ԵՐԵՎԱՆ, 2 օգոստոսի — Sputnik. Իրանը 48 ժամվա ընթացքում պատրաստվում է լայնածավալ ռազմածովային զորավարժություններ սկսել, որպեսզի ցուցադրի Հորմուզի նեղուցն արգելափակելու իր հնարավորությունները, հայտնում է ՌԻԱ Նովոստին` հղում անելով CNN–ին։
Հուլիսի սկզբին Իսլամական հեղափոխության պահապանների կորպուսի շտաբի պետի տեղակալ Իսմայիլ Կոուսարին հայտնել էր այլ երկրներ նավթ մատակարարելու համար Հորմուզի նեղուցը փակելու պատրաստակամության մասին, եթե իրանական նավթի արտահանումը զսպվի։
«Մենք տեղյակ ենք Իրանի ակտիվության մասին Պարսից ծոցում, Հորմուզի նեղուցում և Օմանի ծոցում։ Ուշադիր հետևում ենք և կշարունակենք աշխատել մեր գործընկերների հետ, որպեսզի ապահովենք ծովագնացության ազատությունն և միջազգային ջրերում ապրանքների ազատ տեղաշարժը», – ասում է ԱՄՆ կենտրոնական հրամանատարության ներկայացուցիչ, կապիտան Ուիլյամ Էրբանը։
ԱՄՆ նախագահ Դոնալդ Թրամփը մայիսի 8-ին հայտարարել էր, որ Վաշինգտոնը դուրս է գալիս Իրանի հետ միջուկային ծրագրի մասին համաձայնագրից և վերականգնում Իրանի նկատմամբ բոլոր պատժամիջոցները, այդ թվում երկրորդական` այն երկրների նկատմամբ, որոնք բիզնես են վարում Իրանի հետ։ Ավելի ուշ ԱՄՆ պետդեպում հայտարարել էին, որ Վաշինգտոնը կփորձի համոզել իր դաշնակիցներին մինչև նոյեմբեր ամբողջությամբ դադարեցնել Իրանից նավթի ձեռքբերումը։
