ԵՐԵՎԱՆ, 13 մարտի — Sputnik. «Եվրատեսիլ 2017» մրցույթի ռուսաստանցի մասնակից Յուլիա Սամոյլովան մանկուց երազել է մրցույթի մասին և անսահման երջանիկ է, որ իրեն նման հնարավորություն է ընձեռվել, այդ մասին երգչուհին պատմել է ՌԻԱ Նովոստիին տված հարցազրույցում։
Ավելի վաղ հայտնի է դարձել, որ Առաջին ալիքն ավարտել է կատարողների և երգերի ներքին մրցութային ընտրությունը «Եվրատեսիլ 2017» երաժշտական մրցույթում և որոշել` Կիևում Ռուսաստանը կներկայացնի Սամոյլովան, որի Flame Is Burning սիրո մասին երգը «մեծ տպավորություն է թողել»։
«Ես անսահման երջանիկ եմ, որ մասնակցելու եմ այդ մրցույթին։ Ժամանակին ես հեռուստացույց էի դիտում և ինձ պատկերացնում բեմի վրա։ Մայրս երազում էր ինձ հետ, հենց նա էլ ինձ ներշնչեց, որ նման բան ինձ հետ էլ կլինի, և ահա եղավ։ Շոկի մեջ եմ, մինչև հիմա չեմ կարողանում գիտակցել, որ դա տեղի է ունենում ինձ հետ։ Ես երջանիկ եմ», — ասել է Սամոյլովան։
Երգի հեղինակը Յուլիան չէ, սակայն նա վստահեցրել է, որ այն շատ հոգեհարազատ է իրեն։
