ԵՐԵՎԱՆ, 16 մարտի — Sputnik. TNS Global միջազգային հետազոտական ընկերության անցկացրած հարցման տվյալները բացահայտել են Ղրիմի հարցի նկատմամբ եվրոպացիների ու ամերիկացիների վերաբերմունքը:
Հարցվածները պատասխանել են հետևյալ հարցին. «Հիմնվելով այն ամենի վրա, ինչ դուք գիտեք կամ լսել եք Ղրիմի մասին, դուք համարու՞մ եք, որ Ղրիմը…»: Պատասխանի տարբերակներ` «Ռուսաստանի մաս է», «Ռուսաստանի մաս չէ» և «չգիտեմ»:
Ֆրանսիայում հարցվածների 20 տոկոսը պատասխանել է, որ Ղրիմը Ռուսաստանի մաս է, 32 տոկոսը պատասխանել է, որ Ռուսաստանի մաս չէ, իսկ 48 տոկոսը՝ չգիտեմ: Գերմանիայում հարցվածների 36 տոկոսն ընտրել է առաջին պատասխանը, 41 տոկոսը՝ երկրորդ, 23 տոկոսը՝ երրորդ: Իտալիայում 34 տոկոսը համարում է Ղրիմը ռուսական, 32 տոկոսը հակառակ կարծիքին է, 34 տոկոսը՝ չգիտի:
Մեծ Բրիտանիայի բնակիչների 26 տոկոսն ընտրել է առաջին պատասխանը, 30 տոկոսը՝ երկրորդ, 44 տոկոսը՝ երրորդ: ԱՄՆ-ում հարցվածների միայն 23 տոկոսն է կարծում, որ Ղրիմը ռուսական թերակղզի է, 26 տոկոսը հակառակ կարծիքի է, 51 տոկոսը դժվարացել է պատասխանել:
Sputnik Արմենիայի խնդրանքով՝ հարցման արդյունքները մեկնաբանել է քաղաքագետ Սերգեյ Շաքարյանցը:
«Առաջին բանը, որ աչք է զարնում, այն է, որ բացառությամբ Գերմանիայի, հարցվածների մեծ մասն այս հարցում ցուցաբերել է լիակատար անտեղյակություն և անտարբերություն»,- ասաց Շաքարյանցը:
Նրա խոսքով՝ նման արդյունքներ են ցուցադրել Իտալիան, Ֆրանսիան, Անգլիան և ԱՄՆ-ը:
«Դա նշանակում է, որ այդ երկրների բնակիչների համար միևնույն է, թե ում է պատկանում Ղրիմը: Այն կարող է լինել Նոր Զելանդիայի մաս, և հարցվածները նույնքան անտարբեր կլինեն: Ելքը մեկն է. այդ երկրների բնակիչներն ունեն իրենց ներքին խնդիրները, Ռուսաստանը նրանց համար հետաքրքիր չէ», — բացատրեց նա:
Փորձագետը կարծում է, որ եթե Ֆրանսիայի բնակիչներին հարցնեին, թե գիտեն արդյո՞ք, որ Նևադա նահանգն ամերիկյան է, հավանաբար շատերը կպատասխանեին՝ չգիտեմ:
Շաքարյանցը կարծում է, որ սա նորմալ երևույթ է Արևմուտքի երկրների համար՝ նրանց կրթության համակարգով:
«Դա պետք չէ նրանց… Մի քիչ տարբերվում են Գերմանիայի թվերը, որովհետև Գերմանիան պարտություն է կրել Երկրորդ համաշխարհային պատերազմում: Թեև Գերմանիայում հարցվածները առավելապես երիտասարդներն էին, պատերազմին մասնակցած ավագ սերնդի ներկայացուցիչները պատմել են սերունդներին Ռուսաստանի մասին: Բացի այդ, նրանք գիտեն Ուկրաինայի և Ղրիմի մասին», — նշեց Շաքարյանցը:
Փորձագետի խոսքով՝ հարցման արդյունքները ցույց են տալիս, որ վերոհիշյալ պետությունների հարցվածներին բացարձակապես չի հետաքրքրում ո՛չ Ղրիմը, ո՛չ այն հարցը, թե ում է այն պատկանում:
