ԵՐԵՎԱՆ, 18 նոյեմբերի - Sputnik. Ռուսաստանի Դաշնային խորհուրդը նոյեմբերի 18-ին կքննարկի Ռուսաստանից դուրս ռուսական զինված ուժերի գործածման հարցը։ Տեղեկությունը հայտնում է ՌԻԱ Նովոստին։
«Ամենայն հավանականությամբ խոսքը վերաբերում է Լեռնային Ղարաբաղի մեր խաղաղապահներին», - ասել է սենատոր Վյաչեսլավ Տիմչենկոն։
Հարցը կքննարկվի նիստի հենց սկզբում:
«ՌԴ զինված ուժերի` Ռուսաստանի Դաշնության տարածքից դուրս օգտագործման մասին» նախագծի բանախոսները կլինեն Դաշնային խորհրդում Ռուսաստանի նախագահի լիազոր ներկայացուցիչ Արթուր Մուրավյովը, Պաշտպանության և անվտանգության հանձնաժողովի նախագահ Վիկտոր Բոնդարևը, միջազգային հարցերի հանձնաժողովի ղեկավար Կոնստանտին Կոսաչովը, սահմանադրական օրենսդրության և պետականաշինության հանձնաժողովի ղեկավար Անդրեյ Կլիշասը:
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Հայաստանի, Ադրբեջանի և Ռուսաստանի առաջնորդների եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորակազմ ՝ 1960-ական զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին: