ԵՐԵՎԱՆ, 6 հունիսի — Sputnik. Մոսկվայում երկու ներկայացուցչություն ունենալը կարևոր է։ Այս մասին այսօր ԱԺ–ում ասաց ՀՀ ԱԳՆ Զոհրաբ Մնացականյանը` պատասխանելով «Լուսավոր Հայաստան» խմբակցության պատգամավոր Արման Բաբաջանյանի հարցին, թե որքանով է նպատակահարմար Մոսկվայում երկու դիվանագիտական ներկայացուցչություն ունենալը և արդյոք դրանց պահպանման համար ահռելի ծախսեր չե՞ն պահանջվում։
Ի պատասխան Մնացականյանը նկատեց, որ Մոսկվան ՀՀ-ի համար կարևոր կենտրոն է։
«Այո՛, երկու ներկայացուցչություն ունենալը կարևորություն է, որը ներկայացնում է ՀՀ-ն ՀԱՊԿ-ում և ներկայացուցչությունը, որն իրականացնում է երկկողմ գործառույթ, այսինքն՝ դեսպանատունը։ Լինելու է և մնալու է երկու առանձին ներկայացուցչություն, և սա մենք չենք քննարկում»,–ասաց Մնացականյանը։
Բաբաջանյանը նաև հետաքրքրվեց, թե այն դիվանագետները, որոնք ծառայել են նախորդ ռեժիմին, ինչպե՞ս են իրենց գործունեությունը շարունակում նոր իրողությունների պայմաններում։
«Եկեք դիվանագետների հետ կապված հարցը հստակ դնենք, ձեզ համար ավելի շատ ցավալի չլինի, քան իմ համար է, որովհետև իմ տան մասին է խոսքը և ես պատասխանատու եմ ամբողջ համակարգի և այնպիսի որոշումների համար, որոնք պահպանում են ծառայության համապարփակությունը», - ասաց ՀՀ ԱԳ նախարար Զոհրաբ Մնացականյանը։
Նախարարը նշեց, որ ԱԳՆ-ն ունի կարող անձնակազմ, որն իրականացնում է դեսպանի գործառույթներ և ապահովում ծառայության կայունությունը։
