Գեղամ Մանուկյանի դիտարկմամբ` մեծ թվով լրագրողական կազմակերպություններ արդեն իսկ հանդես են եկել հայտարարությամբ։ Նրանց բոլոր մտահոգությունները տեղին են, որովհետև տարիներ առաջ, երբ զրպարտությունը ապաքրեականացվեց, դա համարվեց ընդհանուր լրագրողական հանրության, քաղաքացիական հասարակության հաջողությունը, և որևէ մեկն այդ պահին չէր մտածի, որ «քաղաքացիական հասարակություն» ասվածի շատ անդամներ, որոնք այսօր հայտվել են ԱԺ–ում, լուռ, հնազանդ կքվեարկեն նման անիմաստ խստացնող օրենքի նախագծի օգտին։
«Հատկանշական է նաև, որ այդ օրենքի փոփոխությունը նախաձեռնել էին և դրան աջակցում էին մարդիկ, պատգամավորներ, որոնցից շատ-շատերի օգնականները շուրջ երեք տարի զբաղված են նույն զրպարտությամբ, նույն վատաբանումով, ֆեյքային գրոհներով, ֆեյքերի բանակ պահելով, ուստի տեղին է հիշեցնել հայտնի ժողովրդական խոսքը, երբ գողն ասում է՝ բռնեք գողին»,– նշեց «Երկիր Մեդիա» հեռուստաընկերության լրատվական և քաղաքական հաղորդումների տնօրենը։
Անդրադառնալով այն հարցին, թե վերոհիշյալ օրենքը կոնկրետ ինչ բացասական ազդեցություն կարող է ունենալ լրատվամիջոցների աշխատանքի վրա, Մանուկյանը նշեց, որ շատ հաճախ քաղաքական գործիչների հայտարարությունները, սոցցանցային գրառումները դժվար կլինի օգտագործել, որովհետև լրագրողն ամեն անգամ կաշկանդվելու է ու կասկածի, որ դրան հաջորդելու է դատական գործը։
Մանուկյանի կարծիքով` երկրորդ հանգամանքը նյութական հսկայական բեռն է, որ կուտակվելու է լրատվամիջոցների վրա և երրորդ` դատական գործերի թիվն է աճելու։
Վիրավորանքի համար` 3, զրպարտության համար՝ 6 մլն. Ալեն Սիմոնյանը վերանայել է իր նախագիծը
Հիշեցնենք, որ մարտի 24-ին Ազգային ժողովը երկրորդ ընթերցմամբ և ամբողջությամբ ընդունեց «ՀՀ քաղաքացիական օրենսգրքում փոփոխություններ կատարելու մասին» օրենքի նախագիծը՝ եռապատկելով վիրավորանքի և զրպարտության համար նախատեսվող դրամական փոխհատուցումը. վիրավորանքի համար՝ գործող 1 միլիոնի փոխարեն մինչև 3 միլիոն դրամ տուգանք, իսկ զրպարտության պարագայում՝ 2 միլիոն դրամի փոխարեն՝ մինչև 6 միլիոն դրամ։
