Ռուսաստանից բազմաֆունկցիոնալ ՍՈւ-30M ինքնաթիռների նոր խմբաքանակ գնելը ճիշտ որոշում կլինի, եթե Հայաստանի ղեկավարությունը գործնականում դա իրականացնի։ Sputnik Արմենիայի հետ զրույցում նման կարծիք հայտնեց ռազմական փորձագետ Մհեր Հակոբյանը։
Ըստ նրա, կործանիչային ավիացիա ստեղծելու քայլերը լավագույնն են, որ արել են ներկա իշխանությունները բանակային բարեփոխումների շրջանակում։
Նրա խոսքով` մինչ պատերազմը որոշակի քայլեր արվում էին օդային գերակայության, բանակի համալիր կառավարման արդյունավետության բարձրացման ուղղությամբ, սակայն հետպատերազմական շրջանում ոլորտում քաոտիկ, անորոշ իրավիճակ է տիրում։
«Իրականում րոպեական որոշակի զարգացումներ են տեղի ունենում, և Փաշինյանի հայտարարությունները հաճախ քաղաքական կոնտեքստ ունեն։ Բացառված չէ, որ վարչապետն ուղղակի չխորանալով այդ ամենի մեջ` կոմպլիմենտ է անում ռուսական կողմին ընտրություններին ընդառաջ քաղաքական որոշակի դիվիդենտներ շահելու նպատակով»,- ասաց նա։
Հակոբյանի խոսքով` արդեն երրորդ տարին է`իշխող ուժն ինչպես այլ ոլորտներում, այնպես էլ բանակային համակարգում չի ներկայացրել կոնցեպտուալ զարգացման նոր ուղղություն, մինչդեռ հետպատերազմական շրջանում բանակը լուրջ վերափոխման կարիք ունի։
«Պատերազմից գրեթե կես տարի է անցել, սակայն մենք չենք տեսնում բարեփոխման ծրագրի նույնիսկ սաղմերը, ինչը շատ ցավալի է ու մտահոգիչ։ Խնդիրը նորից ու նորից քաղաքական հարթության վրա է և քաղաքական կոմպոնենտը գերակշռում է ռազմականին»,- նշեց փորձագետը։
Ըստ նրա` ՍՈւ-30ՍՄ ձեռք բերելու որոշումն այս կառավարության եզակի դրական քայլերից է, այլ հարց է, որ դրանք պատերազմի ժամանակ չկիրառվեցին։ Հակոբյանի կարծիքով` այսօր արդեն անհնար է օդային գերակայություն ունենալ առանց բազմաֆունկցիոնալ կործանիչների, իսկ ՍՈւ-30ՍՄ-ները բազմաֆունցիոնալ են և օդում գերակայության հասնելու հնարավորություն են տալիս։
Նշենք, որ ապրիլի 7-ին նախատեսված մոսկովյան այցից առաջ Նիկոլ Փաշինյանը «Ինտերֆաքսի» հայաստանյան թղթակցին տված հարցազրույցում, խոսելով հայ-ռուսական հարաբերությունների ապագայի իր տեսլականի, տնտեսական կապերի և ռազմատեխնիկական համագործակցության հեռանկարների մասին, նշել է, որ Հայաստանը շարունակելու է Ռուսաստանից սպառազինության մատակարարման, մասնավորապես Սու-30ՍՄ կործանիչներ գնելու գործընթացը։
Հիշեցնենք` անցած երկու տարիների ընթացքում ՌԴ-ից Հայաստան է մատակարարվել (ռուսաստանյան ներքին գներով) 12 բազմանպատակային Սու-30ՍՄ 4 կործանիչ։
ՍՈւ-30ՍՄ–ներն ու լեգենդար «Ռուսկիե վիտյազին». ավիախումբը 30 տարեկան է. տպավորիչ կադրեր
