ԵՐԵՎԱՆ, 26 փետրվարի — Sputnik. Պատանի մասնակից Ռոման Դրուժինինը Կրասնոյարսկից այնպես է կատարել հայտնի վրացի երգիչ Սոսո Պավլիաշվիլու «Աղոթենք ծնողների համար» երգը, որ արտիստը չի կարողացել զսպել արցունքները:
15-ամյա Ռոման Դրուժինինը Կրասնոյարսկի երկրամասի Բորոդինո քաղաքից է, նա բոլորովին չի հիշում իր ծնողներին: Տղայի մայրը մահացել է, երբ նա երեք տարեկան է եղել: Հոր մասին նա ոչինչ չգիտի, ինչպես նաև չգիտի իր ազգությունը: Հիմա նա ապրում է խնամակալների ընտանիքում: Ռոմանը երազում է իմանալ իր արմատների և ազգության մասին:
Ռոմանի հոգեցունց կատարումից հետո Պավլիաշվիլին բեմ է բարձրացել և արցունքն աչքերին ասել. «Գլխավորը՝ դու այնպիսի ազգից ես, որը կոչվում է «լավ մարդ», բայց դու երգում ես վրացու նման»: Դրանից հետո երգիչը Ռոմանի հետ կատարել է իր երգը: Ռոման Դրուժինինը ժյուրիի միաձայն որոշմամբ անցել է հաջորդ փուլ:
«Ты супер!» նախագիծը ՆՏՎ հեռուստաալիքի և Sputnik միջազգային տեղեկատվական գործակալության համատեղ նախագիծն է, որը հնարավորություն է տալիս ծնողական խնամքից զրկված տաղանդավոր երեխաներին՝ հայտնել իրենց մասին։ Մրցույթի 92 մասնակիցները Ռուսաստանից, Աբխազիայից, Ադրբեջանից, Հայաստանից, Բելառուսից, Վրաստանից, Ղազախստանից, Ղրղըզստանից, Մոլդովային, Ուկրաինայից, Էստոնիայից և Հարավային Կորեայից են։
Sputnik-ն իր ընթերցողներին հնարավորություն է տալիս հետևել մասնակիցների հաջողություններին առցանց օրագրերի և ուղիղ հեռարձակումների ձևաչափով։ ՆՏՎ-ն Ռուսաստանի խոշորագույն ոչ պետական հեռուստաընկերություններից է, գործում է 1993թ-ի հոկտեմբերից և ընդգրկված է ռուսական հեռուստաշուկայի առաջատար հեռուստաընկերությունների եռյակում:
ՆՏՎ-ն հեռարձակվում է ՌԴ գրեթե ամբողջ տարածքում՝ ընդգրկելով բնակչության 99,2 տոկոսը: Ռուսալեզու հանդիսատեսի համար հեռարձակվում է Ռուսաստանի սահմաններից դուրս՝ մերձավոր արտասահմանի, Եվրոպայի և Մերձավոր Արևելքի երկրներում, ինչպես նաև Հյուսիսային Ամերիկայում և Ավստրալիայում: ՆՏՎ-ն ունի երկու միջազգային տարբերակ՝ ՆՏՎ աշխարհ և ՆՏՎ Ամերիկա:
