ԵՐԵՎԱՆ, 10 նոյեմբերի – Sputnik, Լաուրա Սարգսյան. Վրաստանի նոր սահմանադրությունը կօրինականացնի երկքաղաքացիությունը։ Բնակչությունն այլևս չի վախենա երկրորդ անձնագիրը ցույց տալուց, լրագրողներին ասել է Վրաստանի վարչապետ Իրակլի Կոբախիձեն։
2018 թվականին Վրաստանի նոր սահմանադրության գործածումից հետո երկրի քաղաքացիները այլ երկրների քաղաքացիություն ստանալու հնարավորություն կունենան։
«Մենք սահմանադրության մեջ համեմատաբար լիբերալ նորմեր ենք մտցրել։ Նոր քաղաքացիություն ստանալը չի նշանակի, որ անձը ավտոմատ կերպով զրկվում է Վրաստանի քաղաքացիությունից։ Դա կարևոր է մեր քաղաքացիների ու մեր սփյուռքի համար», – ասել է Կոբախիձեն Վրաստանի Հանրային հեռարձակողի Առաջին ալիքի եթերում։
2011 թվականի վերջից այլ երկրի քաղաքացիություն ստանալու դեպքում Վրաստանի քաղաքացիներն ավտոմատ կերպով կորցնում էին իրենց քաղաքացիությունը։
Վրաստանի հայ համայնքը դրականորեն է արձագանքել այս նորությանը։ Այս տարիների ընթացքում Վրաստանի քաղաքականությունից զրկված 30 հազար մարդուց 80%–ը հայերն էին։
Հայաստանի պետական կառավարման ակադեմիայի Տարածաշրջանային հետազոտությունների կենտրոնի գիտաշխատող, Վրաստանի հարցերով փորձագետ Ջոնի Մելիքյանը կարծում է, որ սահմանադրական այդ ուղղումը կփոխի Վրաստանի հայերի կյանքը։
«Մարդկանց, մասնավորապես հայերին, սկսեցին քաղաքականությունից զրկել, երբ նրանք զանգվածային կերպով սկսեցին Հայաստանի քաղաքացիություն ստանալ` Ռուսաստան աշխատանքի մեկնելու համար», – Sputnik Արմենիայի թղթակցի հետ զրույցում ասաց Մելիքյանը։
Վրաստանի քաղաքացիները, որոնք հատել են Վրաստանի սահմանը այլ երկրների անձնագրերով, մի քանի ժամ հետո արդարադատության նախարարությունից նամակ էին ստանում, որ ավտոմատ կերպով զրկվել են Վրաստանի քաղաքացիությունից։
2016 թվականին երկրի սահմանադրական փոփոխությունների քննարկման ժամանակ Վրաստանի արտաքին գործերի նախկին նախարար, անկախ պատգամավոր Սալոմե Զուրաբիշվիլին առաջարկել է փոփոխությունների իր փաթեթը, որը երկքաղաքացիություն է ենթադրում։
«Ուղղումներով նոր սահմանադրությունը կընդունվի նախագահական ընտրություններից հետո ու ուժի մեջ կմտնի 2018 թվականի գարնանը», – ասաց Մելիքյանը։
Ի դեպ, քաղաքացիությունից զրկում էին ոչ միայն հասարակ մահկանացուներին. այդպես էին վարվել նաև Վրաստանի վարչապետ Բիձինա Իվանիշվիլիի հետ։ 2012 թվականին, մինչ իշխանության գալը, նրան զրկել էին Վրաստանի քաղաքացիությունից այն բանի համար, որ նա հատել էր սահմանը ֆրանսիական անձնագրով։
Քաղաքացիությունից զրկվել է նաև Վրաստանի երրորդ նախագահ Միխեիլ Սահակաշվիլին, երբ նա Ուկրաինայի քաղաքացիություն է ստացել։
Վրաստանի փոփոխված սահմանադրությունն ուժի մեջ կմտնի առաջիկա նախագահական ընտրությունների արդյունքների ամփոփումից հետո` 2018 թվականի աշնանը։
