Ինքնաթիռ

Որոշվել է փոխհատուցման չափը «Բելավիայի» ինքնաթիռը վերադարձնելու համար

17
(Թարմացված է 18:07 24.11.2016)
Հայաստանի քաղաքացի Արմեն Մարտիրոսյանի պատճառով հոկտեմբերի 21-ին ստիպված Կիևի օդանավակայան վերադարձավ «Բելավիա» ավիաընկերության ինքնաթիռը։ «Բելավիա» ավիաընկերության ներկայացուցիչը հայտնել է, որ փոխհատուցման մասին պայմանավորվածություն է ձեռք բերվել։

ԵՐԵՎԱՆ, 24 նոյեմբերի — Sputnik. Մինսկն ու Կիևը որոշել են Արմեն Մարտիրոսյանի հետ կապված միջադեպի համար «Բելավիա» ավիաընկերության ինքնաթիռի վերադարձի փոխհատուցման չափը, հայտնում է ԲԵԼՏԱ գործակալությունը` հղում անելով «Բելավիայի» մարքեթինգի և արտաքին տնտեսական գործունեության գծով գլխավոր տնօրենի տեղակալի Իգոր Չերգինեցին։

««Բելավիան» կատարել է բոլոր անհրաժեշտ պայմանները, համաձայնեցվել է ինքնաթիռի վերադարձի փոխհատուցման գումարը, այն, ի դեպ, մի փոքր նվազեցվել է նախնականի հետ համեմատ։ Հարցը քննարկվում է, և հուսով եմ` այն լուծում կստանա», — ասաց Չերգինեցը` չնշելով գումարը։

«Բելավիայի» ինքնաթիռի վերադարձի հետ կապված միջադեպը տեղի է ունեցել հոկտեմբերի 21-ին. կործանիչներ օդ բարձրացնելու սպառնալիքով կարգավար Ժուլյանը պահանջել է ինքնաթիռն օդանավակայան վերադարձնել։ Չվերթից հանվել է Հայաստանի քաղաքացի, լրագրող և հասարակական գործիչ Արմեն Մարտիրոսյանը, ով արդեն դատի է տվել Ուկրաինայի իշխանությանը։

ՈՒկրաինայի անվտանգության ծառայությունը երկար ժամանակ հերքում էր սպառնալիքի փաստը, մինչև Բելառուսի ԱԳՆ-ն հրապարակեց կարգավարի հետ զրույցի ձայնագրությունը։ Ավելի վաղ ՈՒԱԾ-ն հայտնել էր, որ Մարտիրոսյանին ինքնաթիռից հանել են, քանի որ նրան կասկածում են երկրում իրավիճակն ապակայունացնելու հետ կապված որոշ գործողություններ կատարելու մեջ։

Նրանց վարկածով` նա կապ ուներ դրա հետ առնչություն ունեցող քաղաքական շարժումների և կազմակերպությունների հետ։ Լրագրող Արմեն Մարտիրոսյանը հայց է ներկայացրել` պահանջելով ապօրինի ճանաչել ՈՒԱԾ գործողությունները, որը Կիև է վերադարձրել «Բելավիայի» ինքնաթիռն ու իրեն հանել չվերթից։ Դատը նշանակվել է հունվարի 26-ին։

17