ՌԴ փոխվարչապետ Ալեքսեյ Օվերչուկ

Չի բացառվում, որ Հայաստանն օգտագործի Կասպից ծովում ադրբեջանական նավահանգիստները. Օվերչուկ

470
Դիտարկվում է Ադրբեջանի ու Նախիջևանի ինքնավար հանրապետության միջև Հայաստանի տարածքով հաղորդակցության հնարավորությունը, ինչպես նաև Ադրբեջանի տարածքով Հայաստանից Ռուսաստան երթևեկելու հնարավորությունը:

ԵՐԵՎԱՆ, 11 հունիսի -Sputnik. Չի բացառվում, որ Հայաստանը կարողանա օգտվել Կասպից ծովում գտնվող Ադրբեջանի նավահանգիստներից։ «Ռոսիյսկայա գազետային» տված հարցազրույցում նման կարծիք է հայտնել ՌԴ փոխվարչապետ Ալեքսեյ Օվերչուկը:

Նրա խոսքով` բարի կամքի առկայության դեպքում Անդրկովկասում տրանսպորտային հաղորդակցությունը կապաշրջափակվի, առևտուրը կզարգանա, երկու երկրների տնտեսությունները զարգացման հզոր ազդակ կստանան ու մարդկանց կյանքը կբարելավվի: Ռուսաստանի փոխվարչապետը նշել է, որ նման բարի կամք կա։

Հայաստանի վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի համատեղ եռակողմ հայտարարության հիման վրա ստեղծվել է եռակողմ աշխատանքային խումբ` Հայաստանի Հանրապետության, Ադրբեջանի Հանրապետության ու Ռուսաստանի Դաշնության փոխվարչապետների համատեղ նախագահությամբ։ Խմբին հանձնարարվել է զբաղվել տարածաշրջանում տնտեսական ու տրանսպորտային կապերի ապաշրջափակմամբ:

«Ամենասկզբից գործընկերների հետ պայմանավորվել ենք, որ առողջ բանականության վրա հիմնված մոտեցում ենք ընտրում։ Ադրբեջանի ու Հայաստանի հարաբերությունները շատ բարդ են ու բազմաշերտ։ Շատերը սարսափելի վիշտ են ապրել, լքել հայրենի հողը, ամենամտերիմ մարդկանց կորցրել։ Հիշողությունն այդ մասին միշտ մնում է։ Այսօր կարևոր է այնպես անել, որ դժբախտությունը կրկին մարդկանց տներ չվերադառնա, իսկ դրա համար պետք է վերքերը բուժել, սովորել խոսել միմյանց հետ և միասին աշխատել ընդհանուր խաղաղ ապագայի ստեղծման ուղղությամբ»,- ասել է Օվերչուկը։

ՀՀ–ն ու Իրանը աշխատում են Պարսից ծոց-Սև ծով տրանսպորտային միջանցք ստեղծելու ուղղությամբ

Նրա խոսքով՝ իրականությունն այն է, որ Ռուսաստանի համար այդ մոտ և բարեկամ ժողովուրդները եղել են, կան և կլինեն հարևաններ։ Այնտեղ ապրող մարդիկ ուզում են խաղաղ ապրել, մեծացնել երեխաներին և ուրախանալ թոռներով։  Տարածաշրջանում տնտեսական ու տրանսպորտային կապերի ապաշրջափակման բանակցությունների բոլոր մասնակիցները հենց դրանից են ելնում։ Բոլորն ուզում են ավելի լավ կյանք կառուցել իրենց ժողովուրդների համար։ Ռուսաստանն օգնում է  նրանց այդ հարցում։

Հեռակա բանակցությունները փոխվարչապետների մակարդակով սկսվել են 2021 թվականի հունվարին, երեք պատվիրակությունները բանակցությունների կլոր սեղանի շուրջ նստել են հունվարի 30-ին։

Դիտարկվում են Հայաստանի տարածքով Ադրբեջանի ու Նախիջանի ինքնավար հանրապետության արևմտյան շրջանների միջև տրանսպորտային հաղորդակցության հնարավորությունները։ Միաժամանակ լուծվում են Հայաստանից դեպի Ռուսաստան Ադրբեջանի տարածքով կամ Հայաստանից ու Ռուսաստանից դեպի Իրան Նախիջևանով երթևեկելու հարցերը։

«Բացի այդ, Հայաստանը կարող է Կասպից ծովում ադրբեջանական նավահանգիստների օգտագործման հնարավորություն ունենալ դեպի Կենտրոնական Ասիայի երկրներ ու Կենտրոնական Ասիայի երկրներից Հայաստան բեռների տեղափոխման համար», - նշել է Օվերչուկը:

Եռակողմ աշխատանքային խմբի շրջանակում առարկայական խոսակցություն է ընթանում տարածաշրջանի ապաշրջափակման մասին։ Այս խնդրի լուծման բանալին Հայաստանի ապաշրջափակումն է, անկախացումից ի վեր Հայաստանը  փաստացի շրջափակման մեջ է։

Հայաստանը դեպի ծով ելք չունի։ Հայաստանը Թուրքիայի ու Ադրբեջանի հետ շատ բարդ պատմական հարաբերություններ ունի, ու այդ երկրների հետ դրա սահմաններն արգելափակված են։ ՀՀ–ն Իրանի հետ ցամաքային սահմանի փոքր հատված ունի, բայց այնտեղ բարդ ռելիեֆ է ու ճանապարհները վատն են, դա խոչընդոտում է լիարժեք տրանսպորտային հաղորդակցությանը։ Բացի այդ, Իրանը սահմանափակող միջոցների տակ է, ինչը նույնպես ազդում է իրավիճակի վրա։

Հայաստանն արտաքին աշխարհի հետ տրանսպորտային հաղորդակցություն իրականացնելու հնարավորություն ունի միայն Վրաստանի տարածքով, որտեղ ելք կա դեպի ծովային նավահանգիստներ։ Վերին Լարս միջազգային անցակետը միակ ցամաքային երթուղին է դեպի Ռուսաստան: Այս ավտոմոբիլային անցակետը սահմանափակ թողունակություն ունի ու տարվա ընթացքում մի քանի շաբաթ եղանակային պայմանների պատճառով փակ է լինում: Այնտեղ կուտակվում են հարյուրավոր բեռնատարներ, որոնք սպասում են, թե երբ ճանապարհը կբացվի, երթևեկությունը կվերականգնվի, ու հնարավոր կլինի բեռները տեղափոխել։

Գնացքն արդեն մեկնել է, կամ ճանապարհների ապաշրջափակումից կշահեն Ադրբեջանը, Թուրքիան...

«Այս նեղ հատվածը զսպում է տնտեսական զարգացումը, բացասական ազդեցություն է թողնում միգրացիոն գործընթացների վրա ու թույլ չի տալիս Հայաստանին լիովին բացահայտել իր ներուժն ու բարգավաճ երկիր դառնալ», - ասել է ՌԴ փոխվարչապետը:

Տարածաշրջանում տրանսպորտային շրջափակման վերացումը կարևոր է Ռուսաստանի, ԵԱՏՄ-ի և բոլոր հարևան երկրների համար։  Ընդ որում` Հայաստանը ոչ միայն կվերածվի կարևորագույն միջազգային տրանսպորտային հանգույցի, որը Պարսից ծոցի իրանական նավահանգիստները կապում է սևծովյան նավահանգիստների, ինչպես նաև Բալթիկայի ու Խաղաղ օվկիանոսի ռուսական նավահանգիստների հետ, այլև կկարողանա ձեռնամուխ լինել սեփական արտադրության ավելացմանը, քանի որ սպառման նոր շուկաներ հասանելի կլինեն, իսկ արտահանումը զսպող գործոններն անցյալում կմնան:

Ժամանակակից պատմության մեջ նման հնարավորություններ դեռևս երբեք չեն եղել, ու անկասկած, այս նոր կոնֆիգուրացիայում հիմնական շահառուները կլինեն Ադրբեջանն ու Հայաստանը։ Ռուսաստանն այդ հարցում օգնում է նրանց և տարածաշրջանի մյուս բոլոր երկրներին։

Աշխատանքային խմբի շրջանակում ուսումնասիրվել են Ադրբեջանն ու Հայաստանը միացնող երկաթուղային ու ավտոմոբիլային բոլոր հնարավոր երթուղիները։ Գարնանը այդ երկրների սահմանամերձ շրջաններում աշխատել են տրանսպորտի նախարարության, «Ռոսավտոդորի» ու Ռուսական երկաթուղիների փորձագետները։ Նրանք ուսումնասիրել են յուրաքանչյուր ավտոմոբիլային և երկաթուղային ճանապարհ, գնահատել երկու երկրների միջև առևտրային փոխադրումների իրականացման հնարավորությունները։ Գնահատվել է ճանապարհների ծածկույթի, երկաթուղիների, կամուրջների, ճանապարհների տակ ընկած խողովակների վիճակը։

Սակայն գրեթե բոլոր հնարավոր երթուղիները անպիտան են դարձել, ու տրանսպորտային հաղորդակցության վերականգնումը լուրջ ներդրում է պահանջում։  Այդ փորձագիտական աշխատանքի արդյունքում կողմերը կարողացան նախանշել տրանսպորտային հաղորդակցության ապաշրջափակման հետագա քայլերը։

Աշխատանքի մի մեծ շերտը կապված է նաև իրավական հարցերի հետ։ Ադրբեջանի և Հայաստանի միջև չկան դիվանագիտական հարաբերություններ, չկան անցակետեր, մաքսակետեր, այն ամենը, ինչ սովորաբար լինում է հարևան երկրների միջև։ Վերջին 30 տարիների ընթացքում և՛ Ադրբեջանը, և՛ Հայաստանն արել են ամեն ինչ, որ նրանց միջև երթևեկությունն անհնար լինի։ Պետք է լուծել այդ կուտակված խնդիրները։

Իրականացվում է միջազգային բոլոր նորմատիվ իրավական ակտերի գույքագրում: Առաջին հերթին դա վերաբերում է ԱՊՀ-ին, որովհետև և՛ Հայաստանը, և՛ Ադրբեջանը մտնում են դրա մեջ։ Այնպես է ստացվել, որ ամեն անգամ, երբ ինչ-որ բազմակողմ համաձայնագրեր են ստորագրվում, Հայաստանի և Ադրբեջանի ներկայացուցիչները միմյանց նկատմամբ վերապահումներ են անում, որոնց համաձայն ստորագրված պայմանագրերը չեն ազդում հակառակ կողմի վրա։ Այդ վերապահումները, որոնք խանգարում են երկու երկրների միջև տրանսպորտային հաղորդակցության իրականացմանը, պետք է հանվեն։

Եռակողմ աշխատանքային խմբի աշխատանքներն այս պահին չեն շարունակվում. Գրիգորյանն ասաց` ինչու

Ավելի քան երեսուն տարի երկու երկրների պետական ապարատները համակարգված աշխատել են միմյանց դեմ, ու այժմ դրանք պետք է հանգուցալուծում փնտրեն ու փոխզիջումներ գտնեն։ Մարդկանց համար դա դժվար է, քանի որ նրանց վրա դրված է իրենց երկրների նախորդ կյանքի ու հարաբերությունների պատմության ամբողջ բեռը։

«Երբ բոլոր այդ լուծումները գտնվեն, ու Ադրբեջանն ու Հայաստանը որոշեն, որ իրենք պատրաստ են դրանք իրականացնել, ապա հնարավոր կլինի անցնել ճանապարհների վերականգնմանը և դրանից հետո վերսկսել տրանսպորտային հաղորդակցությունը։ Կարևորը լավ ապագա տեսնելն է, ու իհարկե, կարևոր է, որ հիմա ոչ ոք չձեռնարկի քայլեր, որոնք էլ ավելի են բարդացնում առանց այդ էլ բարդ հարաբերությունները»,- ընդգծել է Օվերչուկը:   

Հիշեցնենք, որ տարածաշրջանային հաղորդակցությունների ապաշրջափակման մասին նշված  է Հայաստանի, Ռուսաստանի ու Ադրբեջանի ղեկավարների համատեղ հայտարարության մեջ, որը ստորագրվել է 2021 թվականի հունվարի 11-ին Մոսկվայում կայացած բանակցությունների արդյունքում: Բանակցությունների վարելու նպատակով փոխվարչապետների մակարդակով ստեղծվել է եռակողմ աշխատանքային խումբ։

Սահմանի միջադեպերը չեն նպաստում Երևանի և Բաքվի հարաբերությունների կարգավորմանը. Զախարովա

470
թեգերը:
ապաշրջափակում, Ռուսաստան, Ադրբեջան, Հայաստան
Ըստ թեմայի
ԼՂ–ի մասին հայտարարությունների ֆոնին Կարասինն ու Աբաշիձեն քննարկել են ապաշրջափակման թեման
«Մեզ անհրաժեշտ է ճանապարհ, խոսքը դեռ երկաթուղու մասին է». Փաշինյան
Թուրքական ապրանքների արգելք և ճանապարհների բացում. ի՞նչ է մտածում բիզնեսը իրավիճակի մասին
Ոսկյա իրեր

Հայաստանի երկու քաղաքացիներ ձերբակալվել են Վրաստանում ոսկու մաքսանենգության համար

52
(Թարմացված է 16:09 18.06.2021)
Քննության տվյալներով՝ ձերբակալվածները կարողացել են «Սարփի» անցակետով ավելի քան կես կիլոգրամ ոսկյա իրեր տեղափոխել Թուրքիայից Վրաստան։

ԵՐԵՎԱՆ, 18 հունիսի - Sputnik. Հայաստանի երկու քաղաքացիներ ձերբակալվել են Վրաստանում՝ Թուրքիայից մեծ խմբաքանակ ոսկյա իրերի մաքսանենգության համար։ Տեղեկությունը հայտնում է Sputnik Վրաստանը։

Հետաքննությունը պարզել է, որ ձերբակալվածները գաղտնի կերպով Թուրքիայից չհայտարարագրված թանկարժեք իրեր են տեղափոխել Վրաստան «Սարփի» սահմանային անցակետով:

Առգրավվել են 508,66 գրամ կշռող ոսկյա իրեր։ Մաքսանենգ ապրանքի ընդհանուր արժեքը գերազանցել է 56 253 լարին (17,8 հազար դոլար):

Քրեական գործը հարուցվել է «Վրաստանի մաքսային սահմանով ապրանքների տեղափոխման հետ կապված կանոնների խախտում, որը կատարվել է մի խումբ անձանց կողմից նախնական համաձայնությամբ» հոդվածով։ Հանցանքը պատժվում է ազատազրկմամբ ՝ 8-11 տարի ժամկետով:

52
թեգերը:
մաքսանենգություն, Ոսկի, Ձերբակալություն, Վրաստանի Հանրապետություն, Հայաստան
Երկաթգիծ

Միայն երկու ճանապարհ կա. ապաշրջափակման դեպքում Հայաստանը «կկապի» Թուրքիան և Ադրբեջանը

320
(Թարմացված է 10:47 18.06.2021)
Պաշտոնական Երևանը պնդում է, որ ներկա պահին չի դիտարկում Բաքվի հետ ավտոմոբիլային հաղորդակցությունը բացելու հարցը։ Հայաստանը կարող է կապել Թուրքիան և Ադրբեջանը երկու երթուղով, որոնք փոխադրումների միայն երկաթուղային տեսակն են ենթադրում։

ԵՐԵՎԱՆ, 17 հունիսի – Sputnik, Լաուրա Սարգսյան. Հայաստանում տրանսպորտային հաղորդակցությունների ապաշրջափակման տակ հասկանում են երկաթուղային հաղորդակցությունների վերականգնում կամ բացում։ Մասնագետները երկու պոտենցիալ երթուղի են նշում, որոնք կարող են անցնել մեր տարածքով և Թուրքիայից Ադրբեջան ու Հայաստանից Ռուսաստան բեռներ հասցնել։

Դեռ մայիսին` Ապարանում, ՀՀ վարչապետի պաշտոնակատար Նիկոլ Փաշինյանը հայտարարեց, որ ապաշրջափակումը ենթադրում է խորհրդային տարիներին գործող երկաթուղային հաղորդակցությունների բացում, ընդգծելով, որ խոսքը ավտոմոբիլային ճանապարհների մասին չէ։

Հայաստանի երկաթուղային վետերանների խորհրդի նախագահ Լևոն Հակոբյանը, որը քաջածանոթ է խորհրդային տարիներին գործող երթուղիների հետ, Sputnik Արմենիայի թղթակցի հետ զրույցում նշեց, որ հստակ պայմանավորվածություններ չկան, թե որտեղով են անցնելու երթուղիները։ Երկու տեսականորեն հնարավոր ճանապարհ է դիտարկվում։ Մեկը` առավել կարճը, անցնում է Իջևանով, երկրորդը` ավելի երկարը` Մեղրիով։ Մասնագետի խոսքով`Երևանից (Հայաստան) Դերբենդ (Ռուսաստան) ճանապարհի երկարությունը Մեղրիով և Բաքվով շուրջ 1075 կմ է։ Միևնույն ժամանակ ավելի կարճ (մոտ 300 կմ–ով) ու շահավետ է Իջևանով անցնող ճանապարհը։

Երկաթուղային ճանապարհը Հայաստանից Ադրբեջան Իջևանով
© Sputnik / Shushanik Avdalyan
Երկաթուղային ճանապարհը Հայաստանից Ադրբեջան Իջևանով

«Հնարավոր է, որ թուրքական Դողուքափից շարժակազմերը մտնեն Ախուրյան, որտեղ ենթադրաբար կլինի անցակետը, որտեղ ստուգվելու են շարժակազմերը։ Այնուհետև վագոնները ճանապարհը կշարունակեն Գյումրիի, Իջևանի միջով (Ֆիոլետովո–Վանաձոր հատված)», – ասաց Հակոբյանը։

Բարխուդարլուից արդեն Ադրբեջանի տարածքով գնացքները կհասնեն Դերբենդ։ Հակոբյանը նշեց, որ ճանապարհի ընդհանուր երկարությունը Իջևանից մինչև Դերբենդ 750 կմ է։

Թուրքական Դողուքափից Ախուրյան մոտ 700 մետր է, Ախուրյանից Գյումրի` 13 կմ, իսկ Գյումրիից Իջևան` մոտ 100։ Նույնիսկ նման դասավորվածության պարագայում, եթե Թուրքիան միանա երթուղուն, Իջևանով ճանապարհը (Դողուքափից Դերբենդ ընդհանուր երկարությունը մոտ 870 կմ է – խմբ.) ավելի կարճ է, քան Նախիջևանով։

Երկաթուղային ճանապարհը Հայաստանից Ադրբեջան Նախիջևանով
© Sputnik / Shushanik Avdalyan
Երկաթուղային ճանապարհը Հայաստանից Ադրբեջան Նախիջևանով

Հակոբյանը նշեց, որ Իջևանով ճանապարհը ձեռնտու է ոչ միայն Հայաստանին, այդ ճյուղը` Ադրբեջանից Թուրքիա՝ Գյումրիով՝ Կարսից Բաքու, ամենամոտ երկաթուղային ճանապարհն է։

Նա հիշեցրեց, որ խորհրդային տարիներին Հայաստանը բեռների 80%–ը ստանում էր Ադրբեջանից երկաթուղային ճանապարհով։ Դերբենդից Բաքվով դեպի Ջուղա (ադրբեջանական) տանող ճանապարհը հասնում էր մինչև Նորաշեն, այնտեղից` Երևան։ Բեռների մնացած 20% Երևանը ստանում էր Թբիլիսիով։

Հակոբյանը նշեց, որ Հայաստանը Հարավային Կովկասի միակ երկիրն էր, որը 4 երկաթուղային սահմանակետ ուներ. Թուրքիայից` Ախուրյան, Վրաստանից` Այրում և Ադրբեջանից երկու հատ` Իջևանում և Երասխում։

Մասնավորապես խորհրդային տարիներին Ադրբեջանից Հայաստան երկաթգծով վառելու մազութ, դիզվառելիք, բենզին, յուղ, նավթամթերք էին տեղափոխում։ Երևանից Բաքու՝ ոսկյա իրեր, բույսերի քիմիական պաշտպանության նյութեր, մի շարք կենցաղային ապրանքներ։

Մեղրիի ճանապարհը Իջևանի ճանապարհին զիջում է միայն երկարությամբ և կանգառների թվով։ Երևանից շարժակազմերը կարող են հասնել Երասխ (Հայաստան), այնուհետև Նախիջևան Սադարակ–Նախիջևան–Ջուղա–Օրդուբադ (մոտ 190 կմ) երթուղով, կրկին մտնել Հայաստան Կարճևան–Նռնաձոր հատված, այնուհետև ուղևորվել Բաքվով Դերբենդ։

Այդ դեպքում Հայաստանը ստիպված կլինի Կարճևան–Նռնաձոր հատվածում վերականգնել երկաթուղային ճանապարհի 41 կմ–ը։ Իջևանի ուղղության պարագայում վերականգնելու ենթակա է 32 կմ` Ֆիոլետովո գյուղից մինչև Վանաձոր ընկած ճանապարհահատվածը։ 

320
թեգերը:
երկաթուղի, Ռուսաստան, Ադրբեջան, Թուրքիա, Հայաստան
Ըստ թեմայի
Չի բացառվում, որ Հայաստանն օգտագործի Կասպից ծովում ադրբեջանական նավահանգիստները. Օվերչուկ
«Մեզ անհրաժեշտ է ճանապարհ, խոսքը դեռ երկաթուղու մասին է». Փաշինյան
Հայաստանն ու Վրաստանը վերականգնել են երկաթուղային հաղորդակցությունը
Արմեն Չարչյան

Ինչու դատարանը չի հրապարակում Արմեն Չարչյանի վերաբերյալ որոշումը․ պաշտպանն իր վարկածն ունի

163
(Թարմացված է 23:57 19.06.2021)
Չարչյանի պաշտպանները հայտարարել էին, որ անգամ վարույթ իրականացնող մարմինը կասկած ունի, որ ձայնագրության մեջ լսվող ձայնը Արմեն Չարչյանինն է:

ԵՐԵՎԱՆ, 19 հունիսի – Sputnik. Երևան քաղաքի Ավան և Նոր Նորք վարչական շրջանների ընդհանուր իրավասության դատարանը «Իզմիրլյան» բժշկական կենտրոնի տնօրեն Արմեն Չարչյանի ձերբակալության իրավաչափության վերաբերյալ որոշումը պետք է հրապարակեր այսօր՝ ժամը 20։00-ին, սակայն հրապարակումից առաջ՝ ժամը 19։34-ին, պաշտպանները դատավորի օգնականից տեղեկացել են, որ նշանակված ժամին որոշման հրապարակումը տեղի չի ունենալու։ Տեղեկությունը հայտնում է Չարչյանի պաշտպան Էրիկ Ալեքսանյանը։

«Իսկ թե կոնկրետ երբ կհրապարակվի դատական ակտը, դատավորի աշխատակազմից որևէ տեղեկություն չի հաղորդվել և չի հաղորդվում մինչ այս պահը: Այս ամենը թույլ է տալիս պաշտպանության կողմին ողջամտորեն ենթադրելու, որ դատարանի նկատմամբ հենց այս պահին բիրտ ճնշումներ են գործադրվում իշխանության համար ցանկալի որոշում կայացնելու առումով։ Սա ևս մեկ անգամ հաստատում է այն հանգամանքը, որ պարոն Չարչյանի նկատմամբ իրականացվում է քաղաքական հետապնդում։ Հորդորում ենք դատավորին հավատարիմ մնալ իր երդմանը, մերժել բոլոր տեսակի ճնշումները և գործել բացառապես օրենքով»,- Facebook-ի իր էջում գրել է նա։

Նշենք, որ այսօր դատարանում տեղի էր ունեցել Արմեն Չարչյանի ձերբակալության դեմ բողոքի քննությունը:

Գործով քննիչը և դատախազը չէին ներկայացել դատական նիստին։ Քննության ավարտից հետո պաշտպանները հայտնել էին, որ Չարչյանի ձերբակալության իրավաչափության վերաբերյալ դատական ակտը կհրապարակվի 20։00-ին։

Չարչյանի պաշտպաններ Էրիկ Ալեքսանյանը և Արամ Վարդևանյանը լրագրողների հետ զրույցում հայտարարել էին, որ գործ ունեն բացառապես քաղաքական հետապնդման հետ, քանի որ ձերբակալման այն հիմքը, այն նպատակները, որոնք նշված են, աղերս չունեն իրավաբանության հետ։

Նրանք արձանագրել էին, որ վարույթ իրականացնող մարմինը երեկ որոշում է կայացրել ձայնագրային փորձաքննություն նշանակելու մասին և ի թիվս այլ հարցերի հարց է առաջադրել` արդյո՞ք այդ ձայնագրության մեջ խոսող անձն Արմեն Չարչյանն է: Ըստ նրանց` ստացվում է, որ անգամ վարույթ իրականացնող մարմինը կասկած ունի, որ այդ անձն Արմեն Չարչյանն է:

Հիշեցնենք` երեկ համացանցում հրապարակվեց մի ձայնագրություն, որում Չարչյանն ասում է` տնօրինությունը շատ կոշտ, խիստ համարժեք վերաբերմունք է ցուցաբերելու նրանց նկատմամբ, ովքեր ընտրություններին չեն մասնակցի։

Ավելի ուշ հայտնի դարձավ, որ ԱԺ արտահերթ ընտրություններին մասնակցող կուսակցությունների դաշինքի պատգամավորության թեկնածուների ցուցակում ընդգրկված Չարչյանը ձերբակալվել է իր ղեկավարած կենտրոնի աշխատակիցներին ԱԺ արտահերթ ընտրություններին մասնակցելուն առերևույթ հարկադրելու դեպքի առթիվ ՀՀ ՀՔԾ-ում քննվող քրեական գործի շրջանակում։

Չարչյանն ընդունել է ձերբակալման օրը գործընկերների հետ ունեցած զրույցի փաստը. Աբրահամյան

163
թեգերը:
Դատարան, Արմեն Չարչյան, Հայաստան
Ըստ թեմայի
Պրոֆեսոր Չարչյանը պետք է անհապաղ ազատ արձակվի. Արա Բաբլոյան
Գորիսի «Գուսան Աշոտ» մշակույթի կենտրոնի տնօրենը կալանավորվել է
Ընտրողներին կաշառք տալու կասկածանքով 3 մարդու են ձերբակալել, մեկը պատգամավորի թեկնածու է