ԵՐԵՎԱՆ, 14 հոկտեմբերի – Sputnik. Իրանը ողջունում է Հայաստանի և Ադրբեջանի միջև հակամարտության կարգավորմանն ու Լեռնային Ղարաբաղում խաղաղ բնակիչների մահերը կանխելուն ուղղված ցանկացած քայլ, Tasnim–ի փոխանցմամբ՝ այս մասին հայտարարել է Իրանի վարչակազմի ներկայացուցիչ Ալի Ռաբին։
«Ինչպես բազմիցս հայտարարել ենք, մենք ողջունում ենք ցանկացած նախաձեռնությունը, որը կարող է դադարեցնել Հայաստանի և Ադրբեջանի միջև պատերազմը, հրադադարի ռեժիմ հաստատել և կանխել մարդկային զոհերը», – նշել է նա։
Մամուլի քարտուղարը հիշեցրել է ճգնաժամի կարգավորմանն ուղղված` Իրանի պաշտոնյաների և տարածաշրջանի մյուս երկրների բարձրաստիճան ներկայացուցիչների միջև ընթացող խորհրդակցությունների մասին, նշված է կառավարության պաշտոնական կայքում։
«Մարտական գործողությունների ամենասկզբից և գործընկերների հետ Իրանի նախագահի և արտգործնախարարի բանակցությունների ընթացքում մենք հայտնել ենք մեր տեսակետը։ Բանակցություններ ենք անցկացրել տարածաշրջանի այլ երկրների պաշտոնական ներկայացուցիչների հետ», – ասել է նա։
Հայաստանում Իրանի դեսպանության ռազմական կցորդն այցելել է պաշտպանության նախարարություն
Հարցի վերաբերյալ պաշտոնական դիրքորոշումն արդեն հնչել է, հավելել է Ռաբին։
«Տա Աստված, որ Իրանի մարդասիրական ջանքերը պտուղներ տան։ Մենք տարածաշրջանի այն սակավաթիվ խաղացողներից ենք, որոնք լավ հարաբերություններ են պահպանում ճգնաժամում ներգրավված բոլորի` ներառյալ հակամարտող կողմերի ու տարածաշրջանի առանցքային երկրների հետ։ Մենք նաև երկկողմանի լավ կապեր ունենք այդ երկրների հետ», – ասել է նա։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 14-ի ժամը 11:00-ի դրությամբ` հակառակորդի կրակոցների հետևանքով զոհվել են 532 զինծառայողներ և 31 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 5486 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 19 ինքնաթիռ, 16 ուղղաթիռ, 176 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 541 տանկ և ՀՄՄ:
«Ես կրակի տակ ամենաթանկ բանն եմ թողել՝ որդուս». ինչպես են ապրում արցախցիները Ջրամբարում
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։
Նույնիսկ ճանճը չի կարող խուսափել հայուհու դիպուկ հարվածից. արցախյան պատերազմի կանացի դեմքը