Անդրեյ Շանին. արխիվային լուսանկար

ՌԴ քաղաքացիները Հայաստանից հայրենիք են գնացել Վրաստանով. դեսպանատան մեկնաբանությունը

185
(Թարմացված է 00:03 25.03.2020)
Մի խումբ ՌԴ քաղաքացիներ Հայաստանում «արտակարգ դրության պատանդ» էին մնացել և փակված ճանապարհների պատճառով չէին կարողանում հայրենիք վերադառնալ։

ԵՐԵՎԱՆ, 24 մարտի – Sputnik. ՌԴ քաղաքացիները, ովքեր մնացել էին Հայաստանում, կկարողանան հայրենիք վերադառնալ ցամաքային ճանապարհով՝ Վրաստանով։ Sputnik Արմենիայի թղթակցի հետ զրույցում լուրը հայտնեց Հայաստանում Ռուսաստանի դեսպանատան հյուպատոսական բաժնի ղեկավար Անդրեյ Շանինը։

Մի խումբ ՌԴ քաղաքացիներ Հայաստանում էին գտնվում մի մասը գործնական, մի մասն էլ՝ զբոսաշրջային նպատակներով։ Երկրում Covid-19 կորոնավիրուսի հետ կապված իրավիճակով պայմանավորված՝ նրանք չէին կարողանում երկրից դուրս գալ։

«2020թ․-ի մարտի 24-ին, վրացական կողմի հետ համաձայնեցված կարգով, Հայաստանից մեկնել է Ռուսաստանի 24 քաղաքացիներից բաղկացած առաջին խումբը»,-ասել է Շանինը։

Նա նշել է, որ այդ մարդիկ ստիպված էին երկրում մնալ Հայաստանում հաստատված արտակարգ դրության սահմանափակումների պատճառով։ Ընդ որում՝ դեսպանատունը նրանց դուրսբերման մի քանի տարբերակ էր մշակել։

Նրանց խորհուրդ էր տրվել լքել Հայաստանը օդային ճանապարհով, սակայն քաղաքացիների մի մասը չէր կարող օգտվել այդ առաջարկից, քանի որ Հայաստան էր եկել անձնական ավտոմեքենայով։

«Քաղաքացիների այդ խմբի հետ ծավալուն աշխատանք է տարվել, որի արդյունքում դեսպանատան աջակցությամբ նրանք վարձակալել են վրացական կողմի պահանջներում նշված հատուկ փոխադրամիջոց։ Խոսքը մեքենատարների մասին է»,-ասել է Շանինը։

Հայաստանը դադարեցնում է ցամաքային և օդային հաղորդակցությունը Ռուսաստանի հետ

Անձնական տրանսպորտային միջոցները բեռնվել են մեքենատարներ, իսկ իրենք՝ ուղևորները, տեղավորվել են միկրոավտոբուսներում։ Շանինը նշել է, որ այդ համակարգով իրականացվում է վերահսկվող անցումը Վրաստանի տարածքով՝ վրացական ոստիկանության ուղեկցությամբ։ Նա նշեց, որ այս պահին մեկնած քաղաքացիները մոտենում են Վերին Լարսի հսկիչ անցակետին։

Ավելի վաղ Վրաստանի և Ռուսաստանի հետ համաձայնության արդյունքում հաջողվել էր Հայաստան վերադարձնել ռուսական կողմում փակված 140 ՀՀ քաղաքացիների։

Հիշեցնենք, որ կորոնավիրուսի տարածման վտանգի պատճառով մարտի 16-ին Ռուսաստանն ու Վրաստանը ժամանակավորապես փակել են սահմանները քաղաքացիների տեղաշարժի համար։ Նույն պատճառով արգելվել է բոլոր օտարերկրացիների մուտքը Վրաստանի տարածք։

Ռուսաստանը սկսել է կորոնավիրուսի դեմ պատվաստանյութ փորձարկել

185
թեգերը:
կորոնավիրուս, դեսպանություն, դեսպանատուն, Վրաստանի Հանրապետություն, Հայաստան, Ռուսաստան
թեմա:
Կորոնավիրուսը Հայաստանում (239)
Ըստ թեմայի
Վրաստանն էլ է արտակարգ դրության ռեժիմի անցնում
Վրաստանից Հայաստան տեղափոխվածները կլինեն հսկողության տակ
Հայաստանից Վրաստան և հակառակ ուղղությամբ սահմանը կարելի է հատել միայն Սադախլոյով