ԵՐԵՎԱՆ, 25 մարտի – Sputnik. Այսօր ՀՀ ԱԳ նախարար Զոհրաբ Մնացականյանը հեռախոսազրույց է ունեցել Իրանի արտաքին գործերի նախարար Ջավադ Զարիֆի հետ և շնորհավորել վերջինիս Նովրուզի առթիվ։ Տեղեկությունը հայտնում է ՀՀ ԱԳՆ մամուլի ծառայությունը։
Մնացականյանը իրանցի գործընկերոջը փոխանցել է հայ ժողովրդի համերաշխությունը և զորակցությունը բարեկամ Իրանի ժողովրդին նոր տիպի կորոնավիրուսի դեմ մղվող պայքարում:
«Ներկայացնելով նոր տիպի կորոնավիրուսի հետագա տարածման կանխարգելման ուղղությամբ ՀՀ կառավարության կողմից գործադրվող ջանքերը` նախարար Մնացականյանը կարևորել է համավարակի դեմ պայքարում միջազգային համագործակցությունը, հատկապես հարևան պետությունների միջև գործողությունների համակարգումը: Այդ համատեքստում երկուստեք գոհունակությամբ ընդգծվել է կորոնավիրուսի դեմ պայքարում Հայաստանի և Իրանի տարբեր գերատեսչությունների միջև առկա սերտ փոխգործակցությունը և համավարակի դեմ պայքարում փորձի շարունակական փոխանակումը»,- նշված է ԱԳն տարածած հաղորդագրության մեջ:
Հայաստանի ԱԳ նախարարը կարևորել է նաև հակամարտող գոտիներում հրադադարի պահպանման և պատժամիջոցների ռեժիմների վերանայման վերաբերյալ ՄԱԿ-ի Գլխավոր քարտուղարի կոչերը՝ ընդգծելով, որ համավարակի դեմ պայքարը պետք է դառնա հնարավորություն ժողովուրդների հաշտեցման և գլոբալ համերաշխության համար:
Հայաստանի ու Իրանի միջև ապրանքների փոխադրման ցանկն ընդլայնվել է
Նախարարներն ընդգծել են երկկողմ պատրաստակամությունը քայլեր ձեռնարկելու երկկողմ օրակարգի դինամիկայի պահպանման, առկա պայմաններում առևտրաշրջանառության խթանման, ինչպես նաև երկու երկրների քաղաքացիների՝ հայրենիք վերադարձի ապահովմամբ պայմանավորված հարցերի հասցեագրման ուղղությամբ:
Տոն` ոչ բոլորի համար. որ երկրները չեն մասնակցում ամանորյա խրախճանքին և ինչու
Նշենք, որ պաշտոնական վիճակագրության համաձայն` 2017 թվականի առաջին եռամսյակում, Նովրուզը տոնելու համար Իրանից Հայաստան էր ժամանել է 45 000 իրանցի, 2018-ի նույն ժամանակահատվածում՝ 48 000, 2019–ին` 27 000:
2019 թվականին ամբողջ տարվա ընթացքում Հայաստան է այցելել 1 894 377 զբոսաշրջիկ:
