ԵՐԵՎԱՆ, 30 մայիսի — Sputnik. Վերջին տարիներին Թուրքիան Ռուսաստանի դեմ իրականացրել է մի շարք քայլեր և հայտնվել է Ռուսաստանի համար հակադիր բևեռում, և Մոսկվան հանդուրժել է այդ ամենը։
Ինչպես հայտնում է ermenihaber.am-ը, այս մասին թուրքական «Yeni mesaj» թերթում գրել է թուրք վերլուծաբան Աքըն Այդընը՝ «Ինչո՞ւ է Ռուսաստանը հանդուրժում Թուրքիային» վերտառությամբ հոդվածում։
Թուրքիան Ռուսաստանի համար հակադիր ճակատում հայտնվեց Վրաստանում և Ուկրաինայում տեղի ունեցած իրադարձություններից հետո՝ անելով մի շարք հակառուսական քայլեր և հայտարարություններ, և Մոսկվան դա էլ հանդուրժեց։
«Թուրքիան Ռուսաստանի դեմ գործեց նաև Ղրիմի հարցում՝ չճանաչելով դրա կցումը Ռուսաստանին: Ու Մոսկվան դարձյալ հանդուրժեց։ Սևծովյան նեղուցներում գոյություն ունեն կոնվեnցիաներ։ Թուրքիայի թույլտվությամբ ամերիկյան ռազմանավերը մուտք գործեցին Սև ծով։ Ռուսները նորից հանդուրժեցին։ Ռուսաստանը մեր հարցում հանդուրժողականություն ցուցաբերեց նաև Սիրիայում։ Մինչդեռ ԱՄՆ-ն, որն իբրև թե մեր բարեկամն է, օր օրի սպառնում է մեզ և փորձում մեզ ծուղակը գցել։ Մենք չկարողացանք փրկել սպանված ռուս դեսպանին, ով գնդակահարվեց Անկարայում։ Մենք խոցեցինք ռուսական ռազմական ինքնաթիռ, բայց Ռուսաստանը մեզ հետ կապերը վերջնականապես չխզեց։ Մոսկվան նույնիսկ դրանից հետո չասեց Թուրքիային կվառեմ և կոչնչացնեմ»,- գրում է հոդվածի հեղինակը։
Փորձելով պարզել, թե որն էր Թուրքիայի նկատմամբ Մոսկվայի այդչափ հանդուրժողականության պատճառը՝ Աքըն Այդընը նշում է, որ խնդիրը պետք է դիտարկել տնտեսական և քաղաքական հարթության մեջ: Ռուսաստանը, հաշվի առնելով Թուրքիայի ռազմավարական նշանակությունը, այդ ամենը հանդուրժեց միմիայն իր ժողովրդի շահերի համար։ Ըստ նրա՝ Մոսկվան շատ լավ հասկանում էր, թե ինչ տնտեսական և քաղաքական հետևանքներ կլինեն հակամարտության խորացման դեպքում։ Բացի այդ էլ կմեծանար ԱՄՆ-ի ազդեցությունը Մերձավոր արևելքում։
Անդրադառնալով ռուսական S-400 ՀՕՊ համակարգերի շուրջ ստեղծված իրավիճակին՝ հոդվածի հեղինակը կարծիք է հայտնում, որ եթե Անկարան ամերիկյան ճնշումների պատճառով հրաժարվի դրանցից, ապա Մոսկվայի համբերության բաժակը վերջնականապես կլցվի։
Վերջում թուրք վերլուծաբանը կոչ է հղում Թուրքիայի իշխանություններին. «Ի՞նչ օսմանյան ապտակից եք խոսում, եթե Ռուսաստանը միակ երկիրն է, որին այդպես էլ չկարողացանք հաղթել։ Եղեք ողջամիտ և ռացիոնալ»։
