ԵՐԵՎԱՆ, 19 մարտի — Sputnik. Նախկինում գոյություն ուներ պրակտիկա, երբ Հայաստանը, Ադրբեջանն ու ԼՂ–ն պայմանավորվածություն ունեին մեկ շաբաթվա ընթացքում վերադարձնել սահմանն անցած մոլորված մարդկանց։
Այսօր հրավիրած ասուլիսում, անդրադառնալով Ադրբեջանում դատապարտված Կարեն Ղազարյանին ու Հայաստանի սահմանն օրերս խախտած Էլվին Արիֆ օղլու Իբրահիմովին փոխանակելու հնարավորությանը, ասաց ՀՀ վարչապետ Նիկոլ Փաշինյանը։
«Դա ընդհատվել է այն ժամանակ, երբ զինված մարդիկ մտել են մեր տարածք ու սպանություններ գործել։ Սպանության համար մեղադրվող մարդկանց փոխանակել մոլորված մարդկանց հետ ուղղակի անընդունելի է։ Մենք պատրաստ ենք մոլորված մարդկանց փոխանակել մոլորվածների հետ, և հիմա մենք էլ ունենք իրենց մոտ մոլորված, որն իրենց վարկածով դիվերսանտ է, որին իրենք 20 տարվա ազատազրկման դատապարտեցին»,– ասաց Փաշինյանը։
Վարչապետը նաև նշեց, որ Էլվին Արիֆ օղլու Իբրահիմովի Հայաստանի սահմանն անցնելու վերաբերյալ քննություն է ընթանում, որի արդյունքում կպարզվի, թե ինչպես է դա տեղի ունեցել` մոլորվելու, թե՞ այլ պատճառով։
