Սուրճ

Վարչապետի առաջարկը հավանել են. «ամերիկանոն» կարող է «ռուսիանո» դառնալ

31
(Թարմացված է 22:33 24.11.2016)
Ռուսաստանի կառավարության ղեկավար Մեդվեդևն առաջարկել էր վերանվանել «ամերիկանո» սուրճը, Հայաստանի վարչապետ Կարեն Կարապետյանն էլ ասել էր «ռուսիանո» տարբերակը։ Ռուսաստանի որոշ հաստատություններ արդեն ունեն նման անունով սուրճ։

ԵՐԵՎԱՆ, 24 նոյեմբերի — Sputnik. Հայաստանի Վարչապետ Կարեն Կարապետյանի` կատակով արված առաջարկը` սուրճը անվանել «ռուսիանո», կարող է իրականություն դառնալ։

Ռուսական ԶԼՄ-ները, հղում անելով Ռոսպատենտի արդյունաբերական սեփականության դաշնային ինստիտուտի ապրանքանիշերի և արդյունաբերական նմուշների բաժնի ղեկավար Ռոման Զախարովին, հայտնել են, որ Ռոսպատենտն արդեն ստացել է երեք հայտ ապրանքանիշը գրանցելու վերաբերյալ։ Հայտ ներկայացողների թվում են «Այպեքս գրուպ» ՍՊԸ-ն, «Տրց Սերվիս» ՍՊԸ-ն և «Յուստա Աուրա» ՍՊԸ-ն։ Բոլոր երեք հայտերն էլ կանցնեն պատենտային գերատեսչության փորձաքննությունը։

Նոյեմբերի 16-ին մամուլում տեղեկություն հայտնվեց, որ Եվրասիական միջկառավարական խորհրդի նիստին Դմիտրի Մեդվեդևն առաջարկել է անվանափոխել քաղաքական տեսանկյունից ոչ կոռեկտ «ամերիկանո» սուրճը։ Ինչպես ավելի ուշ հայտնի դարձավ, այլընտրանքային անվանումը հորինել է ոչ թե Մեդվեդևը, այլ Հայաստանի վարչապետ Կարեն Կարապետյանը։ Ռուս գործընկերոջ առաջարկին ի պատասխան Կարապետյանը հումորով առաջարկել է «ռուսիանո» տարբերակը։

Փորձագետները համոզված են, որ ըմպելիքը մեծ ապագա ունի, և այն կարող է ընդգրկվել Ռուսաստանի մի շարք ռեստորանների ճաշացանկում։ Ընդ որում, արդյունաբերական սեփականության դաշնային ինստիտուտի ներկայացուցիչն ասաց, որ դեռ վաղ է խոսել պատենտի վերաբերյալ որոշման մասին, անհրաժեշտ է սպասել փորձաքննության արդյունքներին։

31