ԵՐԵՎԱՆ, 28 դեկտեմբերի-Sputnik. Ռուսաստանը Թուրքիայի հետ համագործակցությունից հրաժարվելու խնդիր չունի, հայտարարել է ՌԴ փոխվարչապետ Արկադի Դվորկովիչը, հայտնում է ՌԻԱ Նովոստին։
Միաժամանակ նա նշել է, որ Ռուսաստանի վարչապետ Դմիտրի Մեդվեդևը հայտնել լ է Թուրքիայի դեմ որոշակի քայլեր նախապատրաստելու մասին։
«Վարչապետն արդեն կառավարության նիստերում հայտարարել է հաջորդ գործողության մասին»,- ասել է նա «Ռոսիա 24» հեռուստաալիքին տված հարցազրույցում։ Դվորկովիչն առանձին պատմել է այն մասին, թե ինչպես են կառուցվելու Անկարայի հետ հարաբերությունները։
«Մենք կշարժվենք հետևողական ճանապարհով, քանի դեռ համարժեք արձագանք չկա, ես նկատի ունեմ այն, ինչի մասին խոսել է Ռուսաստանի նախագահը»,- հայտարարել է փոխվարչապետը։
Ռուսաստանի և Թուրքիայի հարաբերությունները սրվել են այն բանից հետո, երբ նոյեմբերի 24-ին թուրքական ՌՕՈՒ-ն խոցել էր ռուսական Սու-24 ինքնաթիռը, որը մասնակցում էր Սիրիայում գործող ահաբեկիչների դեմ ուղղված գործողություններին։ Օդաչուներից մեկը զոհվել էր, մյուսը կարողացել էր փրկվել։ Անկարան պնդում է, որ Սու-24-ը խախտել է իր օդային տարածքը։ ՌԴ ՊՆ-ն կտրականապես հերքում է այդ փաստը։ Ռուսաստանի նախագահ Վլադիմիր Պուտինն այս դեպքը «թիկունքից հասցված հարված» էր որակել։