման համար համալիր աշխատանք է սպասվում․ Զախարովա
