Հենզել, Մկոյան

«Վստահ եմ՝ թիրախը ես էի». Ախալքալաքում փորձել են պայթեցնել Հենզել Մկոյանի եղբոր մեքենան

137
(Թարմացված է 21:55 22.08.2020)
Պատգամավորը եղբոր մեքենայի պայթյունի փորձը կապում է իր գործունեության հետ և վստահ է, որ թիրախն ինքն է եղել, ոչ թե եղբայրը:

ԵՐԵՎԱՆ, 22 օգոստոսի - Sputnik. Ախալքալաքում փորձել են պայթեցնել Վրաստանի խորհրդարանի պատգամավոր, իշխող «Վրացական երազանք-Ժողովրդավարական Վրաստան» կուսակցության անդամ Հենզել Մկոյանի եղբոր՝ Մարտուն Մկոյանի Mersedes մակնիշի ավտոմեքենան։ Այս մասին Facebook–ի ուղիղ եթերում հայտնել է պատգամավորը։

Նա եղբոր մեքենայի պայթյունի փորձը կապում է իր գործունեության հետ և վստահ է, որ թիրախն ինքն է եղել, ոչ թե եղբայրը:

Պատգամավորի խոսքով՝ պայթյունն այնքան ուժգին է որոտացել, որ այն լսել են 3 կմ շառավղով ապրողները։ Բոլորը վախեցել են։ Մոտակայքում բոլոր ծառերը վնասվել են։

«Այն ամենն, ինչ կատարվում է մեր ընտանիքի հետ, նախապես մտածված է: Երեկ երեկոյան եղբորս մեքենայով ես 2 անգամ իջել եմ ՀԷԿ, երևի կարծել են, որ մեքենայում ես եմ»,–նշել է Մկոյանը։

Պատգամավորն ահազանգել է, որ ինքն ու իր ընտանիքն անպաշտպան են մնացել, քանի որ ոչ ոք ուշադրություն չի դարձնում:

Ավելի վաղ հայտնել էինք, որ անհայտ անձինք սպառնալիքներ էին հնչեցրել Հենզել Մկոյանի ու նրա ընտանիքի անդամների հասցեին, ինչպես նաև փորձել նրանից 5 մլն դոլար շորթել:

Մկոյանն ու նրա ընտանիքը սարսափելի վախեցած են։ Պատգամավորը պահանջում է, որ իր հարցով զբաղվի գլխավոր դատախազությունը, ոչ թե տեղի ոստիկանությունը, ուր վերաուղղվել է հայցը։ Ավելին, նա դիմել է Վրաստանում հավատարմագրված բոլոր դեսպաններին՝ խնդրելով օգնել փրկել իր ընտանիքի անդամներին։

2020թ․-ի հուլիսի 20-ի երեկոյան անհայտ անձը մեսենջերով զանգել է Մկոյանին, խոսել է ռուսերեն՝ կովկասյան առոգանությամբ, Մկոյանին ասել է, որ հեռանա քաղաքականությունից, սուսուփուս նստի և ոչ մեկի հետ չշփվի, հակառակ դեպքում կզրկվի ամենահարազատ մարդուց։

Երկրորդ զանգը՝ արդեն WհatsApp հավելվածով, Մոսկվայից է եղել (ըստ հեռախոսահամարի)։ Խոսել են դարձյալ ռուսերեն՝ կովկասյան առոգանությամբ։ Այս անգամ խոշոր գումար են պահանջել։

Երբ Մկոյանը հարցրել է, թե ինչ կլինի, եթե չվճարի, շորթողը հայտարարել է, որ արդեն 15 տարի նստել է բանտում, և եթե իր պահանջը չկատարվի, կսպանի պատգամավորին ու ևս 20 տարի կնստի։ Երկրորդ անգամ պատգամավորի հետ երկու հեգի են խոսել, երկուսն էլ՝ քրեական աշխարհին հատուկ ժարգոնով։

Նշվում է, որ ընդդիմությունը մի քանի ամիս շարունակ հոգեբանական ճնշում է գործադրել պատգամավորի վրա։

Հիշեցնենք, որ ապրիլի 2-ին ընդդիմությունը պահանջել էր պատգամավորական մանդատից զրկել նաև Մկոյանին։ Նման պահանջ ներկայացնելու առիթ էր դարձել զենքի կիրառմամբ ծեծկռտուքը, որը տեղի էր ունեցել մարտի 26-ին՝ ժամը 15։40-ի սահմանում։

Ախալքալաքում կռվել են պատգամավորի եղբայրն ու նախկին պատգամավորի որդին

Ի սկզբանե հայտնում էին, որ Վրաստանում իշխող «Վրացական երազանք – ժողովրդավարական Վրաստան» կուսակցության մեծամասնական պատգամավոր Հենզել Մկոյանի և խորհրդարանի նախկին պատգամավոր Սամվել Պետրոսյանի կողմնակիցների միջև զենքի կիրառմամբ բախում է տեղի ունեցել։ Հետո պարզվել էր, որ կռվել են հենց Մկոյանն ու Պետրոսյանը։ Ոստիկանությունը բերման էր ենթարկել Պետրոսյանին ու նրա 19-ամյա զարմիկին։ Նրանց 7 տարվա ազատազրկում է սպառնում։ Բայց ընդդիմությունը տեղի ունեցածի մեղավոր է համարում Մկոյանին ու դատախազությանը կոչ է արել զբաղվել նրանով։

Մեկ այլ վարկածով՝ բախման պատճառը Սամցխե-Ջավախքում Պետրոսյան և Մկոյան տոհմերի երկարամյա հակամարտությունն է։

137
թեգերը:
հայ, պայթյուն, Պատգամավոր, Հենզել Մկոյան, Ախալքալաք, Վրաստանի Հանրապետություն
Ըստ թեմայի
Վրաստանում սկանդալ է հասունանում Հայաստան եկող ճանապարհի պատճառով. ի՞նչ կապ ունի Մկոյանը
Թեժ ընտրություններ. հայ պատգամավորների վրացական երազանքը
Հայաստանն առաջինը կլինի. ինչն է խանգարում, որ Վրաստանի խորհրդարանի խոսնակն այցելի Երևան
Ռուբեն Մելքոնյան

Ռուսաստանը Թուրքիային զսպելու համարժեք գործիքակազմ ունի. թուրքագետ

299
(Թարմացված է 18:02 28.09.2020)
ԵՊՀ արևելագիտության ֆակուլտետի դեկան, թուրքագետ Ռուբեն Մելքոնյանը Sputnik Արմենիայի եթերում անդրադարձել է հայ–ադրբեջանական կոնֆլիկտում Թուրքիայի ներգրավվածության աստիճանին և Հարավային Կովկասում Ռուսաստանի ու Թուրքիայի շահերի բախման խնդրին։ 
Մելքոնյան. «Թուրքիայի ներգրավվածությունը Հվ. Կովկասում կարող է ունենալ ամենածայրաhեղ դրսևորումներ»

Ռուբեն Մելքոնյանի դիտարկմամբ` հաշվի առնելով Թուրքիայի վերջին տարիների փոփոխված նկրտումներն ու պահվածքը, ինչպես նաև դրանց կոնկրետ կիրառումը տարբեր կոնֆլիկտներում և ընդհանրապես այդ պետության քաղաքական դիմանկարը, կարող ենք ասել, որ նրա ագրեսիվ քաղաքականությունը, միջազգային չափորոշիչները ոտնահարող քաղաքական ոճը կարող են ունենալ ամենածայրահեղական դրսևորումները, ուստի մենք ցավոք սրտի պետք է ավելի շատ հակված լինենք վատատեսական սցենարների ու Թուրքիայից սպասել ամենաբասացական, ամենաագրեսիվ քայլերը։ 

«Սրանք ոչ միայն խոսքեր են, այլև հենված են Թուրքիայի կողմից վերջին տարիներին հետևողականորեն իրականացված քաղաքական գծի ուսումնասիրության վրա։ Պետք չէ սպասել դրական կամ միջազգային տարբեր չափորոշիչները հարգելու գործընթաց մի պետությունից, որը վարում է բացահայտ ահաբեկչական և ցեղասպան քաղաքականություն, այսինքն դա մի պետություն է, որն իր բնույթով եղել է ցեղասպան, իսկ հիմա դրան ավելացել է ևս մեկ բաղադրիչ` դառնալով ահաբեկչական մտածողությամբ պետություն»,– նշում է թուրքագետը։

Անդրադառնալով այն հարցին, որ Թուրքիան Հարավային Կովկասում ըստ էության մտել է Ռուսաստանի կենսական շահերի գոտի, Ռուբեն Մելքոնյանն ընդգծում է, որ մենք վերջին տարիներին ռուս–թուրքական տարատեսակ բախումներ նկատում ենք տարբեր տարածաշրջաններում կոնֆլիկտների թեժացման, հրահրման և դրանց հանգուցալուծման պայքարի տիրույթում։ 

«Թուրքիան կոնկրետ Սիրիայում ահաբեկիչ վարձկանների միջոցով իր ուղղակի ռազմական մասնակցությամբ թեժացնում էր խնդիրը ու նաև զբաղվում մարդկության դեմ հանցագործությամբ` իրականացնելով Սիրիայի խաղաղ բնակչության սպանդ, իսկ այդ նույն կոնֆիկտի շրջանակներում Ռուսաստանն ակտիվորեն ընդգրկվեց որպես հակաահաբեկչական իրական պայքար ծավալող պետություն։  Հիմնականում Ռուսաստանի ջանքերի շնորհիվ սիրիական կոնֆլիկտը այս պահին գոնե ունի քիչ թե շատ ավելի հանդարտ բնույթ»,– նշում է թուրքագետը։

Ադրբեջանի և Թուրքիայի գործողությունները պետք է միջազգային գնահատականի արժանանան. ՀՀ ԱԺ

Ռուբեն Մելքոնյանի գնահատմամբ` ներկայումս փաստորեն տեղի է ունենում ռուս–թուրքական «պրոկսի» պատերազմ տարբեր տարածաշրջաններում` կոնֆլիկտներ, ահաբեկչություններ, ցեղասպանություններ հրահրելու և դրա դեմ պայքարելու շրջանակներում, հետևաբար ղարաբաղյան հիմնախնդիրն ու Հարավային Կովկասի հարցն ըստ էության նման հարթակներից է, որտեղ մի քանի տասնամյակ  է, ինչ տեսնում ենք ռուս–թուրքական նմանատիպ գործընթաց։ 

Ըստ Մելքոնյանի` արցախյան ճակատում ներկա լարվածության համատեքստում կա որոշակի տեսական խնդիր. քանի որ վերջին շրջանում փոխվել է թուրքական նկրտումների ագրեսիվության աստիճանը, ուստի փոխվել է նաև Թուրքիային զսպելու մեխանիզմների արդյունավետությունը։ Այն զսպող մեխանիզմները, որ ուներ Ռուսաստանը Թուրքիայի հանդեպ 10 կամ 20 տարի առաջ, հիմա կարիք ունեն վերանայման, որովհետև Թուրքիան ավելի ագրեսիվ պետություն է դարձել։

Թուրքիան աշխարհում միակ երկիրն է, որը աջակցում է Արցախում հակամարտության սրմանը. Փայլան

Այդուհանդերձ, ըստ թուրքագետի, Ռուսաստանն ունի համարժեք գործիքակազմ, և Հարավային Կովկասն էլ լինելով նրա կենսական հետաքրքրությունների շրջանակում` անպայմանորեն կնպաստի, որ Ռուսաստանը որոշակի քայլեր անի խաղաղության հաստատման ուղղությամբ։   

 

299
թեգերը:
տարածաշրջան, Թուրքիա, Ռուսաստան, Ռուբեն Մելքոնյան (թուրքագետ)
Ըստ թեմայի
Թուրքիան չպետք է կրակին բենզին լցնի Ղարաբաղում. Կարո Փայլան
«Քուրդ ժողովուրդը դատապարտում է Ադրբեջանին ու Թուրքիային և զորակցում հայերին». Հասանով
Թուրքիան հավաքագրում է օտարազգի ահաբեկիչ զինյալների և տեղափոխում Ադրբեջան. ՀՀ ԱԳՆ
ԹՈւրքական լիրա և դոլար

Թուրքական արժույթը ռեկորդային անկում է գրանցել աշխարհաքաղաքական զարգացումների ֆոնին

125
(Թարմացված է 14:06 28.09.2020)
Փորձագետների կարծիքով` Թուրքիայի ազգային արժույթի փոխարժեքի վրա ազդում են Արևելյան Միջերկրածովում և Արցախում տեղի ունեցող զարգացումները։

ԵՐԵՎԱՆ, 28 սեպտեմբերի – Sputnik. Թուրքական լիրայի փոխարժեքն այսօր անկում է գրանցել դոլարի նկատմամբ և թարմացրել պատմական նվազագույն մակարդակը աշխարհաքաղաքական մտահոգությունների ֆոնին։ ՌԻԱ Նովոստիի հաղորդմամբ՝ այս մասին են վկայում աճուրդի տվյալները։

Մոսկվայի ժամանակով ժամը 12:18–ի դրությամբ դոլարի փոխարժեքն աճում էր մինչև 7,778 լիրա՝ մեկ դոլարի դիմաց, այն դեպքում, երբ նախորդ փակումը եղել է 7,6607 լիրա։ Ավելի վաղ աճուրդի ընթացքում գները բարձրացել էին մինչև 1,7871 լիրա։

Այդպիսով՝ դոլարի նկատմամբ լիրայի փոխարժեքը գտնվում է պատմական նոր նվազագույն շեմին։ Օգոստոսի սկզբին այն թարմացրել է 2020 թվականի մայիսին հասած իր պատմական նվազագույն մակարդակը, այն է՝ մեկ դոլարի դիմաց 7,2712  լիրա։ Այդ օրվանից թուրքական արժույթը գերազանցապես թուլանում էր, ընդ որում, տեմպերն արագացել են սեպտեմբերի կեսերից։

ԵԱՏՄ–ն ներուժ է կուտակում. Կուդրինը խոսել է ԵԱՏՄ–ում միասնական արժույթ սահմանելու մասին

Արևելյան Միջերկրածովում Հունաստանի և Թուրքիայի հարաբերությունների սրացմանը  սեպտեմբերի 27-ին գումարվել է ևս մեկ աշխարհաքաղաքական ռիսկ։ Թուրքիայի նախագահ Ռեջեփ Թայիփ Էրդողանը զանգահարել է Արդբեջանի իր գործընկեր Իլհամ Ալիևին և հայտարարել Արցախի շփման գծում առկա իրավիճակի վերաբերյալ Անկարայի լիարժեք աջակցության մասին։

125
թեգերը:
տնտեսություն, դոլար, Թուրքիա
Սերգեյ Կոպիրկինը

Պետք կանխվի դրսից եկող ապակայունացնող ազդեցությունը. ՌԴ դեսպան

0
(Թարմացված է 14:31 29.09.2020)
ՀՀ-ում ՌԴ դեսպանի խոսքով` Ռուսաստանն անում է ամեն ինչ, այդ թվում՝ Մինսկի խմբի մյուս համանախագահների հետ փոխգործակցությամբ, որպեսզի էսկալացիան դադարի։

ԵՐԵՎԱՆ, 29 սեպտեմբերի – Sputnik. Ռուսաստանն ակտիվորեն աշխատում է ղարաբաղյան հակամարտության գոտում էսկալացիան դադարեցնելու համար և ակտիվ կապի մեջ է բոլոր՝ հայկական, ադրբեջանական ու թուրքական կողմերի հետ։ Տեղեկությունը լրագրողների հետ զրույցում հայտարարեց Հայաստանի Հանրապետությունում Ռուսաստանի Դաշնության դեսպան Սերգեյ Կոպիրկինը:

«Ամեն ինչ արվում է, որպեսզի լարումը թուլանա։ Մեր դիրքորոշումը հստակ է։ Իրավիճակը պետք է վերադառնա խաղաղ բանակցային հուն, և կանխվի դրսից եկող ապակայունացնող ազդեցությունը։ Ալտերնատիվ տարբերակ այս հարցում չկա», - ասել է Սերգեյ Կոպիրկինը:

Նրա խոսքով՝ Ռուսաստանի իր խնդիրն է թույլ չտա էսկալացիան և որպես միջնորդ պայմաններ ստեղծել փախադարձ ընդունելի խաղաղ որոշում գտնելու համար:

«Ռուսաստանն անում է ամեն ինչ, այդ թվում՝ Մինսկի խմբի մյուս համանախագահների հետ փոխգործակցությամբ, որպեսզի էսկալացիան դադարի», - ասաց նա:

Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։ Ըստ վերջին տեղեկությունների` հակառակորդի կրակոցների հետևանքով զոհվել են 84 զինծառայողներ և 4 քաղաքացիական անձինք։

Արմեն Գրիգորյանը Նիկոլայ Պատրուշևին է ներկայացրել Ադրբեջանի վտանգավոր միտումները

Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդի կորուստներն անհամեմատ մեծ են։

Ըստ վերջին տեղեկությունների` Ադրբեջանը զրկվել է նաև 50 ԱԹՍ–ից, 6 ուղղաթիռից, 80 զրահատեխնիկայից, 1 ինքնաթիռից և 82 ավտոտրանսպորտից։ Արցախում և Հայաստանում ռազմական դրություն և համատարած զորահավաք է հայտարարվել։

0
թեգերը:
Ադրբեջան, Ռուսաստան, Արցախ, Ղարաբաղյան հակամարտություն, Լեռնային Ղարաբաղ, Հայաստան, Սերգեյ Կոպիրկին, Դեսպան