Թուրքիա

Թուրքիայի կուսակցությունների արտաքին քաղաքականությունը գրեթե նույնն է. Խուդավերդյան

68
(Թարմացված է 23:42 04.04.2019)
Թուրքիայում տեղի ունեցած ընտրությունները չփոխեցին երկրի արտաքին քաղաքականության օրակարգը, բացի այդ Էրդողանն էլ ամենևին չկորցրեց իր իշխանությունը, համոզված է փորձագետը։

ԵՐԵՎԱՆ, 4 ապրիլի — Sputnik. Մարտի 31-ին Թուրքիայում տեղի ունեցած ՏԻՄ ընտրությունները որևէ կերպ չեն ազդի այնտեղ բնակվող հայ համայնքի վրա։ Այս մասին Sputnik  Արմենիայի թղթակցի հետ զրույցում ասաց թուրքագետ Մուշեղ Խուդավերդյանը։

Հիշեցնենք, որ Թուրքիայում անցած կիրակի կայացան ՏԻՄ ընտրություններ։ Դրանց մասնակցեցին 13 քաղաքական կուսակցություններ։ Թեև առայժմ հրապարակվել են նախնական տվյալները, բայց արդեն ակնհայտ է, որ Անկարայում և Իզմիրում Էրդողանի իշխող Արդարություն և զարգացում կուսակցությունը ջախջախիչ պարտություն է կրել ընդդիմությունից։

Այսպես, Թուրքիայի ձախակողմյան Ժողովրդահանրապետական կուսակցության ներկայացուցիչ Մանսուր Յավաշը հաղթանակ է տարել Անկարայի քաղաքապետի ընտրություններում` հավաքելով ձայների 50,9 տոկոսը։ Իզմիրում նույնպես հաղթել է ԺՀԿ թեկնածու Տունչ Սոյերը, նրա համար քվեարկել է ընտրողների 58,02 տոկոսը։

Ինչ վերաբերում է Ստամբուլին, ապա այստեղ առաջատար է ԺՀԿ թեկնածու Էքրեմ Իմամօղլուն, որը հավաքել է 4 միլիոն 159 հազար 650 ձայն։ Նրանից մի քիչ հետ է մնում իշխող ԱԶԿ թեկնածու, Թուրքիայի խորհրդարանի նախկին խոսնակ և նախագահի մերձավոր դաշնակից Բինալի Յիլդիրիմը։ Նրա օգտին քվեարկել է 4 միլիոն 131 հազար 761 մարդ։

«Ընտրությունները ոչ մի կերպ չեն անդրադառնա հայ համայնքի վրա։ Նրանց խնդիրներն ու հարցերը խորհրդարանում բարձրաձայնում են հայկական ծագում ունեցող պատգամավորները», – ասաց Խուդավերդյանը։

Նա նշեց, որ անփոփոխ կմնա նաև Թուրքիայի արտաքին քաղաքականությունը։ Ավելին, Խուդավերդյանը համաձայն չէ այն պնդման հետ, որ Թուրքիայի նախագահ Ռեջեփ Թայիփ Էրդողանը կորցրել է իշխանությունը։

Այն փաստը, որ Ստամբուլում, Անկարայում, Իզմիրում և Անթալիայում Էրդողանի կուսակցությունը պարտվել է, դեռ չի նշանակում, որ նախագահը կորցրել է իր իշխանությունը։ Բանն այն է, որ Թուրքիայի բոլոր կուսակցությունների արտաքին քաղաքականությունը շատ քիչ է տարբերվում։

Նշենք, որ 20–րդ դարի 50–ական թթ–ին մեկուկես միլիոն բնակչություն ունեցող Ստամբուլում ապրել է 150 հազար հայ։ Այսօր 20 միլիոն բնակչությամբ Ստամբուլում մնացել է 50 հազար հայ։

68
թեգերը:
Թուրքիա
Ըստ թեմայի
Թուրքիայում կայացած ընտրությունները մի քանի անակնկալ մատուցեցին. փորձագետ
Էրդողանը պարտվեց գլխավորը՝ Հայաստանի հետ սահմանակից շրջաններն ու Նախիջևան տանող ճանապարհը
Իրան, թե Թուրքիա. ընտրություն համագործակցության և ավերման միջև
Հայաստանը շանս է բաց թողնում. կարո՞ղ է արդյոք Հյուսիս–հարավը կապել Բաթումն ու Բենդեր Աբասը