ԵՐԵՎԱՆ, 28 դեկտեմբերի — Sputnik. Ամուսիններին մահացած են գտել Թբիլիսիի ծայրամասի Օդանավակայան բնակավայրում գտնվող բնակելի շենքի բնակարանում։ Այս մասին հայտնում է Sputnik Գրուզիան` հղում անելով «Նովոստի Գրուզիային»։
Վրաստանի ՆԳՆ–ի տվյալների համաձայն` երիտասարդների մարմինները հայտնաբերել են ուրբաթ առավոտյան։ Նախնական տվյալների համաձայն` նրանք թունավորվել են գազից։
Մահացած կնոջ ընկերուհին` Նանա Աբեսաձեն Facebook–ի իր էջում գրում է, որ զույգը մեկ ամիս առաջ էր ամուսնացել։ Նրանց անուններն էին Իյա Գվիչիանին ու Բեսո Բարատելին։
Քրեական գործ է հարուցվել երկու կամ ավելի մարդկանց մահվան պատճառ դարձած անվտանգության կանոնները խախտելու հոդվածով։ Այն ենթադրում է 6–ից 10 տարի ազատազրկում։
