ԵՐԵՎԱՆ, 16 հունվարի — Sputnik. Ռոստովցի հայ բլոգեր Վադիմ Մանուկյանն առաջարկում է ռուս մարզիկներին Պհենչհանի օլիմպիադայում ելույթ ունենալ ԽՍՀՄ խորհրդանիշների համազգեստով։ Այս մասին գրում է DonDay.ru պարբերականը։
Ակտիվիստին զայրացրել է, որ օլիմպիադայում ռուս մարզիկներին արգելել են Ռուսաստանի խորհրդանիշներով համազգեստ կրել, բայց նա ելք է գտել։ Հայը նույնիսկ համապատասխան հանրագիր է կազմել նախաձեռնությունների հայտնի կայքում։
«Մենք կարող ենք ցույց տալ, որ Ռուսաստանը ԽՍՀՄ իսկական իրավահաջորդն է և դրանով վստահություն փոխանցենք մարզիկներին։ Թող ցույց տան իրենց, հիշեն, որ Ռուսաստանն ուժեղ է իր ավանդույթներով, չի կոտրվում և չի հանձնվում առանց մարտի», — նշել է Մանուկյանը։
Նրա խոսքով` ԽՍՀՄ զինանշանը ոչ ոք չի արգելել, ուստի ԽՍՀՄ համազգեստով հանդես գալը հիանալի այլընտրանք կդառնա ռուսների համար։ Վադիմը նշել է, որ ԽՍՀՄ-ը շատ հարգված է ամբողջ աշխարհում, և կրելով ԽՍՀՄ խորհրդանիշներով համազգեստ` Ռուսաստանը կարող է ներկայանալ որպես արժանի իրավահաջորդ։
«Եթե ԽՍՀՄ գրությամբ խորհրդանիշները ոգեշնչել են մարզիկներին հաղթանակների, ապա ինչո՞ւ այսօրվա բարդ իրավիճակում չփորձենք օգտագործել մեր օգտին։ Դա ավելի լավ է, քան առանց տարբերակող նշանների ելույթ ունենալը», — նշել է բլոգերը։
Մանուկյանը նաև հիշել է` ինչ հաճույքով էին մարդիկ կինո գնում` խորհրդային բասկետբոլիստների հաղթարշավը դիտելու։ Այդ ժամանակաշրջանի մասին ֆիլմերը միշտ էլ բազմաթիվ հեռուստադիտողների են հավաքում հեռուստացույցների էկրանների մոտ, իսկ արտասահմանցիները մեծ հաճույքով գնում և կրում են ԽՍՀՄ խորհրդանիշներով հագուստը։
Մի քանի ժամվա ընթացքում նրա հանրագիրն ավելի քան 2,5 հազար ստորագրություն է հավաքել։
