Մարիա Զախարովա

Զախարովան` Ղարաբաղի հարցով ԵԱՀԿ ՄԽ աշխատանքի ակտիվացման մասին

24
(Թարմացված է 20:07 24.11.2016)
Ռուսաստանի ԱԳՆ–ն ողջունում է ղարաբաղյան խնդրի կարգավորման հարցով զբաղվող ԵԱՀԿ ՄԽ աշխատանքի ակտիվացումը։

ԵՐԵՎԱՆ, 24 նոյեմբերի — Sputnik. Ռուսաստանի ԱԳՆ պաշտոնական ներկայացուցիչ Մարիա Զախարովան ցանկություն է հայտնել, որ Ղարաբաղյան հարցով զբաղվող ԵԱՀԿ ՄԽ համանախագահներն ակտիվացնեն ջանքերը։

«Կարծում եմ, որ միշտ կարելի է ավելին անել, ինչ վերաբերում է ԵԱՀԿ ՄԽ համանախագահների աշխատանքի ակտիվացմանն ու ընդլայնմանը», — ասել է Զախարովան հինգշաբթի տեղի ունեցած ճեպազրույցի ժամանակ` պատասխանելով Թրամփի ընտրության հետ կապված` հաջորդ տարի Ղարաբաղի հարցով Ամերիկայի միջնորդության հավանական ակտիվացման մասին հարցին։ Ընդ որում, Ռուսաստանի ԱԳՆ ներկայացուցիչը ձեռնպահ մնաց միջնորդների անձնական ջանքերին կոնկրետ գնահատական տալուց։

«Իհարկե, հաշվի առնելով այդ խնդրի դժվարությունն ու այն, որ խնդիրն անմիջականորեն կապված է այնտեղ բնակվող մարդկանց ճակատագրերի հետ, և, ցավոք, հաճախ ենք լսում այնտեղից տխուր նորություններ, կարելի է ցանկանալ, որ Մինսկի խմբի համանախագահները ջանքերն էլ ավելի ակտիվացնեն», — ասել է նա։

Զախարովայի խոսքով` անհրաժեշտ է զգալի ջանքեր գործադրել ղարաբաղյան խնդրի կարգավորման գործընթացում առաջընթաց արձանագրելու համար, և Մոսկվան դա միայն ողջունում է։ Վերջերս Ֆրանսիան փոխեց ԵԱՀԿ ՄԽ իր միջնորդին, այդ տեղը զբաղեցրեց Ստեֆանե Վիսկոնտին։ Ամերիկացի միջնորդ Ջեյմս Ուորլիքը նույնպես հայտարարեց ՄԽ շարքերը լքելու մասին։ ԵԱՀԿ ՄԽ-ն, որը ստեղծվել է 1992 թվականին, ղարաբաղյան հակամարտության կարգավորման բանակցությունների միակ ձևաչափն է։ Միջնորդ երկրների թվում են Ռուսաստանը, ԱՄՆ-ն և Ֆրանսիան։

24