ԵՐԵՎԱՆ, 2 ապրիլի — Sputnik. Հայաստանն ու Ադրբեջանը «կիբեռզորքեր» են ստեղծում, «կիբեռպարտիզանական կռիվները» երկրորդ պլանում են։ Տեղեկատվական բնագավառում տեղի ունեցող նոր զարգացումները Spunik Արմենիայի հետ զրույցում այսպես բնորոշեց տեղեկատվական հարցերի փորձագետ Սամվել Մարտիրոսյանը։
«Երկու կողմից էլ տեղեկատվական հարձակումներն այսօր բավական նվազել են, ընդ որում` հիմա դրանք ավելի քիչ են, քան մինչ ապրիլյան պատերազմն էին։ Դա պայմանավորված է նրանով, որ երկու կողմերն էլ գնում են «կիբեռզորքերի» ձևավորմանը։ Ապացույցները երկու կողմերից էլ կան։ Դրանով պայմանավորված էլ «պարտիզանական կռիվները» երկրորդ պլան են մղվել»,– ասում է Մարտիրոսյանը։
Եվ, քանի դեռ իրական ճակատում համեմատաբար խաղաղություն է, տեղեկատվական պատերազմի վրա կողմերը շատ ռեսուրսներ չեն ծախսում։
Սամվել Մարտիրոսյանի խոսքով` այսօր երկու կողմն էլ տեղեկատվական անվտանգության ոլորտում ավելի լուրջ մասնագետների են ներգրավում։ Արդյունքում` կայք կոտրելը դառնում է շատ երկրորդական զբաղմունք, որովհետև դրանով հնարավոր չէ հակառակորդին լուրջ վնաս հասցնել։
«Կան փաստեր, որոնց համաձայն, Ադրբեջանը ձևավորում է պետական հաքերային խմբավորումներ, որոնք իրականացնում են շատ ավելի խելացի հարձակումներ` ուղղված ավելի շատ տեղեկատվություն կորզելուն, քան ինչ-որ կայքեր կոտրելուն»,– ասում է փորձագետը։
Հայաստանը ևս, ըստ նրա, ձեռքերը ծալած չի նստում, և համապատասխան գործընթացներ մեր երկրում էլ են ընթանում։ Այս գործընթացների իրական արդյունքն ու նորաստեղծ կիբեռզորքերի մարտունակության գնահատականը հնարավոր կլինի տալ միայն այն բանից հետ, երբ դրանք լուրջ քայլերի կանցնեն։ Այս պահին դեռ ժամանակը չէ։
Սամվել Մարտիրոսյանի կանխատեսմամբ` առաջին քայլերը կարվեն, եթե սրացումներ լինեն իրական ռազմական ճակատում։ «Օրինակ` էներգետիկ համակարգի վրա հարձակումն այնպիսի բան չէ, որ ամեն օր կարող ես անել։ Նման բան կարվի միայն, եթե պետք լինի ռազմական գործողություններին օժանդակ քայլեր ապահովել։ Իսկ խաղաղ ժամանակներում որևէ գործողություն չի արվի, քանի որ դա կնշանակի խաղաքարտերի բացահայտում»,– ասում է Մարտիրոսյանը։
Ինչ վերաբերում է շարքային օգտատերերին, ՏՏ փորձագետի դիտարկմամբ, ապրիլյան պատերազմի օրերին ռազմական գործողություններին զուգահեռ համացանցում նկատվող համախմբվածությունն ու զգոնությունն այսօր այլևս չկան, քանի որ մարդիկ չեն կարող անընդհատ զգոն վիճակում մնալ։
Եթե պատերազմի օրերին, ի պատասխան ադրբեջանական կողմից բացվող կեղծ կայքերի ու կեղծ օգտատերերի, հայ օգտատերերն ավելի զգոն ու զգուշավոր էին դարձել, ապա այսօր իրավիճակը վերադարձել է նախապատերազմական դրությանը։ Պարզապես, ապրիլյան պատերազմը հայաստանցի օգտատերերին սովորեցրեց ավելի մեծ ուշադրություն դարձնել տեղեկատվական անվտանգության հարցերին։
