Իրկուտսկ

Հայաստանը մոտ ապագայում Իրկուտսկում հյուպատոսություն կբացի

25
(Թարմացված է 14:39 01.03.2019)
Հայաստանն ու Իրկուտսկի շրջանը կարող են միմյանց հետաքրքիր լինել զբոսաշրջային ուղղությունների համատեղ զարգացման առումով։

ԵՐԵՎԱՆ, 1 մարտի — Sputnik. Հայաստանը մտադիր է մոտ ապագայում Իրկուտսկում պատվավոր հյուպատոսություն բացել։ Այս մասին Ռուսաստանում Հայաստանի դեսպան Վարդան Տողանյանը հայտնել Իրկուտսկի մարզպետ Սերգեյ Լևչենկոյի հետ հանդիպման ժամանակ։

Ինչպես նշում է դեսպանատան մամուլի ծառայությունը, հյուպատոսությունը փոխգործակցություն է ապահովելու հարևան մարզերի հետ։

«Անհրաժեշտ է զարգացնել մեր կապերը, առավել ևս, որ մեր երկու երկրների միջև առկա դաշնակցային և ռազմավարական գործընկերությունը հնարավորություն է ընձեռում ավելի ակտիվ ներգրավվել տնտեսական տիրույթում։ Մենք տրամադրված ենք աշխատելու մեր ընդհանուր շահերի զարգացման ուղղությամբ», – ասել է Տողանյանը։

Մարզպետն իր հերթին ընդգծել է, որ 2018 թվականի նախնական տվյալների համաձայն, Իրկուտսկի շրջանի և Հայաստանի միջև առևտրի ծավալը 500 հազար դոլար է կազմել։

«Հայաստանի հանրապետությունն ու Իրկուտսկի շրջանը կարող են մտերիմ և հետաքրքիր լինել միմյանց զբոսաշրջային ուղղությունների համատեղ զարգացման հարցում», – նշել է Սերգեյ Լևչենկոն։

Կողմերը նաև նշել են, որ տրամադրված են երկկողմ փոխգործակցության ուժեղացմանը, առևտրի ծավալների, ներդրումների աճի համար պայմաններ ստեղծելուն, ինչպես նաև մշակութային կապերը ընդլայնելուն։

Մարզպետը Հայաստանից ուսանողների էր հրավիրել մասնակցելու Իրկուտսկի շրջանում ամեն տարի անցկացվող «Բայկալ» միջազգային երիտասարդական ճամբարին։

Մարզպետի հետ զրույցի ընթացքում դեսպան Տողանյանը քննարկել է նաև հայկական եկեղեցի կառուցելու համար Իրկուտսկի մարզում հող հատկացնելու հնարավորությունը։

Երկու կողմերի համար հետաքրքրություն ներկայացնող ևս մեկ ուղղություն է քննարկվել` համատեղ ցուցահանդես–վաճառքների և իմիջային միջոցառումների անցկացումը։

25
թեգերը:
Վարդան Տողանյան, Ռուսաստան, Հայաստան