Բաքու

ՌԴ պահանջը Բաքվից` դադարեցնել խտրականությունը ռուսաստանցի հայերի նկատմամբ

79
Ադրբեջան ժամանող Ռուսաստանի մի շարք քաղաքացիների հանդեպ ադրբեջանցի պաշտոնատար անձիք խտրականություն են ցուցաբերում։ Այսօր այդ մասին հայտնել են ՌԴ ԱԳՆ-ում, հաղորդում է «ՌԻԱ Նովոստին»։

ԵՐԵՎԱՆ, 5 հուլիսի–Sputnik. ՌԴ արտգործնախարարությունում հայտնել են, որ տարեսկզբից ՌԴ 25 քաղաքացու արգելել են մուտք գործել Ադրբեջան: ԱԳՆ-ի տեղեկություններով՝ ՌԴ քաղաքացիներին ժամերով պահել են Բաքվի օդանավակայանում, որոշ դեպքերում՝ առանց սննդի, ջրի և բժշկական օգնության։ Հետո բռնի հետ են ուղարկել ուղևորի հաշվին:

«Նախարարությունում պարզաբանել են, որ նման վերաբերմունքի համար հիմք են հանդիսացել հայկական անունները, ազգանունները, հայրանունները»,– գրված է «ՌԻԱ Նովոստիի» հրապարակած հոդվածում։

ՌԴ ԱԳՆ-ում տեղեկացրել են, որ Մոսկվան բազմիցս պահանջել է Բաքվից դադարեցնել այդ վրդովեցնող գործելաոճը, քննություն իրականացնել և համապատասխան գնահատական տալ պաշտոնատար անձանց պահվածքին, սակայն միջադեպերի քննություն չի իրականացվել:

ՌԴ ԱԳՆ-ում նշել են, որ Ադրբեջանի ԱԳՆ-ի պատասխանում ասվում է, որ անցանկալի իրադարձությունները կանխելու համար Ադրբեջանը «ստիպված է կիրառել մի շարք անձանց նկատմամբ համապատասխան քայլեր»։

Մոսկվայում վստահեցրել են, որ կշարունակեն պահանջել «վրդովեցուցիչ խտրական վերաբերմունքի դադարեցում»:

79