ԵՐԵՎԱՆ, 9 սեպտեմբերի — Sputnik. Ազամատ Կուդզաևի որդու ընտանիքում տեղի ունեցած ողբերգությունից հետո մարդիկ ծաղիկներ ու փափուկ խաղալիքներ են տանում շենքի մոտ, որի 9-րդ հարկի բնակարանի բաց պատուհանից վայր է ընկել ռեփերի մեկուկես տարեկան որդին, տեղեկացնում է kp.ru-ն։
Կայքի տվյալներով՝ ողբերգությունը տեղի է ունեցել հինգշաբթի ցերեկը` մոտավորապես 13։00-ին: Երեխայի հետ միայն մայրն է եղել տանը: Ոստիկանությունը պարզել է, որ կինը փոքրիկին մենակ է թողել խոհանոցում ու գնացել կողքի սենյակ: Համարյա մեկ րոպե անց վերադարձել է ու տեսել, որ տղան չկա, պատուհանն էլ բաց է:
Ամենայն հավանականությամբ, փոքրիկը բարձրացել է պատուհանագոգին և կարողացել է բացել բռնակը… Պատուհանի տակ ասֆալատապատ տարածք է։ Նման բարձրությունից ընկնելու դեպքում, ցավոք, ողջ մնալու հնարավորություն չէր կարող լինել։ Երեխան տեղում մահացել է։
Շենքի տարածքում ավելանում է ավտոմեքենաների թիվը. Կուդզաևների հարազատներն ու մտերիմները գալիս են նրանց մխիթարելու։ Մեկնաբանություններից էլ խուսափում են։
— Հարգանք դրսևորեք, —խնդրում է մոտ 40 տարեկան մի տղամարդ։-Մարդիկ սգի մեջ են։ Հանգիստ թողեք Ազամատին ու նրա կնոջը։
Վերին հարկերից կնոջ լացի ձայն է լսվում։
— Որքան գիտեմ, այս ընտանիքը մի քանի ամիս առաջ է վարձակալել բնակարանը,- «Կոմսոմոլսկայա պրավդայի» թղթակցին պատմել է բնակիչներից մեկը։ — Քիչ էինք հանդիպում նրանց և չէինք շփվում։
Նույնիսկ չգիտեինք, որ այդ տղամարդը հայտնի երգիչ է։ Երբեմն կնոջն ու երեխային էինք տեսնում. զբոսանքի էին դուրս գալիս։ Սարսափելի է…
Շքամուտքի մոտ, որտեղ ընկել է փոքրիկը, մի քանի փունջ ծաղիկ ու խաղալիքներ են դրված։
— Ընտանիքի բարեկամներն են բերում,- պարզաբանում է կինը։ —Հարևանները նույնպես։
Քննչական կոմիտեի մոսկովյան վարչությունից «ԿՊ»-ին հայտնել են, որ երեխայի դին հայտնաբերելու փաստի առթիվ ստուգում է անցկացվում։
26- ամյա Ազամատ Կուդզաևը՝ MiyaGi կեղծանվամբ հանդես եկող հայտնի ռեփերը, շատ ավելի հայտնի հայր ունի՝ վիրաբույժ Կազբեկ Կուդզաևը, որն 88-ի երկրաշարժից հետո բազմաթիվ կյանքեր է փրկել Հայաստանում։ Այնուհետև, երկրաշարժից մոտ երեք տասնյակ տարի անց նա փնտրել է իր հայ հիվանդներին և Sputnik Արմենիայի իրականացրած ծրագրի շնորհիվ գտել նրանց։ Հայերի մեծ բարեկամ վիրաբույժի ընտանիքին ցավակցում են նաև հայաստանցիները։