ԵՐԵՎԱՆ, 22 փետրվարի — Sputnik, Արմենուհի Մխոյան. Այսօր՝ փետրվարի 22-ին Գյումրու «Արագած» մարզամշակութային կենտրոնում «Հայրենիքի պաշտպանի» օրը նշեցին Հայաստանում ծառայող ռուսաստանցի զինվորականները:
ՌԴ ԶՈւ հարավային ռազմական օկրուգի ռազմական բազայի կազմակերպած տոնական միջոցառմանը ներկա էին նաև սահմանապահ ջոկատի և Գյումրու կայազորի զինվորները:
Շնորհավորական ուղերձով հանդես եկավ Հայաստանում 102-րդ ռազմական բազայի հրամանատար գնդապետ Վլադիմիր Ելկանովը:
«Ամեն տարի փետրվարի 23-ին ՌԴ-ում նշվում է Հայրենիքի պաշտպանի օրը: Այս օրը մեծարվում են Մեծ Հայրենականի վետերանները: Պատերազմ, որի հաղթական ակունքներում նաև հայերն են, ովքեր ցույց տվեցին հոգու արիությունն ու զինվորական կամքը: Այս օրը ոչ միայն մեծարվում են վետերանները, այլ նաև նրանք, ովքեր այս պահին ծառայում են բանակում: Օրը վաղուց արդեն ամենահարգված տոների շարքում է: Ես շնորհավորում եմ բոլոր նրանց, ում համար հայրենիքի պաշտպանությունը ոչ միայն պարտք է, այլ կյանքի նպատակ: Շնորհավորում եմ նաև Միացյալ խմբավորման զորքերի զինվորներին, ովքեր պատվով են շարունակում իրենց պապերի հաղթական ուղին »,-շնորհավորելով բոլորին տոնի առթիվ նշեց 102-րդ ռազմական բազայի հրամանատար գնդապետ Վլադիմիր Ելկանովը:
Օրվա ընթացքում բազմաթիվ մաղթանքներ ու ցանկություններ հնչեցին, սակայն հիմնականը մեկն էր՝ խաղաղություն ու կայունություն: «Շնորհավորում եմ Հայրենիքի պաշտպանի օրը, շնորհավորում եմ բոլոր նրանց, ովքեր գիտեն ինչ է զինվորական ծառայությունն ու նվիրված են այդ գործին մինչև վերջ: Մեզանից յուրաքանչյուրը յուրովի է պարտական իր հայրենիքի նկատմամբ, իսկ այդ պարտականությունն ավելի ուժեղ է նրանց մոտ ովքեր կրում են զինվորական համազգեստ: Հայրենիքի պաշտպանի օրը մենք ակամա նաև անդրադառնում ենք այն մարդկանց, ում շնորհիվ մենք ու սերունդներն ունեն խաղաղ երկինք: Շնորհավորում եմ ինչպես վետերաններին, այնպես էլ բոլոր նրանց, ովքեր հիմա զինվորական ծառայության մեջ են»,- նշեց Շիրակի մարզպետ Տիգրան Պետրոսյանը:
Տոնի առթիվ Հայաստանում ծառայության մեջ գտնվող ռուս զինվորականներին շնորհավորական ուղերձներ էին հղել նաև ՀՀ պաշտպանության նախարարության բարձրաստիճան պաշտոնյաները, ինչպես նաև հայ-ռուսական Միացյալ խմբավորման զորքերի հրամանատար գեներալ-մայոր Տիգրան Փարվանյանը:
