Նիկոլ Փաշինյանի և Իրակլի Ղարիբաշվիլիի հանդիպումը. արխիվային լուսանկար

Փաշինյանը շնորհավորական ուղերձ է հղել Վրաստանի վարչապետին

47
(Թարմացված է 14:19 26.05.2021)
ՀՀ վարչապետի պաշտոնակատարը նշել է, որ մեր երկրները շատ անելիքներ ունեն ինչպես երկկողմ հարաբերություններում, այնպես էլ տարածաշրջանային գործընթացներում:

ԵՐԵՎԱՆ, 26 մայիսի – Sputnik. ՀՀ վարչապետի պաշտոնակատար Նիկոլ Փաշինյանը շնորհավորական ուղերձ է հղել Վրաստանի վարչապետ Իրակլի Ղարիբաշվիլիին՝ Ազգային տոնի առթիվ:

«Ավելի քան մեկ դար առաջ, արտահայտելով սեփական անկախ պետականությունն ունենալու վերաբերյալ իր անբեկանելի կամքը, բարեկամ վրաց ժողովուրդն այսօր էլ հետևողականորեն շարունակում է վերահաստատել իր այդ ձգտումը՝ կառուցելով և զարգացնելով Վրաստան պետությունը։

Հարգելի՛ պարոն վարչապետ, Հայաստանը և Վրաստանը իրենց պետականաշինության ընթացքում մշակել և ներդրել են այնպիսի փոխգործակցության նախադրյալներ, որոնց իրականացմամբ հնարավոր է եղել մեր երկրների միջև հարաբերությունները լավագույնս պահպանել և զարգացնել»,–ասված է Փաշինյանի շնորհավորական ուղերձում:

Նա նշել է, որ մեր երկրները շատ անելիքներ ունեն ինչպես երկկողմ հարաբերություններում, այնպես էլ տարածաշրջանային գործընթացներում: «Այս համատեքստում աներկբա է Հայաստանի և Վրաստանի միջև համագործակցությունը խորացնելու և այն նորանոր ձեռքբերումներով հարստացնելու մեր հանձնառությունը»,–ասել է ՀՀ վարչապետի պաշտոնակատարը:

Պատերազմի ավարտից հետո Վրաստանը տարածաշրջանային զարգացումներում շահագրգիռ կողմ է դարձել

Փաշինյանը Ղարիբաշվիլիին մաղթել է հաջողություն պետական գործունեության մեջ, իսկ եղբայրական Վրաստանի ժողովրդին՝ բարգավաճում և առաջընթաց։

47
թեգերը:
Իրակլի Ղարիբաշվիլի, տոն, Անկախության օր, Վրաստանի Հանրապետություն, Հայաստան, Նիկոլ Փաշինյան
Բաքվի օդանավակայան

Ադրբեջանը լրագրող Մոսակովսկուն չի թույլատրել Եվրո-2020–ի խաղերին հայկական կնիքի պատճառով

75
(Թարմացված է 23:32 11.06.2021)
Ադրբեջանական սահմանին Մոսակովսկուն թույլ չեն տվել անցնել և հաջորդ չվերթով հետ են ուղարկել Ռուսաստան։

ԵՐԵՎԱՆ, 11 հունիսի – Sputnik. Ռուսաստանցի մեկնաբան Միխայիլ Մոսակովսկուն թույլ չեն տվել մուտք գործել Ադրբեջան` Բաքվում կայանալիք Եվրո-2020-ի խաղերին` անկախ նրա հավատարմագրման առկայությունից։ Այս մասին լրագրողը հայտնել է իր տելեգրամյան ալիքում։

Ադրբեջանական սահմանին Մոսակովսկուն թույլ չեն տվել անցնել և հաջորդ չվերթով հետ են ուղարկել Ռուսաստան։ Մոսակովսկին նշում է, որ չգիտի տեղի ունեցածի պատճառների մասին, քանի որ սահմանապահներն իր հարցերին չեն պատասխանել։

«Նրանց ուշադրությունը գրավեց անձնագրում Հայաստանի կնիքը։ Խնդրեցին սպասել։ Այնուհետև ուղեկցեցին  դեպի Մոսկվա մեկնող չվերթի մուտքի մոտ։ Որևէ հարցի չեն պատասխանել», – գրել է լրագրողը։

Մոսակովսկին նշել է, որ եղել է Արցախում մի քանի տարի առաջ ֆուտբոլային մրցաշարի մասնակցելու նպատակով։ Սակայն նա վստահ չէ, որ հենց դա է եղել մուտքը մերժելու պատճառը։

«Եթե պատճառը դա է, այլ ոչ թե նախանցած տարվա հայկական կնիքը, ապա ադրբեջանցի սահմանապահներին հարցեր չունեմ։ Հարցեր ունեմ կազմկոմիտեին։ Հավատարմագրման համար բոլոր հայտերը ստուգում են ուժայինները»,– գրել է նա։

Ղարաբաղում մրցաշար եմ անցկացրել և հպարտ եմ. Նոբել Առուստամյանը` Բաքվի պահվածքի մասին

Ավելի վաղ նման իրավիճակ էր տեղի ունեցել Նոբել Առուստամյանի հետ. նրան չէին հավատարմագրել ԼՂՀ իր այցի պատճառով։ Սակայն ՈւԵՖԱ–ի և ՌԴ ԱԳՆ–ի միջամտությունից հետո Ադրբեջանը նրան հավատարմագրեց, բայց արգելեց լուսաբանել Բաքվում կայանալիք խաղերը։

75
թեգերը:
Ռուսաստան, Լրագրող, Ադրբեջան
Ըստ թեմայի
Մարիա Զախարովան մեկնաբանել է Նոբել Առուստամյանի շուրջ ստեղծված իրավիճակը
«Փյունիկը» գիտի` ինչ է պետք անել, որ Ադրբեջանը վերանայի Առուստամյանի վերաբերյալ որոշումը
Մի շարք ֆուտբոլիստներ հեռացել են «Փյունիկ-2»–ից. ակումբը հրապարակել է նրանց անունները
ՌԴ փոխվարչապետ Ալեքսեյ Օվերչուկ

Չի բացառվում, որ Հայաստանն օգտագործի Կասպից ծովում ադրբեջանական նավահանգիստները. Օվերչուկ

405
Դիտարկվում է Ադրբեջանի ու Նախիջևանի ինքնավար հանրապետության միջև Հայաստանի տարածքով հաղորդակցության հնարավորությունը, ինչպես նաև Ադրբեջանի տարածքով Հայաստանից Ռուսաստան երթևեկելու հնարավորությունը:

ԵՐԵՎԱՆ, 11 հունիսի -Sputnik. Չի բացառվում, որ Հայաստանը կարողանա օգտվել Կասպից ծովում գտնվող Ադրբեջանի նավահանգիստներից։ «Ռոսիյսկայա գազետային» տված հարցազրույցում նման կարծիք է հայտնել ՌԴ փոխվարչապետ Ալեքսեյ Օվերչուկը:

Նրա խոսքով` բարի կամքի առկայության դեպքում Անդրկովկասում տրանսպորտային հաղորդակցությունը կապաշրջափակվի, առևտուրը կզարգանա, երկու երկրների տնտեսությունները զարգացման հզոր ազդակ կստանան ու մարդկանց կյանքը կբարելավվի: Ռուսաստանի փոխվարչապետը նշել է, որ նման բարի կամք կա։

Հայաստանի վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի համատեղ եռակողմ հայտարարության հիման վրա ստեղծվել է եռակողմ աշխատանքային խումբ` Հայաստանի Հանրապետության, Ադրբեջանի Հանրապետության ու Ռուսաստանի Դաշնության փոխվարչապետների համատեղ նախագահությամբ։ Խմբին հանձնարարվել է զբաղվել տարածաշրջանում տնտեսական ու տրանսպորտային կապերի ապաշրջափակմամբ:

«Ամենասկզբից գործընկերների հետ պայմանավորվել ենք, որ առողջ բանականության վրա հիմնված մոտեցում ենք ընտրում։ Ադրբեջանի ու Հայաստանի հարաբերությունները շատ բարդ են ու բազմաշերտ։ Շատերը սարսափելի վիշտ են ապրել, լքել հայրենի հողը, ամենամտերիմ մարդկանց կորցրել։ Հիշողությունն այդ մասին միշտ մնում է։ Այսօր կարևոր է այնպես անել, որ դժբախտությունը կրկին մարդկանց տներ չվերադառնա, իսկ դրա համար պետք է վերքերը բուժել, սովորել խոսել միմյանց հետ և միասին աշխատել ընդհանուր խաղաղ ապագայի ստեղծման ուղղությամբ»,- ասել է Օվերչուկը։

ՀՀ–ն ու Իրանը աշխատում են Պարսից ծոց-Սև ծով տրանսպորտային միջանցք ստեղծելու ուղղությամբ

Նրա խոսքով՝ իրականությունն այն է, որ Ռուսաստանի համար այդ մոտ և բարեկամ ժողովուրդները եղել են, կան և կլինեն հարևաններ։ Այնտեղ ապրող մարդիկ ուզում են խաղաղ ապրել, մեծացնել երեխաներին և ուրախանալ թոռներով։  Տարածաշրջանում տնտեսական ու տրանսպորտային կապերի ապաշրջափակման բանակցությունների բոլոր մասնակիցները հենց դրանից են ելնում։ Բոլորն ուզում են ավելի լավ կյանք կառուցել իրենց ժողովուրդների համար։ Ռուսաստանն օգնում է  նրանց այդ հարցում։

Հեռակա բանակցությունները փոխվարչապետների մակարդակով սկսվել են 2021 թվականի հունվարին, երեք պատվիրակությունները բանակցությունների կլոր սեղանի շուրջ նստել են հունվարի 30-ին։

Դիտարկվում են Հայաստանի տարածքով Ադրբեջանի ու Նախիջանի ինքնավար հանրապետության արևմտյան շրջանների միջև տրանսպորտային հաղորդակցության հնարավորությունները։ Միաժամանակ լուծվում են Հայաստանից դեպի Ռուսաստան Ադրբեջանի տարածքով կամ Հայաստանից ու Ռուսաստանից դեպի Իրան Նախիջևանով երթևեկելու հարցերը։

«Բացի այդ, Հայաստանը կարող է Կասպից ծովում ադրբեջանական նավահանգիստների օգտագործման հնարավորություն ունենալ դեպի Կենտրոնական Ասիայի երկրներ ու Կենտրոնական Ասիայի երկրներից Հայաստան բեռների տեղափոխման համար», - նշել է Օվերչուկը:

Եռակողմ աշխատանքային խմբի շրջանակում առարկայական խոսակցություն է ընթանում տարածաշրջանի ապաշրջափակման մասին։ Այս խնդրի լուծման բանալին Հայաստանի ապաշրջափակումն է, անկախացումից ի վեր Հայաստանը  փաստացի շրջափակման մեջ է։

Հայաստանը դեպի ծով ելք չունի։ Հայաստանը Թուրքիայի ու Ադրբեջանի հետ շատ բարդ պատմական հարաբերություններ ունի, ու այդ երկրների հետ դրա սահմաններն արգելափակված են։ ՀՀ–ն Իրանի հետ ցամաքային սահմանի փոքր հատված ունի, բայց այնտեղ բարդ ռելիեֆ է ու ճանապարհները վատն են, դա խոչընդոտում է լիարժեք տրանսպորտային հաղորդակցությանը։ Բացի այդ, Իրանը սահմանափակող միջոցների տակ է, ինչը նույնպես ազդում է իրավիճակի վրա։

Հայաստանն արտաքին աշխարհի հետ տրանսպորտային հաղորդակցություն իրականացնելու հնարավորություն ունի միայն Վրաստանի տարածքով, որտեղ ելք կա դեպի ծովային նավահանգիստներ։ Վերին Լարս միջազգային անցակետը միակ ցամաքային երթուղին է դեպի Ռուսաստան: Այս ավտոմոբիլային անցակետը սահմանափակ թողունակություն ունի ու տարվա ընթացքում մի քանի շաբաթ եղանակային պայմանների պատճառով փակ է լինում: Այնտեղ կուտակվում են հարյուրավոր բեռնատարներ, որոնք սպասում են, թե երբ ճանապարհը կբացվի, երթևեկությունը կվերականգնվի, ու հնարավոր կլինի բեռները տեղափոխել։

Գնացքն արդեն մեկնել է, կամ ճանապարհների ապաշրջափակումից կշահեն Ադրբեջանը, Թուրքիան...

«Այս նեղ հատվածը զսպում է տնտեսական զարգացումը, բացասական ազդեցություն է թողնում միգրացիոն գործընթացների վրա ու թույլ չի տալիս Հայաստանին լիովին բացահայտել իր ներուժն ու բարգավաճ երկիր դառնալ», - ասել է ՌԴ փոխվարչապետը:

Տարածաշրջանում տրանսպորտային շրջափակման վերացումը կարևոր է Ռուսաստանի, ԵԱՏՄ-ի և բոլոր հարևան երկրների համար։  Ընդ որում` Հայաստանը ոչ միայն կվերածվի կարևորագույն միջազգային տրանսպորտային հանգույցի, որը Պարսից ծոցի իրանական նավահանգիստները կապում է սևծովյան նավահանգիստների, ինչպես նաև Բալթիկայի ու Խաղաղ օվկիանոսի ռուսական նավահանգիստների հետ, այլև կկարողանա ձեռնամուխ լինել սեփական արտադրության ավելացմանը, քանի որ սպառման նոր շուկաներ հասանելի կլինեն, իսկ արտահանումը զսպող գործոններն անցյալում կմնան:

Ժամանակակից պատմության մեջ նման հնարավորություններ դեռևս երբեք չեն եղել, ու անկասկած, այս նոր կոնֆիգուրացիայում հիմնական շահառուները կլինեն Ադրբեջանն ու Հայաստանը։ Ռուսաստանն այդ հարցում օգնում է նրանց և տարածաշրջանի մյուս բոլոր երկրներին։

Աշխատանքային խմբի շրջանակում ուսումնասիրվել են Ադրբեջանն ու Հայաստանը միացնող երկաթուղային ու ավտոմոբիլային բոլոր հնարավոր երթուղիները։ Գարնանը այդ երկրների սահմանամերձ շրջաններում աշխատել են տրանսպորտի նախարարության, «Ռոսավտոդորի» ու Ռուսական երկաթուղիների փորձագետները։ Նրանք ուսումնասիրել են յուրաքանչյուր ավտոմոբիլային և երկաթուղային ճանապարհ, գնահատել երկու երկրների միջև առևտրային փոխադրումների իրականացման հնարավորությունները։ Գնահատվել է ճանապարհների ծածկույթի, երկաթուղիների, կամուրջների, ճանապարհների տակ ընկած խողովակների վիճակը։

Սակայն գրեթե բոլոր հնարավոր երթուղիները անպիտան են դարձել, ու տրանսպորտային հաղորդակցության վերականգնումը լուրջ ներդրում է պահանջում։  Այդ փորձագիտական աշխատանքի արդյունքում կողմերը կարողացան նախանշել տրանսպորտային հաղորդակցության ապաշրջափակման հետագա քայլերը։

Աշխատանքի մի մեծ շերտը կապված է նաև իրավական հարցերի հետ։ Ադրբեջանի և Հայաստանի միջև չկան դիվանագիտական հարաբերություններ, չկան անցակետեր, մաքսակետեր, այն ամենը, ինչ սովորաբար լինում է հարևան երկրների միջև։ Վերջին 30 տարիների ընթացքում և՛ Ադրբեջանը, և՛ Հայաստանն արել են ամեն ինչ, որ նրանց միջև երթևեկությունն անհնար լինի։ Պետք է լուծել այդ կուտակված խնդիրները։

Իրականացվում է միջազգային բոլոր նորմատիվ իրավական ակտերի գույքագրում: Առաջին հերթին դա վերաբերում է ԱՊՀ-ին, որովհետև և՛ Հայաստանը, և՛ Ադրբեջանը մտնում են դրա մեջ։ Այնպես է ստացվել, որ ամեն անգամ, երբ ինչ-որ բազմակողմ համաձայնագրեր են ստորագրվում, Հայաստանի և Ադրբեջանի ներկայացուցիչները միմյանց նկատմամբ վերապահումներ են անում, որոնց համաձայն ստորագրված պայմանագրերը չեն ազդում հակառակ կողմի վրա։ Այդ վերապահումները, որոնք խանգարում են երկու երկրների միջև տրանսպորտային հաղորդակցության իրականացմանը, պետք է հանվեն։

Եռակողմ աշխատանքային խմբի աշխատանքներն այս պահին չեն շարունակվում. Գրիգորյանն ասաց` ինչու

Ավելի քան երեսուն տարի երկու երկրների պետական ապարատները համակարգված աշխատել են միմյանց դեմ, ու այժմ դրանք պետք է հանգուցալուծում փնտրեն ու փոխզիջումներ գտնեն։ Մարդկանց համար դա դժվար է, քանի որ նրանց վրա դրված է իրենց երկրների նախորդ կյանքի ու հարաբերությունների պատմության ամբողջ բեռը։

«Երբ բոլոր այդ լուծումները գտնվեն, ու Ադրբեջանն ու Հայաստանը որոշեն, որ իրենք պատրաստ են դրանք իրականացնել, ապա հնարավոր կլինի անցնել ճանապարհների վերականգնմանը և դրանից հետո վերսկսել տրանսպորտային հաղորդակցությունը։ Կարևորը լավ ապագա տեսնելն է, ու իհարկե, կարևոր է, որ հիմա ոչ ոք չձեռնարկի քայլեր, որոնք էլ ավելի են բարդացնում առանց այդ էլ բարդ հարաբերությունները»,- ընդգծել է Օվերչուկը:   

Հիշեցնենք, որ տարածաշրջանային հաղորդակցությունների ապաշրջափակման մասին նշված  է Հայաստանի, Ռուսաստանի ու Ադրբեջանի ղեկավարների համատեղ հայտարարության մեջ, որը ստորագրվել է 2021 թվականի հունվարի 11-ին Մոսկվայում կայացած բանակցությունների արդյունքում: Բանակցությունների վարելու նպատակով փոխվարչապետների մակարդակով ստեղծվել է եռակողմ աշխատանքային խումբ։

Սահմանի միջադեպերը չեն նպաստում Երևանի և Բաքվի հարաբերությունների կարգավորմանը. Զախարովա

405
թեգերը:
ապաշրջափակում, Ռուսաստան, Ադրբեջան, Հայաստան
Ըստ թեմայի
ԼՂ–ի մասին հայտարարությունների ֆոնին Կարասինն ու Աբաշիձեն քննարկել են ապաշրջափակման թեման
«Մեզ անհրաժեշտ է ճանապարհ, խոսքը դեռ երկաթուղու մասին է». Փաշինյան
Թուրքական ապրանքների արգելք և ճանապարհների բացում. ի՞նչ է մտածում բիզնեսը իրավիճակի մասին
Ընտրական տեղամաս. արխիվային լուսանկար

Բադասյանն ընտրական 9 հանցագործություն է ներկայացրել, որոնք սահմանված են գործող օրենքով

0
Քրեական օրենսգրքի մի շարք հոդվածներ անդրադառնում են ընտրական հանցագործություններին` սահմանելով դրանք։

ԵՐԵՎԱՆ, 12 հունիսի - Sputnik. ՀՀ արդարադատության նախարարի պաշտոնակատար Ռուստամ Բադասյանը ներկայացրել է, թե ընտրական ո՞ր հանցագործություններն են սահմանված քրեական գործող օրենսգրքով։ Նա Facebook–ի իր էջում գրառում է արել` անդրադառնալով գործող օրենսգրքով կարգավորվող 9 ընտրական հանցագործություններին։

Այսպիսով, ընտրական հանցագործություն է համարվում ընտրակաշառք տալը կամ ստանալը։ Արգելվում է ինչպես դրամական միջոցներ, այնպես էլ որևէ գույք կամ գույքի նկատմամբ իրավունք, արժեթղթեր և ցանկացած այլ առավելություն (ինչպես, օրինակ, աշխատանքի ընդունելը կամ որոշակի ծառայություններ մատուցելը) տրամադրելը, խոստանալը և առաջարկելը, ինչպես նաև դրանք ստանալը կամ պահանջելը։

Կաշառք ստացող անձն ազատվում է պատասխանատվությունից, եթե մինչև կաշառք ստանալու մասին իրավապահներին հայտնի դառնալը (բայց ոչ ուշ, քան եռօրյա ժամկետում) այդ մասին կամովին հայտնել է քրեական հետապնդման մարմիններին (154.2-րդ հոդվածի 1-ին և 2-րդ մասեր)։

Հանցագործություն է համարվում նաև ընտրակաշառքի միջնորդությունը. սա դրսևորվում է ընտրակաշառք տվողի և ընտրակաշառք ստացողի միջև ընտրակաշառքի շուրջ համաձայնության գալուն կամ արդեն կայացած համաձայնության իրականացմանը նպաստելով (154.9-րդ հոդված)։

Պատասխանը լինելու է կոշտ․ Փաշինյանը՝ ընտրակաշառք բաժանելու մասին

Ընտրական հանցագործություն է նաև նախընտրական քարոզարշավը բարեգործության հետ համատեղելը։ Արգելվում է թեկնածուի, կուսակցության անդամի կամ լիազորված անձի կողմից անձամբ կամ նրա անունից կամ որևէ այլ եղանակով կամ բարեգործության անվան տակ ընտրողներին անհատույց կամ արտոնյալ պայմաններով դրամ, սննդամթերք տալը կամ ծառայություններ մատուցելը (154.2-րդ հոդվածի 5-րդ մաս)։

Նախընտրական քարոզչությանը մասնակցելուն կամ մասնակցելուց հրաժարվելուն հարկադրելը կամ նախընտրական քարոզչությանը մասնակցելուն խոչընդոտելը նույնպես չի թույլատրվում (149.1-րդ հոդված): Բացի այդ, արգելվում է նաև ընտրողին հարկադրել, որ վերջինս կողմ կամ դեմ քվեարկի կուսակցություններից (դաշինքներից) որևէ մեկի օգտին, կամ մասնակցի/հրաժարվի մասնակցել ընտրություններին (154.2-րդ հոդվածի 3-րդ մաս)։

Ընտրական հանցագործություն է համարվում նաև քվեարկության գաղտնիությունը խախտելը, որը կարող է կատարվել ընտրողին քվեարկության արդյունքը հայտնելուն հարկադրելու, քվեարկության խցիկ մուտք գործելու միջոցով, ինչպես նաև ցանկացած այլ եղանակով։

Հանցանք են համարվում նաև ընտրողի կողմից երրորդ անձանց համար տեսանելի եղանակով քվեարկելը (154-րդ հոդված), ինչպես նաև քաղաքացու ընտրական իրավունքի ազատ իրականացմանը կամ ընտրական հանձնաժողովի աշխատանքին խոչընդոտելը (149-րդ հոդված)։

Մեկից ավելի անգամ կամ այլ անձի փոխարեն քվեարկել չի կարելի (153-րդ հոդված)։

Եվ, վերջապես, ընտրական հանցանք է համարվում ընտրությունների կամ քվեարկության արդյունքները կեղծելը (150-րդ հոդված):

Ոչ մեկի մտքով չպետք է անցնի իշխանության «տիրանալ» ընտրակաշառքով. Ռոմանոս Պետրոսյան

Նշենք, որ Հայաստանում հունիսի 7–ից մեկնարկել է պաշտոնական քարոզարշավը։

Արտահերթ խորհրդարանական ընտրությունները տեղի են ունենալու հունիսի 20–ին։ Դրանց մասնակցում է 21 կուսակցություն և 4 դաշինք։

0
թեգերը:
Ռուստամ Բադասյան, հանցագործություն, Ընտրություններ
Ըստ թեմայի
Քննությունը կպարզի ՔՊ-ի քարոզարշավին խոչընդոտելու դեպքի հանգամանքները
Ծեծկռտուք քարոզարշավի ժամանակ. մասնակիցների մեջ են եղել Հակոբ Արշակյանը և ՔՊ–ի 4 անդամներ
«Հանրապետության» համար քարոզարշավը լավ է ընթանում. կուսակցությունը նորամուծություն է արել