ՌԴ ԱԳՆ

ՌԴ ԱԳՆ. Ռուսներին Բաքվում հարցաքննել են «հայկական արմատներ» բացահայտելու համար

29
(Թարմացված է 17:45 06.07.2017)
Ռուսաստանի արտգործնախարարությունում կարծում են, որ ռուսաստանցի հայերը կարող են Ադրբեջանում վտանգի ենթարկվել հայկական արմատների պատճառով։

ԵՐԵՎԱՆ, 6 հուլիսի — Sputnik. Ռուսաստանի ԱԳՆ–ն պարզաբանումներ է տվել Բաքու մուտք գործող հայկական ազգանուններով ռուսաստանցիների հանդեպ խտրականությունների մասին։

«Ռուսաստանի քաղաքացիների Ադրբեջան մուտք գործելու արգելքի վերաբերյալ ԶԼՄ–ների բազմաթիվ հարցերի հետ կապված պետք է փաստենք, որ այդ երկիր գնացող ռուսաստանցիներ, իսկապես, խտրականության են ենթարկվում ազգային սկզբունքով… Որպես կանոն, նրանց ժամերով պահում են Բաքվի օդանավակայանում, հետո էլ իրենց հաշվին հետ են ուղարկում։

Նման վերաբերմունքի համար հիմք են հանդիսացել հայկական անունները, ազգանունները, հայրանունները։ Սակայն նաև դեպքեր են եղել, երբ ռուսական ազգանուններով մարդկանց հարցաքննել են` հայկական արմատներ բացահայտելու նպատակով»,– գրված է հաղորդագրության մեջ։

ՌԴ ԱԳՆ-ն տեղեկացրել է, որ Մոսկվան բազմիցս պահանջել է Բաքվից դադարեցնել այդ վրդովեցնող գործելաոճը, քննություն իրականացնել և համապատասխան գնահատական տալ պաշտոնատար անձանց պահվածքին, սակայն միջադեպերի քննություն չի իրականացվել:

Ավելի վաղ «Ընդդեմ իրավական կամայականությունների» կազմակերպության նախագահ, Հայաստանի առաջին Մարդու իրավունքի պաշտպան Լարիսա Ալավերդյանը հայտնել է, որ հայկական անուններով ռուսաստանցիները, որոնց թույլ չեն տվել մուտ գործել Ադրբեջան, կարող են դիմել Մարդու իրավունքների եվրոպական դատարան և շահել գործը։

Այս տարվա սկզբից Ռուսաստանի 25 քաղաքացու մերժել են Ադրբեջան մուտք գործել։

Русская версия

29