ԵՐԵՎԱՆ, 15 հունիսի — Sputnik. Հարավային Օսեթիայի խորհրդարանը քննարկում է Հայոց ցեղասպանության ճանաչման հարցը, Sputnik Հարավային Օսեթիային հայտնել է պատգամավոր Պյոտր Գասիևը։
Հարցը քննարկվել է օրենսդիր մարմնում դեռ անցյալ տարի, սակայն հայկական համայնքի պաշտոնական դիմումը խորհրդարան ստացվել է միայն երեքշաբթի։
«Համայնքի դիմումը միայն այսօր է ստացվել, սակայն հարցը բարձրացվել է նաև խորհրդարանի ղեկավար Անատոլի Բիբիլովի և իմ կողմից, քննարկվել է պատգամավորների հետ։ Նստաշրջանի նիստի ժամանակ այն կկարդա օրենսդրության կոմիտեի ղեկավար Օլեսյա Կոչիևան», — ասաց պատգամավորը։
Նա նշեց, որ Հայոց ցեղասպանության ճանաչման հարցում դրական որոշում է ակնկալում։
«Որոշ պատգամավորներ նշում էին, որ Հայաստանն էլ պետք է ճանաչի օսերի ցեղասպանությունը, սակայն դա սկզբունքային չէ։ Սկզբունքայինն այն է, որ հայ համայնքի ներկայացուցիչները Հարավային Օսեթիայի հասարակության լիիրավ անդամ են, նրանցից շատերը պայքարել են Հարավային Օսեթիայի ազատության և անկախության համար, մեզ հետ միասին ռազմական դրության դժվարությունները կրել, իսկ նրանցից ոմանք էլ այն հայերի սերունդն են, ովքեր փրկվել են ցեղասպանությունից», — ասաց Գասիևը։
Նրա խոսքով, եթե խորհրդարանը դրական որոշում կայացնի, «կվերականգնվի պատմական և մարդկային արդարությունը եղբայրական ժողովրդի նկատմամբ, ով ինչպես և Հարավային Օսեթիայի ժողովուրդը, զգացել է ցեղասպանության սարսափը»։
Հարավային Օսեթիայի հայկական համայնքում գրանցված է ավելի քան 300 մարդ։XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։
Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։ ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
