ԵՐԵՎԱՆ, 2 մարտի — Sputnik. Արդեն իսկ ձեռքբերում է այն, որ վերջին տարիներին Հայաստան– Վրաստան բարձր մակարդակի շփումներն առավել հաճախ են տեղի ունենում և անհետևանք չեն անցնում։ Այսօր, Sputnik Արմենիայի հետ զրույցում, մեկնաբանելով Վրաստանի վարչապետի այցը Հայաստան, ասաց ՀՀ ԱԺ ՀՀԿ խմբակցության պատգամավոր, ջավախեցի Շիրակ Թորոսյանը։
Անդրադառնալով այցից հիմնական սպասելիքներին` Թորոսյանը նշեց, որ չի ցանկանում դրանց մասին խոսել որպես ջավախեցի, այլ որպես ՀՀ քաղաքացի և ՀՀ ԱԺ պատգամավոր։
«Շատ լավ կլիներ, որ արագ լուծում տրվեր Լարսի ավտոճանապարհի այլընտրանքի խնդրին, որի մասին վերջին շրջանում վրացական կողմն էլ է բարձրաձայնել` դրական տրամադրվածություն արտահայտելով»,– ասաց Թորոսյանը։
Հաջորդ սպասելիքը, որ ներկայացրեց Թորոսյանը, Հայաստան–Վրաստան առևտրաշրջանառության ակտիվացումն ու ծավալների ավելացումն է։
«Լավ կլինի նաև, որ Վրաստանը Հայաստանի միջոցով ինտեգրվի ԵԱՏՄ տնտեսական տարածքին»,– ասաց նա։
Պատգամավորն ակնկալում է, որ մոտ ապագայում լուծում կտրվի նաև Հայաստան–Վրաստան սահմանին ազատ տնտեսական գոտու ստեղծման ծրագրին։ Շիրակ Թորոսյանի համոզմամբ` այն պետք է լինի հատկապես Աշոցք– Ջավախք հատվածում։
Շիրակ Թորոսյանը չշրջանցեց նաև վիրահայության ու ջավախահայության խնդիրները` լավատեսություն հայտնելով, որ Վրաստանի ներկա իշխանություններն այս հարցում ավելի պատրաստակամ են, քան նախկինները։
«Վրաստանի ներկա իշխանություններն ավելի ըմբռնումով են ընկալում ջավախահայության խնդիրը, ի տարբերություն Սահակաշվիլու պաշտոնավարման ժամանակաշրջանի, երբ ոչ միայն դրանք չէին ընկալվում, այլև ընդհակառակը` Հայաստանի շահերի հաշվին հաճախ էլ ավելի էին խորացվում թուրք–ադրբեջանական տանդեմի հետ հարաբերությունները»,– ասաց Թորոսյանը` հույս հայտնելով, որ Վրաստանի վարչապետի հայաստանյան այցի ընթացքում իր նշած հիմնական խնդիրները չեն անտեսվի։
