ԵՐԵՎԱՆ, 31 հուլիսի — Sputnik. Արդեն երկու շաբաթ է, ինչ չճշտված հանգամանքներում Ադրբեջանի տարածքում հայտնված ՀՀ քաղաքացի Կարեն Ղազարյանի մասին ոչ մի տեղեկություն չկա։ Այսօր լրագրողների հետ հանդիպմանը հայտարարեց ՀՀ ԱԳՆ խոսնակ Տիգրան Բալայանը։
«Ադրբեջանը, կոպտորեն ոտնահարելով պատերազմի ժամանակ քաղաքացիական բնակչության անվտանգության մասին Ժնևի կոնվենցիայի 106-րդ հոդվածը, մինչ այսօր չի թույլատրել Կարմիր խաչի միջազգային կոմիտեի ներկայացուցիչներին այցելել նրան»,– ասաց Բալայանը` հավելելով, որ հարցը ՀՀ իշխանությունների ուշադրության կենտրոնում է, վերջինները ձեռնարկում են այդ ուղղությամբ հնարավոր բոլոր քայլերը։
Հիշեցնենք` 2018 թվականի հուլիսի 15-ին Ադրբեջանի պաշտպանության նախարարությունը հայտարարել էր, թե Ղազախի շրջանի ուղղությամբ հետ է մղել Հայաստանի զինված ուժերի, ադրբեջանական մամուլի ձևակերպմամբ` դիվերսիոն խումբ, որի անդամներից մեկը գերի է վերցվել։
Այս հայտարարությունից անմիջապես հետո Հայաստանի պաշտպանության նախարարությունը հայտարարել է, որ Ադրբեջանի կողմից նշված անձն իրականում Տավուշի Բերդավան գյուղի բնակիչ 1984 թվականին ծնված Կարեն Ղազարյանն է, ով ունի հոգեկան առողջության խնդիրներ, չի ծառայում և երբեք չի ծառայել Հայաստանի զինված ուժերում։
Ադրբեջանում գերության մեջ գտնվող Կարեն Ղազարյանի հարցով միջազգային կառույցներին է դիմել նաև Հայաստանի Մարդու իրավունքների պաշտպան Արման Թաթոյանը։
Կարեն Ղազարյանի առողջական խնդիրների և նրա վերադարձի կազմակերպման համար անմիջապես զգուշացվել է Կարմիր խաչի միջազգային կոմիտեի Երևանյան գրասենյակը:
Իսկ ադրբեջանական իշխանությունները հետևողականորեն խոչընդոտել են ԿԽՄԿ-ի ներկայացուցիչների այցերը նրան: