ԵՐԵՎԱՆ, 2 հուլիսի - Sputnik. COVID-19–ով վարակվելու վտանգն ամռանը ցածր է, քանի որ վիրուսի ակտիվությունը նվազում է օդի բարձր ջերմաստիճանի պատճառով։ Այս մասին հայտարարել է բժշկական գիտությունների թեկնածու, ՌԴ առողջապահության նախարարության Գամալեայի անվան համաճարակաբանության և միկրոկենսաբանության դաշնային գիտահետազոտական կենտրոնի առաջատար գիտաշխատող Լյուդմիլա Ալիմբարովան։
Նրա խոսքով` կոնտակտային ճանապարհով, ինչպես նաև դռան բռնակներին, բազրիքներին և աստիճանավանդակներին հպվելու միջոցով կորոնավիրուսով վարակվելու հավանականությունն ամռանն ավելի քիչ է, քանի որ վիրուսի ակտիվությունը նվազում է:
«Որքան ավելի բարձր է ջերմաստիճանը դրսում, այնքան ավելի կարճ կյանք ունի վիրուսը մակերևույթների վրա։ Նույնիսկ եթե հիվանդ մարդը տարվա տաք եղանակին խոսում կամ հազում է, վիրուսի մասնիկները ավելի շուտ են չորանում և վարակվելու վտանգն էապես նվազում է», – նշել է փորձագետը։
Ինչով է պայմանավորված կորոնավիրուսի ագրեսիվ ընթացքը. նոր ուսումնասիրություն
Նա հայտնել է, որ ձմռանը վիրուսը կարող է ակտիվ լինել մինչև 3 օր, իսկ ամռանը դրա ակտիվությունը նվազում է մինչև մի քանի ժամ։ Ընդ որում՝ Ալիմբարովան ընդգծել է, որ կորոնավիրուսը միևնույն է վտանգավոր է, և խորհուրդ չի տվել հրաժարվել դիմակներից։
Սպորտը պետք է, բայց չափավոր
Մասնագետը պատմել է նաև, որ 1970–ականներից ուսումնասիրություններ են իրականացվում` ֆիզիկական ակտիվության դեպքում գրիպի վիրուսներով վարակվելու հավանականության վերաբերյալ։
Այդ ուսումնասիրությունների արդյունքները մեջբերելով` գիտաշխատողը հաստատել է, որ ֆիզիկական ծանրաբեռնվածության մակարդակն ազդում է մարդու դիմադրողականության վրա։
«Չափի մեջ կանոնավոր ֆիզիկական ծանրաբեռնվածությունը նվազեցնում է շնչառական վարակներով, այդ թվում՝ կորոնավիրուսով վարակվելու վտանգը։ Ֆիզիկական ծանրաբեռնվածության բացակայությունը կամ սպորտով խիստ տարվելը կարող են հակառակ արդյունքն ունենալ», – ընդգծել է նա։
Ըստ գիտնականի` նրանք, ովքեր չեն զբաղվում սպորտով և ակտիվ կյանք չեն վարում, ինչպես նաև նրանք, ովքեր չափից շատ են զբաղվում, կամ գերծանրաբեռնված են, ավելի շատ են հակված շնչառական հիվանդություններով վարակվելու։
Ռուսական պատվաստանյութը կորոնավիրուսից կպաշտպանի երկու տարի անընդմեջ
«Նույն մարզիկները և կանոնավոր ու չափավոր ծանրաբեռնվածությամբ սիրողական սպորտով զբաղվողներն ավելի հազվադեպ են վարակվում ռեսպիրատոր վարակով», – տեղեկացրել է փորձագետը։
Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ: Կազմակերպությունը բոլոր պետություններին կոչ է արել միավորվել վարակի դեմ պայքարում։
ԱՀԿ–ի վերջին տվյալներով` աշխարհում կորոնավիրուսով վարակվածների թիվը հատել է 10.5 մլն սահմանը, արձանագրվել է ավելի քան 503 հազար մահվան դեպք։
Ռուսաստանում սկսում են մարդկանց վրա փորձարկել COVID-19-ի դեմ պատվաստանյութը
