ԵՐԵՎԱՆ, 12 փետրվարի — Sputnik. Հայտնի ռեփեր Տիմատին Instagram–ում դիջեյ Անդրեյ Շիրմանի (DJ Smash) մասնակցությամբ տեսագրություն է հրապարակել, որում պատմում է դիջեյին հասցված վնասվածքների մասին։
Ինչպես պնդում է Տիմատին, DJ Smash–ին դաժանաբար ծեծել են Պերմի գիշերային ակումբներից մեկում, և նա հիվանդանոց է տեղափոխվել է ծնոտի ծանր կոտրվածքով։ Տիմատին հրապարակմանը կից արված մակագրության մեջ Պերմի երկրամասի նախկին պատգամավոր Ալեքսանդր Տելեպնևին (որը նաև ձեռնամարտի սպորտի վարպետ է) մեղադրել է իր ոչ սթափ վիճակում գտնվող «վախկոտ ընկերոջը»` Շիրմանին, ծեծելու մեջ (պատգամավորը կոտրել է նրա ծնոտը, հասցրել գանգուղեղային վնասվածքներ, հարվածել ոտքերով)։ Տիմատիի խոսքով` ծեծկռտուքի պատճառը պատգամավորի հետ սելֆի անելուց հրաժարվելն է եղել։
«Գետնին է տապալել նրան, իսկ նա ոչ միայն կռվել չգիտի, այլև դիջեյի պայուսակից ծանր ոչինչ չի բռնել երբևէ, հետո էլ երկու հոգո ոտքերով հարվածել են նրան», – գրել է Տիմատին` գրառումը համեմելով պատգամավորի հասցեին թունդ հայհոյանքներով։
Տիմատիի խոսքով` նա այդ ամենը հանրայնացնում է, որպեսզի DJ Smash–ի գովերգած Պերմի բնակիչները իմանան, թե ինչ «վատ մարդ» է ապրում իրենց քաղաքում (Տիմատին, մեղմ ասած, այլ կերպ է արտահայտվել, բայց գեղագիտական նկատառումներից ելնելով` Sputnik Արմենիայի խմբագրությունը շտկումներ է կատարել)։
Նա հույս է հայտնել, որ Պերմի երկրամասի նահանգապետն իրավապահ մարմիններին կհանձնարարի զբաղվել այս հարցով։
«Ափսոսում եմ, որ այդ գիշեր ես այնտեղ չեմ եղել։ Բայց ոչինչ, աշխարհը կլոր է, ամեն ինչ վերադառնում է ի շրջանս յուր, հաջորդ անգամ և դու` պատգամավոր, կարող ես հայտնվել նման վատ իրավիճակում», – գրել է Տիմատին։
Տելեպնևն արձագանքել է Facebook–ում։ Նա սելֆի է հրապարակել Շիրմանի հետ` հայտարարելով, թե իր հասցեին մեղադրանքները սուտ են։
«Օրերս այցելեցի «Մշակույթի տուն» ակումբ, որտեղ հանդիպեցի հայտնի դիջեյ Սմեշին, շատ լավ եմ վերաբերվում նրան, ուստի նրս հետ մի քանի սելֆի արեցի։ Այսօր իմացա, որ իմ մասին ԶԼՄ–ներում վարկաբեկող տեղեկություն է հայտնվել, այդ ամենը սուտ է», – գրել է Տելեպնևը։
