ԵՐԵՎԱՆ, 27 ապրիլի — Sputnik. Նա չի քնում, նա աշխատում է. չէ՞ որ նա Պուտինն է։ ՌԴ նախագահի մամուլի խոսնակ Դմիտրի Պեսկովը կեսլուրջ– կեսկատակ այսպես է արձագանքել լրագրողների հարցին, թե ինչպես է Պուտինն ամեն ինչ հասցնում ու երբ է քնում։
Երկու օր առաջ Պուտինը Չիտայից մեկնել է Վլադիվոստոկ, որտեղ առաջին անգամ բանակցություններ է անցկացրել Հյուսիսային Կորեայի ղեկավար Կիմ Չեն Ինի հետ։ Ապա 2-օրյա այցով մեկնել է Չինաստան՝ «Մեկ գոտի, մեկ ճանապարհ» միջազգային համաժողովին մասնակցելու:
Մեկնաբանելով ՌԴ նախագահի այցը Չինաստան` Պեսկովն այն շատ արդյունավետ է գնահատել` նշելով, որ բացի օրակարգային հանդիպումներից, Պուտինն առիթն օգտագործում է համաժողովի մասնակից այլ երկրների ղեկավարների հետ շփվելու համար։
Ի թիվս այլ հանդիպումների, Պուտինը Չինաստանում հանդիպել է նաև Ադրբեջանի նախագահ Իլհամ Ալիևի հետ։ Պաշտոնական տեղեկատվության համաձայն` հանդիպման ընթացքում քննարկվել էր նաև Ղարաբաղյան հակամարտության կարգավորման հարցը:
