ԵՐԵՎԱՆ, 24 մարտի — Sputnik. Իննսունչորս տարեկանում (95-ամյակը կլրանար հուլիսին) մահացել է խորհրդային պետական գործիչ Անաստաս Միկոյանի որդին՝ հայտնի օդաչու-փորձարկող Ստեփան Միկոյանը: Այս մասին հայտնում է «ՄիԳ» ռուսական ինքնաթիռաշինարարական կորպորացիայի մամուլի ծառայությանը։
««ՄիԳ» կորպորացիայի կոլեկտիվը ցավակցում է Ստեփան Միկոյանի ընտանիքին ու հարազատներին։ Միկոյանի վախճանը մեծ կորուստ էր հայրենական ավիացիայի համար։ Նա երկար ու արժանավայել կյանքով ապրեց։ Նրա անունն ընդմիշտ կմնա մեր հիշողության մեջ»,- նշված է «ՄիԳ» կորպորացիայի հաղորդագրության մեջ։
Ստեփան Միկոյանը ծնվել է 1922 թվականին Թբիլիսիում։ 1941 թվականին ավարտել է Կաչինսկի Ա․ Մյասնիկյանի անվան կարմրադրոշ ռազմանավիացիոն դպրոցը, իսկ նույն տարվա դեկտեմբերին մեկնել է ռազմաճակատ։
Պատերազմի մասնակցությունը
1942 թվականի հունվարի 16-ին նրա ինքնաթիռը սխալմամբ խոցել էր խորհրդային օդաչու Մ.Ա.Ռոդիոնովը։ Միկոյանին հաջողվել էր այրվող ինքնաթիռը տեղ հասցնել, սակայն ինքը 3-րդ աստիճանի այրվածքներ էր ստացել։
1942 թ-ի հոկտեմբերին 14 մարտական թռիչք է իրականացրել, 3 օդային մարտ է մղել, խմբի կազմում հակառակորդի 6 ինքնաթիռ է խոցել։
1942 թվականի նոյեմբերին կապիտան Միկոյանը պարգևատրվել է Կարմիր դրոշի շքանշանով։ 1944 թվականի օգոստոսին Կարմիր աստղ է ստացել կարևոր թռիչքներ իրականացնելու համար։ Պատերազմն «ավարտել» է մարտական 2 շքանշանով։
1978 թվականից «Մոլնիա» գիտաարտադրական միության ավագ կոնստրուկտորի պաշտոնն է զբաղեցրել։ «Բուրանի» տիեզերական թռիչքի ժամանակ օդանավի վայրէջքի պատասխանատուն է եղել։
«ՄիԳ» ինքնաթիռների փորձարկումը
Միկոյանը 23 տարի շարունակ փորձարկել է «ՄիԳ» ռազմական ինքնաթիռները։ «ՄիԳ»-երի պետական փորձարկումներ անցկացնելու համար 1975 թվականին արժանացել է Խորհրդային Միության հերոսի կոչման։ Նա թռիչքներ է կատարել ընդհուպ մինչև 1978 թվականը։
Ստեփան Միկոյանն ուներ 4 եղբայր, որոնք բոլորը նույնպես իրենց դերակատարությունն են ունեցել խորհրդային ավիացիայի զարգացման գործում։ Բոլորը Ստեփանից շուտ են մահացել։
