Բունդեսթագում Հայոց ցեղասպանությունը ճանաչող բանաձևի քվեարկությունից հետո

Հրեական դաշնություն. ԳԴՀ–ն բարոյական իրավունք ուներ ճանաչելու Հայոց ցեղասպանությունը

24
(Թարմացված է 21:35 05.06.2016)
Անցյալում բազմաթիվ սխալներ գործած Գերմանիան հասկանում է, որ մեկ ցեղասպանությունը լռության մատնելը կարող է հանգեցնել ապագայում դրա կրկնությանը

ԵՐԵՎԱՆ, 5 հունիսի — Sputnik. Օսմանյան կայսրությունում Հայոց ցեղասպանությունը պաշտոնապես ճանաչած Գերմանիան բարոյական իրավունք ուներ դա անելու համար, քանի որ ժամանակին իր վրա է վերցրել Հոլոքոստի ամբողջական պատասխանատվությունը, հայտարարել է Հրեական համայնքների դաշնության նախագահ Ալեքսանդր Բորոդան։

Նա մեկնաբանել է Թուրքիայի արդարադատության նախարարի ասածը, թե ժամանակին գերմանացիներն իրենք էին հրեաներին այրում վառարանների մեջ։

Բորոդան նշել է, որ ի տարբերություն Թուրքիայի՝ Գերմանիան չի հրաժարվել Հոլոքոստի պատասխանատվությունից և «ճիշտ եզրակացություններ է արել կատարվածից»: 

Բունդեսթագի պատգամավորները հունիսի 2-ին ընդունեցին Հայոց ցեղասպանության վերաբերյալ բանաձևը։ Փաստաթղթին, որն ունի «1915 թ. հայերի և մյուս քրիստոնյա փոքրամասնությունների ցեղասպանության հիշատակի և ոգեկոչման մասին» անվանումը, կողմ է քվեարկել խորհրդարանականների գերակշիռ մեծամասնությունը, եղել է միայն մեկ ձեռնպահ և մեկ դեմ ձայն:

«Այսօր գերմանացիները բարոյական իրավունք ունեն Թուրքիային ցույց տալ նրանց սխալ գնահատականը պատմությանը»,- ասել է Բորոդան: Ընդ որում` նա նշել է, որ Գերմանիան, անցյալում թույլ տալով բազմաթիվ սխալներ, հասկանում է, որ մեկ ցեղասպանությունը լռության մատնելը, ցավոք, հեշտությամբ կարող է հանգեցնել ապագայում դրա կրկնությանը:

XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։

Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։ ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։

24