Լարս

Վրաստանում գտել են «Վերին Լարսի» խնդրի լուծումը. ի՞նչ կտա դա Հայաստանի փոխադրողներին

4732
(Թարմացված է 20:15 02.07.2019)
Վրացական կողմն արդեն որոշել է Կոբի-Գուդաուրի ճանապարհահատվածի շինարարության մրցույթի հաղթողին:

ԵՐԵՎԱՆ, 2 հուլիսի — Sputnik, Լաուրա Սարգսյան. «Վերին Լարս» հսկիչ անցակետ տանող ավտոմոբիլային ճանապարհի առավել խնդրահարույց հատվածի (Կոբի-Գուդաուրի) արդիականացումն իսկական փրկություն կդառնա փոխադրողների համար, այդ թվում` հայ: Այս մասին «Սաթի» լոգիստիկ ընկերության տնօրեն Մակար Առաքելյանն ասաց Sputnik Արմենիային տված հարցազրույցում:

Ավելի վաղ Վրաստանի փոխվարչապետ, ենթակառուցվածքների և տարածաշրջանային զարգացման նախարար Մայա Ցկիտիշվիլին Երևանում Sputnik Արմենիայի լրագրողի հարցին պատասխանելիս ասաց, որ վրացական կողմը որոշել է Կոբի-Գուդաուրի ճանապարհի ամենախոցելի հատվածի արդիականացման մրցույթի հաղթողին:

Այս հատվածը ձմռանը պարբերաբար փակում են առատ ձյան պատճառով: Դրա արդիականացումը Վրաստանի իշխանությունների խոշոր նախագծի մի մասն է։ Նախատեսվում է 22,7 կմ երկարությամբ ճանապարհի, վեց կամուրջի և հինգ թունելի շինարարություն, այդ թվում` 9-կիլոմետրանոց թունել՝ Խաչի լեռնանցքի տակով:

Նախագիծը կարժենա 3,5 մլրդ դոլար, առայժմ անհայտ է, թե այն երբ ամբողջովին կիրագործվի:

«Տվյալ նախագիծը շատ կարևոր է փոխադրողների համար, քանի որ մենք մշտապես բախվում ենք լուրջ խնդիրների: Դա ճանապարհի առավել խոցելի հատվածն է», – ասաց Առաքելյանը:

Ճանապարհի այս հատվածում հաճախ են լինում փլուզումներ: Պատահում է, որ այդ հատվածն օրերով, նույնիսկ շաբաթներով փակ է լինում՝ անձրևների, ձնաբքի պատճառով: Արդիականացումից հետո փոխադրողները ճանապարհի այդ հատվածը կանցնեն թունելի միջոցով, որի գործունեությունը կախված չի լինի եղանակի քմահաճույքներից:

Առաքելյանը հիշում է, որ շրջան է եղել, երբ Կոբի-Գուդաուրի հատվածը չի գործել ավելի քան 30 օր:

Սակայն լիարժեք գործելու համար անհրաժեշտ է արդիականացնել նաև «Վերին Լարս» հսկիչ անցակետը: Այսօր դրա թողունակությունը փոքր է. հսկիչ անցակետը կարող է ամեն օր սպասարկել մոտ 4 հազար մարդու և մինչև 200 բեռնատարի: Նախկինում «Վերին Լարսով» ճանապարհը համարվել է պահեստային, և մինչև հիմնական դառնալը փակվել է նոյեմբերից մինչև ապրիլ:

Քանի որ հիմա «Վերին Լարսի» այլընտրանքային երթուղիները փակ են, ամբողջ ծանրաբեռնվածությունն ընկնում է հենց այդ հսկիչ անցակետի վրա: Այսպիսով, ամեն օր մաքսավորները ստիպված են լինում սպասարկել մոտ 15 հազար մարդու:

Առաքելյանն ընդգծեց, որ թունելի շինարարության նախագծի իրագործման և ճանապարհի արդիականացման դեպքում կշահեն փոխադրողները:

«Եթե այդ հարցը լուծվի, ապա մենք այլևս բողոքելու տեղ չենք ունենա», – ասաց նա:

Ավելի հարմար է, քան լաստանավային փոխադրումը. Երևանում գտել են «Վերին Լարսի» այլընտրանքը

Նշենք, որ փորձագետների գնահատականներով` Ռուսաստանն Անդրկովկասին կապող վեց երթուղիներից առավել հարմարը Տրանսկամն է: Օսեթիայով ճանապարհն ավելի նախընտրելի է առավել հարմար կլիմայական պայմանների և ռելիեֆի շնորհիվ: Սակայն դրա գործարկման հարցը քաղաքական խնդիր է և առաջիկայում քիչ հավանական է:

Հայաստանի հետ կորցնում է նաև Վրաստանը. Պրահայում որոշում էին Վերին Լարսի այլընտրանքի հարցը

Հայաստանում կարծում են, որ ստեղծված իրավիճակից ելքը «Վերին Լարսի» թողունակության մեծացումն է: Որպես այլընտրանքային երթուղի դիտարկվում է ծովային ճանապարհը, մասնավորապես, փոխադրումների մուլտիմոդալ տեսակը, որը ներառում է կոնտեյներներով բեռների փոխադրում Նովոռոսիսկի նավահանգստից Փոթիի նավահանգիստ, այնուհետև` երկաթուղով Հայաստան:

4732
թեգերը:
Վերին Լարս, Լարս, Վրաստանի Հանրապետություն, Հայաստան
Ըստ թեմայի
Մելիքյան. «Լարսի անցակետի այլընտրանքի մասին հայտարարությունները բարդացրել են գործընթացը»
«Պարզ իրավիճակի» հանգուցալուծումը. Երևանը կարո՞ղ է «Վերին Լարսի» այլընտրանքի հույս ունենալ
Ավելի հարմար է, քան լաստանավային փոխադրումը. Երևանում գտել են «Վերին Լարսի» այլընտրանքը