ԵՐԵՎԱՆ, 11 հուլիսի — Sputnik. Վրաստանում ՀՀ դեսպանությունը Հայաստանից Վրաստան մեկնող քաղաքացիների համար հայտարարություն է տարածել։ Հայտարարությամբ դեսպանությունը զգուշացնում է ավտովարորդներին թղթաբանության մեջ գրանցված փոփոխությունների մասին։
«Հայաստանի Հանրապետության հարգելի՛ քաղաքացիներ, եթե պատրաստվում եք հատել Վրաստանի սահմանը Ձեզ վրա չգրանցված ավտոմեքենայով, ապա խնդրում ենք Ձեզ հետ ունենալ մեքենայի տիրոջ կողմից Ձեզ տրված լիազորագիրը՝ վրացերեն կամ անգլերեն լեզուներով։ Թարգմանությունը պետք է հաստատված լինի նոտարի կողմից»,–ասված է հայտարարության մեջ։
Հիշեցնենք, որ դեռևս հունիսի 26–ին Sputnik Արմենիան անդրադարձել էր այս թեմային, ճշտել ինֆորմացիան Վրաստանի պատկան մարմիններից և տեղեկացրել, որ Հայաստանի քաղաքացիները, որոնք մտադիր են Վրաստան մեկնել իրենց չպատկանող ավտոմեքենաներով, պետք է անպայման ունենան մեքենայի սեփականատիրոջ լիազորագիրը։
Ի դեպ, ոմանք թերահավատորեն էին վերաբերում այս ինֆորմացիային։
