ԵՐԵՎԱՆ, 20 հունիսի — Sputnik. «Միսս ԱՊՀ – 2017» մրցույթի երկրորդ վիցե-միսս, Ուսսուրիյսկի GML model մոդելների ակադեմիայի դասախոս Աննա Գրիշկոն UssurMedia լրատվական գործակալությանը պատմել է, որ վաղուց է երազել Հայաստան այցելել։
«Մտերիմներս գիտեն, որ ես չափազանց շատ էի ուզում Հայաստանում լինել։ «Միսս ԱՊՀ – 2017» մրցույթից կես տարի առաջ սկսել էի հայերեն սովորել, բայց այն ժամանակ դեռ չգիտեի, որ շուտով Հայաստան եմ մեկնելու գեղեցկության մրցույթի մասնակցելու։ Երբ իմացա, որ Հայաստանի մայրաքաղաք Երևան եմ մեկնելու, շատ ուրախացա ու ևս մեկ անգամ համոզվեցի, որ երազանքներն իրականանում են»,- պատմել է Աննան։
«Միսս ԱՊՀ – 2017» մրցույթն Աննայի երրորդ մրցույթն էր, ամեն ինչ փուլերով էր ընթանում։ Սկզբում նա նվաճեց իր երկրամասի գեղեցկուհու տիտղոսը, որի շնորհիվ Մոսկվա ուղևորվելու հնարավորություն ստացավ՝ «Ռուս գեղեցկուհի» մրցույթին մասնակցելու, որտեղ նա նույնպես առաջին տեղը զբաղեցրեց։
Այդ հաղթանակը Աննային հնարավորություն ընձեռեց Ռուսաստանը ներկայացնել «Միսս ԱՊՀ – 2017» մրցույթին։
«Երբ Հայաստան ժամանեցի, ինձ զգում էի ինչպես տանը։ Չէի ուզում լքել այն։ Ամենավառ տպավորությունները ոչ միայն մրցույթից են, այլև հենց Հայաստանից։ Իրականացավ իմ վաղեմի երազանքը։ Հայաստան այցելելու և միջազգային մրցույթին մասնակցելու համար ուզում եմ շնորհակալություն հայտնել «Ռուս գեղեցկուհի» մրցույթի նախագահ Ալեքսանդր Աբդուլաևին և տնօրեն Օլգա Շումիլովային»,- նշել է Աննան։
Նա պատմել է, որ աղջիկները Հայաստանի տարբեր տեսարժան վայրեր են այցելել։
